ଦୁବାଇ, : ୨୦୨୪ ବର୍ଷ ପାଇଁ ଆଇସିସି ଶ୍ରେଷ୍ଠ ଖେଳାଳି ପୁରସ୍କାର ତାଲିକା ଘୋଷଣା କରିଛି । ବର୍ଷର ଶ୍ରେଷ୍ଠ ପୁରୁଷ ଖେଳାଳି ଓ ଶ୍ରେଷ୍ଠ ପୁରୁଷ ଟେଷ୍ଟ ଖେଳାଳି ପୁରସ୍କାର ତାଲିକାରେ ଯଶପ୍ରୀତ ବୁମରା ସ୍ଥାନ ପାଇଛନ୍ତି ।
ଶ୍ରେଷ୍ଠ ଖେଳାଳି ଦୌଡ଼ରେ ବୁମରାଙ୍କ ବ୍ୟତୀତ ଇଂଲଣ୍ଡର ଜୋ ରୁଟ୍ ଓ ହ୍ୟାରୀ ବ୍ରୁକ୍, ଅଷ୍ଟ୍ରେଲିଆର ଟ୍ରେଭିସ୍ ହେଡ୍ ରହିଛନ୍ତି । ବୁମରା ଚଳିତ ବର୍ଷ ୧୩ଟି ଟେଷ୍ଟରେ ୭୧ଟି ୱିକେଟ୍ ନେଇଛନ୍ତି । ସେହିପରି ୮ଟି ଟି-ଟ୍ୱେଣ୍ଟି ଖେଳି ୧୫ଟି ୱିକେଟ୍ ଅକ୍ତିଆର କରିଛନ୍ତି । ଟି-ଟ୍ୱେଣ୍ଟି ବିଶ୍ୱକପ୍ରେ ସେ ପ୍ଲେୟାର ଅଫ ଦ ସିରିଜ ବିବେଚିତ ହୋଇଥିଲେ । ବ୍ରୁକ୍ ଚଳିତ ବର୍ଷ ୧୨ଟି ଟେଷ୍ଟ ଖେଳି ୧୧୦୦ ରନ୍ ସଂଗ୍ରହ କରିଛନ୍ତି । ସେହିପରି ରୁଟ୍ ୧୭ଟି ଟେଷ୍ଟ ଖେଳି ୫୫.୫୭ ହାରରେ ୧୫୫୬ ରନ୍ ସଂଗ୍ରହ କରିଥିବାବେଳେ ହେଡ୍ ୯ଟି ଟେଷ୍ଟରୁ ୬୦୮ରନ୍ ଓ ୧୫ଟି ଟି-ଟ୍ୱେଣ୍ଟିରୁ ୫୩୯ ରନ୍ ସଂଗ୍ରହ କରିଛନ୍ତି ।
ଶ୍ରେଷ୍ଠ ଟେଷ୍ଟ କ୍ରିକେଟ୍ ଖେଳାଳି ପୁରସ୍କାର ଦୌଡ଼ରେ ବୁମରାଙ୍କ ବ୍ୟତୀତ ଇଂଲଣ୍ଡର ରୁଟ୍ ଓ ବ୍ରୁକ୍ଙ୍କ ସମେତ ଶ୍ରୀଲଙ୍କାର କାମିଣ୍ଡୁ ମେଣ୍ଡିସ୍ ସାମିଲ ରହିଛନ୍ତି । ମେଣ୍ଡିସ ଚଳିତ ବର୍ଷ ୯ଟି ଟେଷ୍ଟ ଖେଳି ୭୪.୯୨ ହାରରେ ୧୦୪୯ ରନ୍ ସଂଗ୍ରହ କରିଛନ୍ତି ।
ଶ୍ରେଷ୍ଠ ଟି-ଟ୍ୱେଣ୍ଟି ଖେଳାଳି ପୁରସ୍କାର ଦୌଡ଼ରେ ଭାରତର ଅର୍ଶଦୀପଙ୍କ ସମେତ ଜିମ୍ବାୱେର ସିକନ୍ଦର ରାଜା, ଟ୍ରେଭିସ୍ ହେଡ ଓ ପାକିସ୍ତାନର ବାବର ଆଜମ ରହିଛନ୍ତି । ଅର୍ଶଦୀପ ଚଳିତ ବର୍ଷ ୧୮ଟି ଟି-ଟ୍ୱେଣ୍ଟି ଖେଳି ୩୬ଟି ୱିକେଟ୍ ଅକ୍ତିଆର କରିଛନ୍ତି । ଦିନିକିଆ ଖେଳାଳି ପୁରସ୍କାର ଦୌଡ଼ରେ କୌଣସି ଭାରତୀୟ ସ୍ଥାନ ପାଇନାହାନ୍ତି ।
ମହିଳା ଦିନିକିଆ ଖେଳାଳି ପୁରସ୍କାର ଦୌଡ଼ରେ ଭାରତର ସ୍ମୃତି ମନ୍ଧନା ସ୍ଥାନ ପାଇଛନ୍ତି । ଅନ୍ୟମାନଙ୍କ ମଧ୍ୟରେ ଅଷ୍ଟ୍ରେଲିଆର ଆନାବେଲ ସୁଦରଲାଣ୍ଡ, ଦକ୍ଷିଣ ଆଫ୍ରିକାର ଲୌରା ଉଲଭାର୍ଟ ଓ ଶ୍ରୀଲଙ୍କାର ଚାମରି ଆଟାପଟୁ ରହିଛନ୍ତି । ମନ୍ଧନା ଚଳିତ ବର୍ଷ ୧୨ଟି ଦିନିକିଆ ଖେଳି ୬୧.୯୧ ହାରରେ ୭୪୩ ରନ୍ ସଂଗ୍ରହ କରିଛନ୍ତି । ମହିଳା ଉଦୀୟମାନ ଖେଳାଳି ପୁରସ୍କାର ତାଲିକାରେ ଭାରତର ଶ୍ରେୟଙ୍କା ପାଟିଲ ସ୍ଥାନ ପାଇଛନ୍ତି । ଶ୍ରେୟଙ୍କା ଚଳିତ ବର୍ଷ ୧୩ଟି ଟି-ଟ୍ୱେଣ୍ଟିରୁ ୧୫ ୱିକେଟ୍ ଓ ୨ଟି ଦିନିକିଆରୁ ୪ଟି ୱିକେଟ୍ ଅକ୍ତିଆର କରିଛନ୍ତି ।
