ଅହମ୍ମଦାବାଦ,୨୨/୦୫: ଚଳିତ ଆଇପିଏଲ୍ର ୬୪ତମ ଲିଗ୍ ମ୍ୟାଚ୍ରେ ନିଜ ଘରୋଇ ଗ୍ରାଉଣ୍ଡରେ ଲକ୍ଷ୍ନୌ ସୁପରଜାଏଣ୍ଟ୍ସକୁ ଭେଟିବ । ପଏଣ୍ଟ ତାଲିକାର ଶୀର୍ଷ ସ୍ଥାନରେ ରହିଥିବା ଟାଇଟନ୍ସ ଦଳ ଆଉ ଏକ ବିଜୟ ହାସଲ କଲେ ଶ୍ରେଷ୍ଠ ୨ରେ ସ୍ଥାନ ବଜରାୟ ରଖିବା ନିଶ୍ଚିତ ହେବ । ସୁପରଜାଏଣ୍ଟ୍ସ ପ୍ଲେ-ଅଫ୍ ଦୌଡ଼ରୁ ବାଦ ପଡ଼ି ସାରିଥିବାରୁ ଏହି ମ୍ୟାଚ୍ କୌଣସି ଗୁରୁତ୍ୱ ରଖୁନାହିଁ । କେବଳ ସମ୍ମାନ ସାଉଁଟିବା ପାଇଁ ଶ୍ରେଷ୍ଠ ଖେଳ ପ୍ରଦର୍ଶନ କରିବାକୁ ସୁପରଜାଏଣ୍ଟ୍ସ ପ୍ରୟାସ କରିବ ।
୧୨ଟି ମ୍ୟାଚ୍ରୁ ୧୮ ପଏଣ୍ଟ ଅର୍ଜନ କରିସାରିଥିବା ସୁପରଜାଏଣ୍ଟ୍ସ ଆଉ ଗୋଟିଏ ମ୍ୟାଚ୍ ଜିତି ୨୦କୁ ପଏଣ୍ଟ ବୃଦ୍ଧି କରିବ । ଏହା ସମ୍ଭବ ହେଲେ ଟାଇଟନ୍ସର ପଏଣ୍ଟ ତାଲିକାର ପ୍ରଥମ ୨ଟି ସ୍ଥାନ ମଧ୍ୟରେ ରହି ଲିଗ୍ ପର୍ଯ୍ୟାୟ ଶେଷ କରିବ । ଲିଗ ଫର୍ମାଟ୍ ଅନୁଯାୟୀ ପଏଣ୍ଟ ତାଲିକାର ପ୍ରଥମ ୨ଟି ସ୍ଥାନ ହାସଲ କରୁଥିବା ଦଳକୁ ଅତିରିକ୍ତ ଏକ ସୁଯୋଗ ମିଳିବ । ପ୍ରଥମ ୨ଟି ସ୍ଥାନ ହାସଲ କରୁଥିବା ଦଳ ପ୍ରଥମ କ୍ୱାଲିଫାୟରରେ ପରାଜିତ ହେଲେ ମଧ୍ୟ ଦ୍ୱିତୀୟ କ୍ୱାଲିଫାୟର ଖେଳିବାକୁ ସୁଯୋଗ ପାଇବେ ।
ପ୍ରଦର୍ଶନ ଓ ଫର୍ମକୁ ଦେଖିଲେ ଆଜି ଟାଇଟନ୍ସର ପଲା ଭାରି ରହିବା ଏକ ପ୍ରକାର ନିଶ୍ଚିତ । ଗତ ରବିବାର ଅନୁଷ୍ଠିତ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ରେ ଟାଇଟନ୍ସ ୨୧୦ ରନ ବିଜୟ ଲକ୍ଷ୍ୟର ପିଛା କରି ୧୦ ୱିକେଟ୍ରେ ବିଜୟ ହାସଲ କରିଥିଲା । ଟାଇଟନ୍ସକୁ ହରାଇବାର କ୍ଷମତା ସୁପରଜାଏଣ୍ଟ୍ସ ନିକଟରେ ରହିଛି । ଏପର୍ଯ୍ୟନ୍ତ ମାତ୍ର ୩ଟି ଦଳ (ପଞ୍ଜାବ କିଙ୍ଗ୍ସ, ରାଜସ୍ଥାନ ରୟାଲ୍ସ ଓ ସୁପରଜାଏଣ୍ଟ୍ସ) ଟାଇଟନ୍ସକୁ ହରାଇଛନ୍ତି । ପୂର୍ବ ପରାଜୟର ପ୍ରତିଶୋଧ ନେବା ପାଇଁ ବର୍ତ୍ତମାନ ଟାଇଟନ୍ସ ନିକଟରେ ସୁଯୋଗ ରହିଛି ।
୧୨ଟି ଲେଖାଏଁ ମ୍ୟାଚ୍ ଖେଳି ସାରିବା ପରେ ଉଭୟ ଦଳର ତ୍ରୁଟି ଓ ପ୍ରଦର୍ଶନକୁ ନେଇ ଆଲୋଚନା କରିବା ଠିକ୍ ନୁହେଁ । ଟାଇଟନ୍ସ ଅଧିକାଂଶ ମ୍ୟାଚ୍ରେ କେବଳ ଟପ୍ ଅର୍ଡର ବ୍ୟାଟରଙ୍କ ପ୍ରଦର୍ଶନ ଯୋଗୁଁ ଜିତିଛି । ସାଇ ସୁଦର୍ଶନ, ଶୁଭମନ ଗିଲ୍ ଓ ଜୋସ ବଟଲରଙ୍କ ବିସ୍ଫୋରକ ବ୍ୟାଟିଂ ବ୍ୟତୀତ ପ୍ରସିଦ୍ଧ କ୍ରିଷ୍ଣା ଓ ମହମ୍ମଦ ସିରାଜଙ୍କ ଶୃଙ୍ଖଳିତ ଦଳର ବିଜୟରେ ପ୍ରମୁଖ ଭୂମିକା ଗ୍ରହଣ କରିଛି । ବାକି ଖେଳାଳିମାନେ ଏପର୍ଯ୍ୟନ୍ତ ପରୀକ୍ଷାର ସମ୍ମୁଖୀନ ହୋଇ ନାହାନ୍ତି । ସୁପରଜାଏଣ୍ଟ୍ସର ପ୍ରଦର୍ଶନରେ ଉତ୍ଥାନ ପତନ ଲାଗି ରହିଛି । ନିକୋଲାସ ପୂରନଙ୍କ ଫର୍ମ ହାନି ଓ ରିଷଭ ପନ୍ତଙ୍କ ବେପରବାୟ ସଟ ଚୟନ ଯୋଗୁଁ ଦଳର ପ୍ରଦର୍ଶନରେ ଅବନତି ହୋଇଛି ।
ଆଜି ଟାଇଟନ୍ସ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ । ତଥାପି ପ୍ରସିଦ୍ଧ କିମ୍ବା ସିରାଜଙ୍କ ମଧ୍ୟରୁ ଜଣଙ୍କୁ ବିଶ୍ରାମ ମିଳିପାରେ । ସୁପରଜାଏଣ୍ଟ୍ସ ଦଳରେ ଗୋଟିଏ ପରିବର୍ତ୍ତନ ହେବ । ନିଲମ୍ବିତ ହୋଇଥିବା ଦିଗବେଶ ରାଠିଙ୍କ ସ୍ଥାନରେ ଏମ ସିଦ୍ଧାର୍ଥ ଓ ସାହବାଜ ଅହମ୍ମଦଙ୍କ ମଧ୍ୟରୁ ଜଣେ ଖେଳିବାକୁ ସୁଯୋଗ ପାଇବେ ।
ଚଳିତ ସିଜନରେ ଅହମ୍ମଦାବାଦରେ ୫ଟି ମ୍ୟାଚ ଖେଳାଯାଇଛି । ଏଥିରୁ ପ୍ରଥମେ ବ୍ୟାଟିଂ କରିଥିବା ଦଳ ୪ଟି ମ୍ୟାଚ୍ରେ ବିଜୟୀ ହୋଇଛନ୍ତି । ପିଚ୍ରୁ ପେସ୍ ବୋଲରମାନେ ମଧ୍ୟ ଫାଇଦା ଉଠାଇଛନ୍ତି । ତେଣୁ ଟସକୁ ନେଇ ଚିନ୍ତା କରିବାର ଆବଶ୍ୟକତା ନାହିଁ । ତଥାପି ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଇପିଏଲ୍ର ଏକ ପରମ୍ପରା ହୋଇଯାଇଛି ।
ସମ୍ଭାବ୍ୟ ଦ୍ବାଦଶ
ଗୁଜରାଟ ଟାଇଟନ୍ସ: ଶୁଭମନ ଗିଲ୍ (ଅଧିନାୟକ), ସାଇ ସୁଦର୍ଶନ, ଜୋସ ବଟଲର, ସେରଫାନ ରଦରଫୋର୍ଡ, ଶାହରୁଖ ଖାନ, ରାହୁଲ ତେୱାତିଆ, ରସିଦ ଖାନ, କାଗିସୋ ରାବାଡା, ଅର୍ସଦ ଖାନ, ସାଇ କିଶୋର, ମହମ୍ମଦ ସିରାଜ, ପ୍ରସିଦ୍ଧ କ୍ରିଷ୍ଣା ।
ଲକ୍ଷ୍ନୌ ସୁପରଜାଏଣ୍ଟ୍ସ: ମିଚେଲ ମାର୍ଶ, ଆଡେନ ମାରକ୍ରମ, ରିଷଭ ପନ୍ତ, ନିକୋଲାସ ପୂରନ, ଆୟୂଷ ବାଦୋନି, ଅବଦୁଲ ସମଦ, ସର୍ଦୁଲ ଠାକୁର, ରବି ବିଷ୍ଣୋଇ, ଆକାଶ ଦୀପ, ଅଭେଶ ଖାନ, ସାହବାଜ ଅହମ୍ମଦ/ଏମ ସିଦ୍ଧାର୍ଥ, ୱିଲ୍ ଓ’ରୁର୍କ ।
