ନୂଆଦିଲ୍ଲୀ: ଗୁରୁବାର ଇସ୍ରାଏଲ ଏବଂ ହମାସ ମଧ୍ୟରେ ଏକ ଚୁକ୍ତି ଉପରେ ବୁଝାମଣା ସ୍ବାକ୍ଷରିତ ହୋଇଛି, ଯେଉଁଥିରେ ଯୁଦ୍ଧବିରତି ଏବଂ ପାଲେଷ୍ଟାଇନୀ ବନ୍ଦୀ ମାନଙ୍କୁ ମୁକ୍ତ କରିବା ପାଇଁ ସହମତି ପ୍ରକାଶ ପାଇଛି। ଏହି ଚୁକ୍ତି ଗାଜାରେ ଯୁଦ୍ଧ ସମାପ୍ତ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପଦକ୍ଷେପର ପ୍ରଥମ ପର୍ଯ୍ୟାୟର ଏକ ଅଂଶ ବୋଲି କୁହାଯାଉଛି।
ମିଶରରେ ଉଭୟ ପକ୍ଷର ଅଧିକାରୀଙ୍କ ମଧ୍ୟରେ ହୋଇଥିବା ଆଲୋଚନା ପରେ ଚୁକ୍ତି ସ୍ୱାକ୍ଷରକୁ ନିଶ୍ଚିତ କରାଯାଇଛି। ପାଲେଷ୍ଟାଇନୀ ଏବଂ ଇସ୍ରାଏଲୀ ମାନେ ଚୁକ୍ତି ଘୋଷଣାକୁ ପାଳନ କରିଛନ୍ତି। ଏହା ଦୁଇ ବର୍ଷର ଯୁଦ୍ଧ ସମାପ୍ତ କରିବା ଦିଗରେ ଏପର୍ଯ୍ୟନ୍ତ ନିଆଯାଇଥିବା ସବୁଠାରୁ ବଡ଼ ପଦକ୍ଷେପ, ଯେଉଁଥିରେ ୬୭ ହଜାରରୁ ଅଧିକ ପାଲେଷ୍ଟାଇନୀ ନିହତ ହୋଇଛନ୍ତି।
ଏହି ଚୁକ୍ତି ଅନୁଯାୟୀ,ଏକ ଯୁଦ୍ଧବିରତି କାର୍ଯ୍ୟକାରୀ ହେବ। ଇସ୍ରାଏଲ ଗାଜାରୁ ଆଂଶିକ ଭାବରେ ସେନା ପ୍ରତ୍ୟାହାର କରିବ । ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଛନ୍ତି ଯେ, ତାଙ୍କ ସରକାରଙ୍କ ଅନୁମୋଦନ ପରେ ଯୁଦ୍ଧବିରତି କାର୍ଯ୍ୟକାରୀ ହେବ। ରଏଟର୍ସ ରିପୋର୍ଟ ଅନୁଯାୟୀ, ଇସ୍ରାଏଲୀ ସରକାର ଚୁକ୍ତି ସ୍ୱାକ୍ଷରକୁ ନିଶ୍ଚିତ କରି କହିଛନ୍ତି ଯେ କ୍ୟାବିନେଟ ବୈଠକର ୨୪ ଘଣ୍ଟା ମଧ୍ୟରେ ଏକ ଯୁଦ୍ଧବିରତି କାର୍ଯ୍ୟକାରୀ ହେବ। ଗାଜାରେ ରଖାଯାଇଥିବା ବନ୍ଧକ ମାନଙ୍କୁ ୭୨ ଘଣ୍ଟା ମଧ୍ୟରେ ମୁକ୍ତ କରାଯିବ।
ରିପୋର୍ଟ ଅନୁଯାୟୀ,ଜଣେ ଇସ୍ରାଏଲୀ ଅଧିକାରୀ କହିଛନ୍ତି,"୨୦୨୩ ଅକ୍ଟୋବର ୭ରେ ଆକ୍ରମଣ ସମୟରେ ହମାସ ଦ୍ୱାରା ବନ୍ଦୀ ହୋଇଥିବା ସମସ୍ତ ୨୦ ଜଣ ଇସ୍ରାଏଲୀ ବନ୍ଧକଙ୍କୁ ମୁକ୍ତ କରାଯିବ। ଏହି ସମସ୍ତ ବନ୍ଧକ ଗାଜାରେ ଜୀବିତ ଅଛନ୍ତି।"
