ନୂଆଦିଲ୍ଲୀ,୧୪/୦୧: ଘରୋଇ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ରାଜକୋଟରେ ଦ୍ୱିତୀୟ ଦିନିକିଆ ଆରମ୍ଭ ହୋଇଛି । ରାଜକୋଟରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇ କିୱି ଦଳ । ଘରୋଇ ଭାରତକୁ ବ୍ୟାଟିଂ ଆମନ୍ତ୍ରଣ ଦେଇଛି ଭ୍ରମଣକାରୀ ଦଳ । ଉଭୟ ଟିମ୍‌ରେ ଗୋଟିଏ ଲେଖାଏଁ ପରିବର୍ତ୍ତନ ହୋଇଛି । ଟିମ୍ ଇଣ୍ଡିଆ ଚୂଡାନ୍ତ ଏକାଦଶରେ ୱାସିଂଟନ ସୁନ୍ଦରଙ୍କ ସ୍ଥାନରେ ନୀତିଶ ରେଡ୍ଡୀଙ୍କୁ ସାମିଲ କରାଯାଇଛି । ସେହିପରି ନ୍ୟୁଜିଲାଣ୍ଡ ଆଦିତ୍ୟ ଅଶୋଙ୍କ ସ୍ଥାନରେ ଜେଡନ ଲେନୋକ୍ସ​​​​​​​ଙ୍କୁ ସାମିଲ କରିଛି । ଏହା ତାଙ୍କର ଡେବ୍ୟୁ ମ୍ୟାଚ । ୱାସିଂଟନ ସୁନ୍ଦରଙ୍କ ସ୍ଥାନରେ ନୀତିଶ କିମ୍ବା ଆୟୁଷ ବଦୋନିଙ୍କୁ ସାମିଲ କରାଯିବାର ଥିଲା।ନୀତିଶ ରେଡ୍ଡୀଙ୍କୁ ଚୂଡାନ୍ତ ଏକାଶରେ ସାମିଲ କରାଯାଇଛି । ପ୍ରଥମ ମ୍ୟାଚ ଜିତି ସିରିଜରେ ୧-୦ରେ ରହିଛି ଭାରତ । ଆଜି ଦ୍ୱିତୀୟ ଦିନିକିଆ ଜିତି ଆଗୁଆ ସିରିଜ କବଜା ଲକ୍ଷ୍ୟରେ ରହିଛି ଶୁବମନ ସେନା । କର ବା ମର ସ୍ଥିତିରେ ରହିଛି କିୱି ଦଳ । 

ପ୍ରଥମ ମ୍ୟାଚ୍‌ ଜିତି ମନୋବଳ ସୁଦୃଢ଼ କରିସାରିଥିବା ଭାରତୀୟ ଦଳ ଆଉ ଏକ ବିଜୟ ସହ ସିରିଜ କବ୍‌ଜା କରିବାକୁ ପ୍ରୟାସ କରିବ । ନ୍ୟୁଜିଲାଣ୍ଡ ପାଇଁ ଏହି ମ୍ୟାଚ୍‌ ‘କର ବା ମର’। ତେଣୁ ଭ୍ରମଣକାରୀ ଦଳ ସିରିଜକୁ ପ୍ରତ୍ୟାବର୍ତ୍ତନ କରିବାକୁ ସବୁ ଶକ୍ତି ଖଟାଇବ । ମ୍ୟାଚ୍‌ ଫଳାଫଳ ଅପେକ୍ଷା ସମଗ୍ର ବିଶ୍ୱର ନଜର ବିରାଟ କୋହଲିଙ୍କ ଉପରେ ରହିବା ନିଶ୍ଚିତ । ଶେଷ ୭ଟି ଦିନିକିଆରେ କୋହଲି ଯଥାକ୍ରମେ ୭୪, ୧୩୫, ୧୦୨, ୬୫, ୧୩୧, ୭୭ ଓ ୯୩ ରନ୍‌ର ଇନିଂସ ଖେଳି ସାରିଛନ୍ତି । ଦିନିକିଆ ମାନ୍ୟତା ତାଲିକାର ଶୀର୍ଷ ସ୍ଥାନ ତାଙ୍କୁ ଅପେକ୍ଷା କରି ରହିଛି । ଭଦୋଦରା ଭଳି ରାଜକୋଟରେ ମଧ୍ୟ ସେ ରାଜୁତି କରିବା ଆଶା କରାଯାଉଛି ।