ଜୋହାନ୍ସବର୍ଗ,୧୬/୧୧: ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଆଜି ଅନୁଷ୍ଠିତ ଚତୁର୍ଥ ଟି-ଟ୍ୱେଣ୍ଟି ମୁକାବିଲାରେ ଭାରତ ୧୩୫ ରନ୍ରେ ବିଜୟ ହାସଲ କରି ୩-୧ରେ ସିରିଜ କବ୍ଜା କରିଛି । ଭାରତୀୟ ଦଳ ଏହି ମ୍ୟାଚ୍ରେ ଅନେକ ରେକର୍ଡ ସ୍ଥାପନ କରିଥିଲା । ଦ୍ୱିତୀୟ ସର୍ବାଧିକ ରନ୍ ଠାରୁ ଆରମ୍ଭ କରି ସର୍ବବୃହତ୍ ଭାଗିଦାରୀ ଭଳି ଅନେକ ରେକର୍ଡ ସ୍ଥାପନ ହୋଇଥିଲା।
୨୩ ଛକା, ୮୬ ବଲ୍ରେ ୨୧୦ ରନ୍ର ଭାଗିଦାରୀ, ଓଭର ପିଛା ୧୪.୧୫ ହାରରେ ୨୮୩ ରନ୍ । ମାତ୍ର ୨୦ ଓଭରର ଇନିଂସ ମଧ୍ୟରେ ଏଭଳି ବିଧ୍ୱଂସୀ ବ୍ୟାଟିଂକୁ ସହଜରେ ବିଶ୍ୱାସ କରିହେବ ନାହିଁ । ୱାଣ୍ଡରର୍ସ ଷ୍ଟାଡ଼ିୟମ୍ରେ ଅବିଶ୍ୱସନୀୟ ବ୍ୟାଟିଂ ପ୍ରଦର୍ଶନ କରି ଦର୍ଶକଙ୍କ ହୋସ୍ ଉଡ଼ାଇ ଦେଇଥିଲା ଯୁବ ଟିମ୍ ଇଣ୍ଡିଆ । ଘରୋଇ ଦକ୍ଷିଣ ଆଫ୍ରିକା ବିପକ୍ଷରେ ଅନୁଷ୍ଠିତ ଚତୁର୍ଥ ଟି-ଟ୍ୱେଣ୍ଟି ମୁକାବିଲାରେ ଭାରତ ୧୩୫ ରନ୍ରେ ବିଶାଳ ବିଜୟ ହାସଲ କରିଥିଲା । ଏଥିସହ ଦଳ ୩-୧ରେ ସିରିଜ ବିଜୟୀ ହୋଇଥିଲା । ସଞ୍ଜୁ ସାମସନ ଓ ତିଲକ୍ ବର୍ମାଙ୍କ ବିସ୍ଫୋରକ ଶତକ ବଳରେ ଭାରତ ଏହି ମ୍ୟାଚ୍ରେ ୧ ୱିକେଟ୍ ହରାଇ ୨୮୩ ରନ୍ ସଂଗ୍ରହ କରିଥିଲା । ଜବାବରେ ଦକ୍ଷିଣ ଆଫ୍ରିକା ୧୮.୨ ଓଭରରେ ୧୪୮ ରନ୍ କରି ଅଲ୍ ଆଉଟ୍ ହୋଇଯାଇଥିଲା । ତିଳକ ଉଭୟ ପ୍ଲେୟାର ଅଫ୍ ଦ ମ୍ୟାଚ୍ ଓ ସିରିଜ ବିବେଚିତ ହୋଇଥିଲେ ।
ଟସ୍ ଜିତି ଭାରତ ବ୍ୟାଟିଂ ନିଷ୍ପତ୍ତି ନେଇଥିଲା ଓ ଆରମ୍ଭ ହୋଇଥିଲା ବିଧ୍ୱଂସୀ ବ୍ୟାଟିଂ । ଅଭିଷେକ ଶର୍ମା ଓ ସଞ୍ଜୁ ସାମସନ ଛକା ଓ ଚୌକାରେ ପ୍ରତ୍ୟୁତ୍ତର ଦେଇଥିଲେ । ୫.୪ ଓଭରରେ ଦଳୀୟ ସ୍କୋର ୭୩ରେ ପହଞ୍ଚି ଯାଇଥିଲା । ଲୁଥୋ ସିମ୍ପାଲା ପରବର୍ତ୍ତୀ ବଲ୍ରେ ଅଭିଷେକଙ୍କୁ ଆଉଟ୍ କରିଥିଲେ । ସେ ୧୮ଟି ବଲ୍ରୁ ୨ଚୌକା ଓ ୪ ଛକା ବଳରେ ୩୬ ରନ୍ କରି ଆଉଟ୍ ହୋଇଥିଲେ । ଏହା ପରେ ଗ୍ରାଉଣ୍ଡକୁ ଓହ୍ଲାଇଥିଲେ ତିଳକ ବର୍ମା । ସେଞ୍ଚୁରୀୟନ୍ରେ ଶତକ ଅର୍ଜନ କରିଥିବା ତିଲକ୍ ଅପରାଜିତ ସାମସନଙ୍କ ସହ ତାଳ ଦେଇ ଧୂଆଁଧାର ବ୍ୟାଟିଂ କରିଥିଲେ ।
ଉଭୟଙ୍କ ନିର୍ମମ ପ୍ରହାରରେ ୱାଣ୍ଡରର୍ସ କମ୍ପି ଥିଲା । ଉଭୟଙ୍କୁ ଅଟକାଇବା ଅସମ୍ଭବ ମନେ ହୋଇଥିଲା । ବୋଲରମାନେ ଲୟ ହରାଇଥିଲେ । ଫିଲ୍ଡରଙ୍କ ଧୈର୍ଯ୍ୟ ଭାଙ୍ଗି ସାରିଥିଲା । ଶତକ ନିକଟତର ହେବା ବେଳକୁ ତିଳକ ଓ ସାମସନ କିଛି ତ୍ରୁଟିପୂର୍ଣ୍ଣ ସଟ୍ ଖେଳିଥିଲେ। ହେଲେ ଘରୋଇ ଦଳ ସବୁ କ୍ୟାଚ୍ ହାତଛଡ଼ା କରିଥିଲା । ପ୍ରଥମେ ସଞ୍ଜୁ ଓ ପରେ ପରେ ତିଳକ ଶତକ ପୂରଣ କରିଥିଲେ ଓ ଶେଷ ପର୍ଯ୍ୟନ୍ତ ଅପରାଜିତ ରହି ଦଳୀୟ ସ୍କୋରକୁ ୨୮୩ରେ ପହଞ୍ଚାଇଥିଲେ । ସଞ୍ଜୁ ୫୬ଟି ବଲ୍ରୁ ୬ଚୌକା ଓ ୯ଛକା ବଳରେ ୧୦୯ ଓ ତିଳକ ୪୭ଟି ବଲ୍ରୁ ୯ଚୌକା ଓ ୧୦ ଛକା ବଳରେ ୧୨୦ ରନ୍ର ଇନିଂସ ଖେଳିଥିଲେ । ସେ ମଧ୍ୟ ସାମସନଙ୍କ ପରି କ୍ରମାନ୍ୱୟରେ ୨ଟି ଶତକ ଅର୍ଜନ କରିଥିଲେ ।
୧୨୦ଟି ବଲ୍ରେ ୨୮୪ ରନ୍ର ଲକ୍ଷ୍ୟ ଦେଖି ଘରୋଇ ଦଳ ଧୈର୍ଯ୍ୟ ହରାଇ ସାରିଥିଲା । ୧୦ ରନ୍ ମଧ୍ୟରେ ଦଳ ୪ଟି ୱିକେଟ ହରାଇଥିଲା । ଏଥରୁ ୩ଟି ୱିକେଟ୍ ନେଇଥିଲେ ଅର୍ଶଦୀପ ସିଂହ । ରିଜା ହେଣ୍ଡରିକ୍ସ ଓ ହେନରିକ୍ କ୍ଲାସେନ ଖାତା ଖୋଲି ପାରିନଥିଲେ । ର୍ୟାନ୍ ରିକେଲଟନ୍ ୧ ଓ ଆଡେନ ମାରକ୍ରମ ୮ରନ୍ କରି ପାଭିଲିୟନ ଫେରିଥିଲେ । ଏହାପରେ ଟ୍ରିଷ୍ଟନ ଷ୍ଟବ୍ସ ଓ ଡେଭିଡ୍ ମିଲର କିଛି ଦର୍ଶନୀୟ ସଟ୍ ଖେଳି ୮୬ ରନ ସଂଗ୍ରହ କରିଥିଲେ । ଦଳୀୟ ସ୍କୋର ୯୬ ବେଳେ ମିଲରଙ୍କୁ ଆଉଟ୍ କରିଥିଲେ ବରୁଣ ଚକ୍ରବର୍ତ୍ତୀ । ସେ ୩୬ (୨ଚୌକା, ୩ଛକା) ରନ୍ କରିଥିଲେ । ପର ଓଭରରେ ଷ୍ଟବ୍ସଙ୍କୁ ପାଭିଲିୟନ ପଠାଇଥିଲେ ରବି ବିଷ୍ଣୋଇ । ବିସ୍ଫୋରକ ବ୍ୟାଟିଂ କରୁଥିବା ଷ୍ଟବ୍ସ ୨୯ଟି ବଲ୍ରୁ ୪୩ (୩ଚୌକା, ୨ଛକା) ରନ୍ କରି ଏଲବିଡବ୍ଲ୍ୟୁ ଆଉଟ୍ ହୋଇଥିଲେ ।
୬ଟି ୱିକେଟ୍ ହରାଇବା ପରେ ଦକ୍ଷିଣ ଆଫ୍ରିକାର ପରାଜୟ ନିଶ୍ଚିତ ହୋଇସାରିଥିଲା । କେବଳ ମାର୍କୋ ଜାନସେନ କିଛି ଦର୍ଶନୀୟ ସଟ୍ ଖେଳି ମନୋରଞ୍ଜନ କରାଇଥିଲେ । ଶେଷରେ ୧୦ଟି ବଲ୍ ବାକି ଥାଇ ଦକ୍ଷିଣ ଆଫ୍ରିକା ଅଲ୍ ଆଉଟ୍ ହୋଇଥିଲା । ଜାନସେନ ୨୯ ରନ୍ କରି ଅପରାଜିତ ରହିଥିଲେ ।
