ନୂଆଦିଲ୍ଲୀ,୩୦/୦୫: ବିଶ୍ୱ ବଜାରରେ ବିଭିନ୍ନ ପ୍ରକାର ଅନିଶ୍ଚିତତା ସତ୍ତ୍ୱେ ଭାରତ ୨୦୨୫-୨୬ରେ ଏହାର ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ମାନ୍ୟତା ବଜାୟ ରଖିବ । ନିଜର ଉନ୍ନତ ମାକ୍ରୋ- ଅର୍ଥନୈତିକ ମାପଦଣ୍ଡ, ମଜଭୁତ ଆର୍ଥିକ କ୍ଷେତ୍ର ଏବଂ ନିରନ୍ତର ଅଭିବୃଦ୍ଧି ପ୍ରତି ଏହାର ପ୍ରତିବଦ୍ଧତା ଯୋଗୁ ଏହା ସମ୍ଭବ ହେବ । ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଏହାର ବାର୍ଷିକ ରିପୋର୍ଟରେ ଏଭଳି ପ୍ରକାଶ କରିଛି । ବିଶ୍ୱ ଆର୍ଥିକ ବଜାରରେ ଉତ୍ଥାନ ପତନ, ଭୁ-ରାଜନୈତିକ ଅସ୍ଥିରତା, ବାଣିଜ୍ୟ ଯୁଦ୍ଧ, ଯୋଗାଣ ଶୃଙ୍ଖଳ ସମସ୍ୟା ଏବଂ ଜଳବାୟୁଜନିତ ଅନିଶ୍ଚିତତା ମଧ୍ୟରେ ଏହି ରିପୋର୍ଟ ପ୍ରକାଶ ପାଇଛି ।
ଅର୍ଥନୈତିକ ଅଭିବୃଦ୍ଧି ପ୍ରତି ଏସବୁ ସମସ୍ୟାଗୁଡ଼ିକର ଡାଉନ୍ସାଇଡ୍ ରିସ୍କ ରହିଛି ଏବଂ ମୁଦ୍ରାସ୍ଫୀତିକୁ ଅପ୍ସାଇଡ୍ ବିପଦ ଅଛି । ଭାରତୀୟ ଅର୍ଥନୀତିର ମୂଳଦୁଆ ମଜଭୁତ ରହିଛି, ଯାହାଫଳରେ ଭାରତ ଏହାର ଦୃଢ଼ ମୁକାବିଲା କରିପାରିବ ବୋଲି ଆର୍ବିଆଇ ପ୍ରକାଶ କରିଛି । ୨୦୨୪-୨୫ରେ ଭାରତର ଜିଡିପି ଅଭିବୃଦ୍ଧି ୬.୫% ରହିଥିଲା । ଏଥିସହିତ ଭାରତ ବିଶ୍ୱର ସବୁଠୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତିର ମାନ୍ୟତା ବଜାୟ ରଖିଥିଲା ।
ଶୁକ୍ରବାର ସରକାର ୨୦୨୪-୨୫ ଆର୍ଥିକବର୍ଷ ଏବଂ ଏହି ଆର୍ଥିକବର୍ଷର ଚତୁର୍ଥ ତ୍ରୟମାସିକ ରିପୋର୍ଟ ଜାରି କରିବେ । ଭାରତର ପ୍ରଦର୍ଶନ ଭଲ ରହିବ ଏବଂ ଏହା ବିଶ୍ୱର ସବୁଠୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତିର ମୁକୁଟ ପୁଣି ପିନ୍ଧିବ ବୋଲି ଆର୍ବିଆଇ ପ୍ରକାଶ କରିଛି ।
କେନ୍ଦ୍ରୀୟ ବ୍ୟାଙ୍କ ଅନୁସାରେ, ବିନିଯୋଗ ଚାହିଦାରେ ବୃଦ୍ଧି, ସେବା କ୍ଷେତ୍ରରେ ସୁଧାର ଓ କୃଷି ଉତ୍ପାଦନ ବୃଦ୍ଧି ସହିତ ଭାରତର ଅର୍ଥନୈତିକ ଗତିବିଧି ବଢ଼ିଛି । ୨୦୨୫- ୨୬ରେ ଭାରତୀୟ ଅର୍ଥନୀତିର ଦୃଶ୍ୟପଟ ଭଲ ରହିଛି । ସରକାରୀ ବ୍ୟୟ ବୃଦ୍ଧି ଏବଂ ବିନିଯୋଗ ଚାହିଦାରେ ସୁଧାର ଯୋଗୁ ଏହା ସମ୍ଭବ ହୋଇଛି ।
ଅର୍ଥନୀତିକୁ ନେଇ ଉପଭୋକ୍ତା ଏବଂ ବ୍ୟବସାୟ ଜଗତ ଆଶାବାଦୀ ରହିଛନ୍ତି । ସର୍ବୋଚ୍ଚ ବ୍ୟାଙ୍କ ପ୍ରକାଶ କରିଛି ଯେ, ୨୦୨୫- ୨୬ ବଜେଟ୍ରେ ଘୋଷଣା ହୋଇଥିବା ଜାତୀୟ ବିନିର୍ମାଣ ମିଶନ୍ ‘ମେକ୍ ଇନ୍ ଇଣ୍ଡିଆ’ ଅଭିଯାନକୁ ଆହୁରି ବ୍ୟାପକ କରିବ । ବିନିର୍ମାଣ କ୍ଷେତ୍ର ବଢ଼ିବା ସହ ନୂଆ ନିଯୁକ୍ତି ସମ୍ଭାବନା ସୃଷ୍ଟି ହେବ । ବିଶ୍ୱ ବାଣିଜ୍ୟରେ ଭାରତର ଭାଗିଦାରୀ ବଢୁଥିବା ଆର୍ବିଆଇ ପ୍ରକାଶ କରିଛି ।
