ନୂଆଦିଲ୍ଲୀ: ଇଂଲଣ୍ଡ ଗସ୍ତରେ ଥିବା ବିଦେଶ ମନ୍ତ୍ରୀ ଏସ ଜୟଶଙ୍କରଙ୍କ ସୁରକ୍ଷାରେ ତ୍ରୁଟି ପରିଲକ୍ଷିତ ହେବା ପରେ ଇଂଲଣ୍ଡ ସରକାର ଏନେଇ ଦୁଃଖ ପ୍ରକାଶ କରିଛନ୍ତି। ତେବେ ଏହି ଘଟଣାରେ ଅଭିଯୁକ୍ତ ଯୁବକଙ୍କ ବିରୁଦ୍ଧରେ ବ୍ରିଟେନ ସରକାର କୌଣସି କାର୍ଯ୍ୟନୁଷ୍ଠାନ ଗ୍ରହଣ କରିନଥିବାରୁ ଭାରତ ସରକାରଙ୍କ ପକ୍ଷରୁ ଏନେଇ କ୍ଷୋଭ ପ୍ରକାଶ ପାଇଛି।
ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଏନେଇ ଏକ ବିବୃତି ଜାରି କରାଯାଇ କୁହାଯାଇଛି ଯେ “ଏହି ମାମଲାରେ ବ୍ରିଟେନ ବୈଦେଶିକ କାର୍ଯ୍ୟାଳୟ ଦ୍ୱାରା ଜାରି କରାଯାଇଥିବା ବିବୃତ୍ତି ଆମ ପାଖରେ ପହଞ୍ଚିଛି। ତେବେ ଏତେ ବଡ ଘଟଣା ପରେ ବି ଅଭିଯୁକ୍ତ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ପାରିନାହିଁ। ଆମର ଲକ୍ଷ୍ୟ ସମ୍ପୂର୍ଣ୍ଣ ଭାବେ ଏହା ଉପରେ ରହିଛି।”
ସୂଚନା ମୁତାବକ, ବ୍ରିଟେନର ଥିଙ୍କ ଟ୍ୟାଙ୍କ ଚାତ୍ଥମ ହାଉସର ଏକ କାର୍ଯ୍ୟକ୍ରମରେ ଯୋଗ ଦେବାକୁ ବିଦେଶ ମନ୍ତ୍ରୀ ଏସ ଜୟଶଙ୍କର ବର୍ତ୍ତମାନ ଲଣ୍ଡନ ଗସ୍ତରେ ରହିଛନ୍ତି। ସେ ନିଜ ବୈଠକ ସାରି ନିଜ କାରକେଡକୁ ଫେରୁଥିବା ସମୟରେ ଖଲିସ୍ତାନି ଚରମପନ୍ଥୀ ମାନେ ଭାରତ ବିରୋଧି ସ୍ଲୋଗାନ ଦେଉଥିଲେ। ସେମାନଙ୍କ ଭିତରୁ ଜଣେ ଯୁବକ ହଠାତ୍ ତାଙ୍କ କାରକେଡ ନିକଟକୁ ଧସେଇ ପଶିଆସିଥିଲେ। ଏହା ପରେ ଉକ୍ତ ଯୁବକ ଜଣଙ୍କ ନିଜ ହାତରେ ଧରିଥିବା ଏକ ତ୍ରିରଙ୍ଗା ପତାକାକୁ ଫାଢି ଦେଇଥିଲେ। ସବୁଠୁ ବଡ କଥା ହେଉଛି ଘଟଣାସ୍ଥଳରେ ପୋଲିସ ଉପସ୍ଥିତ ଥିଲେ ମଧ୍ୟ ଏତେସବୁ କଥା ଘଟିଯାଇଥିଲା।
ଭାରତ ପକ୍ଷରୁ ଏହି ଘଟଣାକୁ ପ୍ରବଳ ବିରୋଧ କରାଯାଇଥିଲା। ତେବେ ଗୁରୁବାର ବ୍ରିଟେନ ପ୍ରଧାନମନ୍ତ୍ରୀ କେଇର ଷ୍ଟାମରଙ୍କ ସରକାର ଏହି ଘଟଣାକୁ ନିନ୍ଦନିୟ କହିବା ସହ ଏଭଳି ଅପରାଧ ଆଦୈ ଗ୍ରହଣଯୋଗ୍ୟ ନୁହେଁ ବୋଲି ମନ୍ତବ୍ୟ ଦେଇଥିଲେ। କିନ୍ତୁ ଏହା ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରାଯିବାରୁ ଦିଲ୍ଲି ପକ୍ଷରୁ କେତେକ ବିଚ୍ଛିନତାବାଦିଙ୍କ ଦ୍ୱାରା ସମ୍ୱିଧାନ ସ୍ୱାଧିନତାର ଅପବ୍ୟବହାର ବୋଲି କୁହାଯାଇଥିଲା।
ଦେଖିବାକୁ ଗଲେ ଏହା ଖଲିସ୍ତାନ ସମର୍ଥକଙ୍କ ଦ୍ୱାରା ପ୍ରଥମ ସୁରକ୍ଷା ଉଲ୍ଲଂଘନ ନୁହେଁ ଏହା ପୁର୍ବରୁ ମଧ୍ୟ ଏପରି ଅନେକ ଥର ହୋଇଛି। ମାର୍ଚ୍ଚ ମାସ ୨୦୨୩ରେ କିଛି ପ୍ରଦର୍ଶନକାରୀ ଲଣ୍ଡନରେ ଥିବା ଭାରତ ହାଇ କମିଶନରଙ୍କ ଭବନରେ ଲାଗିଥିବା ଭାରତୀୟ ପତାକାକୁ ତଳକୁ ଟାଣି ଦେଇଥିଲେ। ଏହାର ଜବାବରେ ଭାରତ ପକ୍ଷରୁ କଡ଼ା ପ୍ରତିକ୍ରିୟା ପ୍ରକାଶ ପାଇଥିଲା। ଏହି ଘଟଣା ପରେ, ଭାରତ ଦିଲ୍ଲୀରେ ଥିବା ବରିଷ୍ଠ ବ୍ରିଟିଶ କୂଟନୀତିଜ୍ଞଙ୍କୁ ଡକାଇ ଏହି ଘଟଣା ପାଇଁ ସ୍ପଷ୍ଟୀକରଣ ଦାବି କରିଥିଲା।
