ଭୁବନେଶ୍ଵର, ୧୨/୧୧ : ଦଳବଦଳ ରାଜନୀତି ଓ ରାଜନେତାଙ୍କ ବୟାନବାଜିରେ ପଡ଼ୁନି ପୂର୍ଣ୍ଣଛେଦ। ବିଜେଡି ବରିଷ୍ଠ ନେତା ଅତନୁଙ୍କ ବାକ୍ୟବାଣ ପରେ ଆଜି ତାଙ୍କୁ କାଉଣ୍ଟର କରିଛନ୍ତି ବିଜେପି ନେତା ଜୟନାରାୟଣ ମିଶ୍ର। ସେ କହିଛନ୍ତି ଯେ, 'ଅତନୁ ବାବୁ କଂଗ୍ରେସ ସହ ମିଶି ବିଜେଡି ସରକାର ଗଢିବେ ବୋଲି ଯେଉଁ ଦାବି କରିଛନ୍ତି ତାକୁ ସ୍ଵାଗତ, କିନ୍ତୁ ବିଜେଡି ରହିଲେତ ? ବିଜେଡିର ଆୟୁଷ ବହୁତ କମ୍। ଏବେ ତ ବିଜେଡି ସାଲାଇନ୍ ଓ ଆଇସିୟୁରେ ଚାଲିଛି। ବିଜେଡିରେ ନେତୃତ୍ଵ କାହିଁ ? ବିଜେଡି ଲିଜ୍ରେ ଚାଲିଥିଲା। କେତେବେଳେ ପ୍ୟାରୀ ତ ଆଉ କେତେବେଳେ ପାଣ୍ଡିଆନ୍ ଲିଜ୍ ନେଲେ। କୌଣସି କର୍ମୀଙ୍କ କଥା ରହିଲାନି। ବିଜେଡି ଯେହେତୁ ଭାଙ୍ଗିଯାଉଛି ତାକୁ ବଞ୍ଚାଇବାକୁ ଅତନୁ ବାବୁ ଏଭଳି କହିଛନ୍ତି।'
ସେପଟେ ଜୟନାରାୟଣଙ୍କୁ କାଉଣ୍ଟର କରି ବିଜେଡି ନେତା ଧୃବ ସାହୁ କହିଛନ୍ତି ଯେ, "ବିଜେପିର ୪ମାସ ସରକାର ଏବେ ବି ଆଇସିୟୁରେ ଅଛି। ତେଣୁ ଜନସାଧାରଣ କହିବେ ଏ ଦଳର ଭବିଷ୍ୟତ କ'ଣ ?"
ଦଳବଦଳ ବୟାନବାଜିକୁ ନେଇ ସରଗରମ ଅଛି ରାଜ୍ୟ ରାଜନୀତି। ମୁନା ଖାଁ, ଦେବାଶିଷ ସାମନ୍ତରାୟଙ୍କ ପରେ ବିତର୍କରେ ସାମିଲ ହୋଇଥିଲେ ବିଜେଡିର ବରିଷ୍ଠ ନେତା ଅତନୁ ସବ୍ୟସାଚୀ ନାୟକ। କହିଥିଲେ ବିଜେଡି ପୁଣି ସରକାରକୁ ଫେରିବା ନେଇ ଯୋଜନା କରୁଛି । କଂଗ୍ରେସକୁ ସାଥିରେ ନେଇ ବିଜେଡି ସରକାର ଗଢ଼ିବ ଏବଂ ସ୍ଵାଧୀନ ବିଧାୟକ ସମର୍ଥନ କରିବେ। ଅତନୁଙ୍କ ମନ୍ତବ୍ୟ ଉପରେ ଆଜି ଟିପ୍ପଣୀ କରିଛନ୍ତି ଜୟନାରାୟଣ। ତେବେ ରାଜ୍ୟରେ କଣ ସତରେ ବିଜେଡି ସରକାରକୁ ଫେରିବ, ତାହା ସମୟ କହିବ।
