କଟକ, ୨୫/୫ : କଟକରେ ରାଷ୍ଟ୍ର ବିରୋଧୀ ସ୍ଲୋଗାନ ଦେଇ ଦୁଇ ଯୁବକ ଗିରଫ ଘଟଣାର ତଦନ୍ତ ଜାରି ରଖିଛି ଚାଉଳିଆଗଞ୍ଜ ଥାନା ପୋଲିସ। "ପାକିସ୍ତାନ ଜିନ୍ଦାବାଦ" ନାରା ଦେଇଥିଲେ ଦୁଇ ଅଭିଯୁକ୍ତ। ଗତକାଲି ସୌରଭ କୁମାର ସାହୁ ଓ ଗୌତମ ଲେଙ୍କାକୁ ଗିରଫ କରିଥିଲା କମିଶନରେଟ ପୋଲିସ। ଏହି ଘଟଣାରେ ଆଉ କାହା କାହାର ସଂପୃକ୍ତି ରହିଛି ସେ ନେଇ ଅଧିକ ତଦନ୍ତ ଜାରି ରଖିଛି ପୋଲିସ୍। ଗିରଫ ଅଭିଯୁକ୍ତ ଗୌତମ ଲେଙ୍କାଙ୍କର ଏକ ରାଇଫଲ ଧରି ଥିବା ଫଟୋ ମଧ୍ୟ ଭାଇରାଲ୍ ହେଉଥିବାବେଳେ, ଏହି ଫଟୋ ସମ୍ପର୍କରେ ଖୋଳତାଡ଼ କରୁଛି ପୋଲିସ।
ଗତ ୧୫ ତାରିଖ ଦିନ ମହାନଦୀ କୁଳ ଗାନ୍ଧିପଲ୍ଲୀ ଗଡ଼ା ନିକଟରେ ଏହି ରାଷ୍ଟ୍ର ବିରୋଧୀ ସ୍ଲୋଗାନ ଦିଆଯାଇଥିଲା। ଅଭିଯୁକ୍ତ ସୌରଭ "ପାକିସ୍ତାନ ଜିନ୍ଦାବାଦ" ନାରା ଦେଇଥିଲା । ଗୌତମ ଏହାକୁ ମୋବାଇଲରେ ରେକର୍ଡ଼ କରିଥିଲା। ଏହାପରେ ଏହାକୁ ଜାଣି ଶୁଣି ଭାଇରାଲ୍ କରିଥିଲେ ଅଭିଯୁକ୍ତ। ଦୁଇଟି ମୋବାଇଲ ଫୋନ୍ ଜବତ କରିଛି ଚାଉଳିଆଗଞ୍ଜ ଥାନା ପୋଲିସ। ଗିରଫ ସୌରଭ ନାଁରେ ପୂର୍ବରୁ ଚାଉଳିଆଗଞ୍ଜ ଥାନାରେ ଦୁଇଟି ମାମଲା ଥିବା ବେଳେ ଗୌତମ ନାଁରେ ମର୍କତ ନଗର ଥାନାରେ ଗୋଟିଏ ମାମଲା ରହିଥିବା ସୂଚନା ଦେଇଛି କମିଶନରେଟ ପୋଲିସ। ଦୁଇ ଅଭିଯୁକ୍ତ କଟକ ସହରର ସାମ୍ପ୍ରଦାୟିକ ସଦଭାବ, ସମନ୍ୱୟକୁ ନଷ୍ଟ କରି ହିଂସା ସୃଷ୍ଟି କରିବାକୁ ଉଦ୍ୟମ କରିଥିବା କମିଶନରେଟ ପୋଲିସ ପକ୍ଷରୁ ସୂଚନା ଦିଆଯାଇଛି।
