ନୂଆଦିଲ୍ଲୀ ୩୧/୦୫: ଆଇପିଏଲ୍ର ଫାଇନାଲ ମ୍ୟାଚ୍ ରବିବାର ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଏବଂ ଗୁଜରାଟ ଟାଇଟନ୍ସ ମଧ୍ୟରେ ଅହମ୍ମଦାବାଦରେ ଖେଳାଯିବ । ତେବେ ମ୍ୟାଚ୍ ପାଇଁ ଅହମ୍ମଦାବାଦକୁ ବିମାନ ଭଡ଼ା ୧୭,୦୦୦ ଟଙ୍କାରୁ ୩୫,୦୦୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଛି । ସେହିଭଳି ଅହମ୍ମଦାବାଦରେ ବଡ଼ ହୋଟେଲଗୁଡ଼ିକରେ ଗୋଟିଏ ରାତିର ଭଡ଼ା ବି ୩୬,୦୦୦ ଟଙ୍କା ପର୍ଯ୍ୟନ୍ତ ପହଞ୍ଚିଯାଇଛି । ନରେନ୍ଦ୍ର ମୋଦି ଷ୍ଟାଡିୟମରେ ଉଭୟ ଟିମ୍ ପାଖରେ ଦ୍ୱିତୀୟ ଥର ଟାଇଟଲ ଜିତିବାର ସୁଯୋଗ ରହିଛି । ବେଙ୍ଗାଲୁରୁ ଗତବର୍ଷ ପ୍ରଥମ ଟାଇଟଲ ଜିତିଥିଲା ।
ସେହଭଳି ଗୁଜରାଟ ୨୦୨୨ରେ ଏହାର ପ୍ରଥମ ସିଜନରେ ଚାମ୍ପିୟନ ହୋଇଥିଲା । ମେ’ ଶେଷ ଭାଗକୁ ବିଶେଷ କରି ହୋଟେଲ ଶିଳ୍ପ ପାଇଁ ଅଫ୍-ସିଜନ ଭାବେ ଗଣାଯାଇଥାଏ । ସହରର କେତେକ ବଡ଼ ହୋଟେଲରେ ପୂର୍ବରୁ ହିଁ ବୁକିଂ ହେଉଛି । ଅହମ୍ମଦାବାଦର ଅଧିକାଂଶ ପ୍ରିମିୟମ ହୋଟେଲ ୩୦ ଏବଂ ୩୧ ମେ’ରେ ସମ୍ପୂର୍ଣ୍ଣ ବୁକ୍ ହୋଇଯାଇଛି । ଅନୁମାନ କରାଯାଉଛି ଯେ, ହୋଟେଲ ଶିଳ୍ପକୁ ମାତ୍ର ଦୁଇ ଦିନରେ ୨୦୦ କୋଟି ଟଙ୍କାରୁ ଅଧିକ ଲାଭ ହେବ ।
ଆଇପିଏଲ ଫାଇନାଲର ସବୁଠୁ ବଡ଼ ଫାଇଦା କେବଳ ହୋଟେଲ ଶିଳ୍ପକୁ ନୁହେଁ ବରଂ ସହରର ସମଗ୍ର ବ୍ୟବସାୟ ଜଗତକୁ ହେଉଛି । ଦେଶର ବିଭିନ୍ନ ପ୍ରାନ୍ତରୁ ଆସିଥିବା କ୍ରିକେଟ୍ ଫ୍ୟାନ୍ମାନେ ମ୍ୟାଚ୍ ଦେଖିବା ପାଇଁ ଅହମ୍ମଦାବାଦ ଆସୁଛନ୍ତି । ଫଳରେ ବିମାନ ଟିକଟ ଚାହିଦା ବଡ଼ ମାତ୍ରାରେ ବଢ଼ିଯାଇଛି । ଟ୍ରେନ ଏବଂ ବସ୍ ଟିକଟ ଚାହିଦା ବି ବୃଦ୍ଧି ପାଇଛି।
ଏହା ପୂର୍ବରୁ ବି ବଡ଼ କ୍ରିକେଟ ଆୟୋଜନ ସମୟରେ ଅହମ୍ମଦାବାଦରେ ବିମାନ ଭଡ଼ାରେ ବଡ଼ ବୃଦ୍ଧି ଦେଖିବାକୁ ମିଳିଛି । ଆଇପିଏଲ୍ ଫାଇନାଲ ମ୍ୟାଚ୍ ଯୋଗୁ ଏସ୍ଜି ହାଇୱେ, ମୋଟେରା, ଚାନ୍ଦଖେଡା ଏବଂ ଗାନ୍ଧିନଗର ଆଦି ସ୍ଥାନରେ ହୋଟେଲର ସବୁଠାରୁ ଅଧିକ ଚାହିଦା ରହିଛି । ଅହମ୍ମଦାବାଦ ହୋଟେଲଗୁଡ଼ିକରେ ପ୍ରାୟ ୨୦୦୦୦ ରୁମ୍ ଉପଲବ୍ଧ । ତେବେ ଆଇପିଏଲ୍ ଫାଇନାଲ ମ୍ୟାଚ୍ ଯୋଗୁ ସବୁ ରୁମ୍ ବୁକ୍ ହୋଇସାରିଥିବା ଜଣାପଡ଼ିଛି ।
ଅଧିକ ପଢ଼ନ୍ତୁ :- IPL Final 2026: ଦ୍ୱିତୀୟ ଟାଇଟଲ ପାଇଁ ହାଇଭୋଲଟେଜ୍ ମୁକାବିଲା, ଅହମ୍ମଦାବାଦରେ ଗୁଜରାଟ- ବେଙ୍ଗାଲୁରୁ ମଧ୍ୟରେ ଫାଇଟ୍
