ଭୁବନେଶ୍ୱର, ୨୭/୦୪: କଳିଙ୍ଗ ସୁପର କପ୍ରେ ମୋହନ ବାଗାନ ଏସ୍ସି ଓ ଏଫ୍ସି ଗୋଆ ଆଧିପତ୍ୟ ଜାରି ରଖି ସେମି ଫାଇନାଲ୍ରେ ପ୍ରବେଶ କରିଛନ୍ତି । କଳିଙ୍ଗ ଷ୍ଟାଡିୟମରେ ଶନିିବାର ଅନୁଷ୍ଠିତ ପ୍ରଥମ କ୍ୱାର୍ଟର ଫାଇନାଲ୍ରେ ମୋହନ ବାଗାନ ୨-୧ ଗୋଲ୍ରେ କେରଳ ବ୍ଲାଷ୍ଟର୍ସକୁ ଏବଂ ଦ୍ୱିତୀୟ କ୍ୱାର୍ଟରରେ ଏଫ୍ସି ଗୋଆ ୨-୧ ଗୋଲ୍ରେ ପଞ୍ଜାବ ଏଫ୍ସିକୁ ପରାସ୍ତ କରିଥିଲା ।
ମୋହନ ବାଗାନ ବନାମ କେରଳ ବ୍ଲାଷ୍ଟର୍ସ: ଏହି ମ୍ୟାଚ୍ କଡ଼ା ସଂଘର୍ଷପୂର୍ଣ୍ଣ ହୋଇଥିଲା । ମୋହନ ବାଗାନ ଆରମ୍ଭରୁ ଘନଘନ ଆକ୍ରମଣ କରି ୨୨ମିନିଟ୍ରେ ଗୋଲ୍ ଖାତା ଖୋଲିଥିଲା । ଦଳ ପକ୍ଷରୁ ସହଲ ଅବଦୁଲ ସମଦ ଏହି ଗୋଲ୍ଟି ଦେଇଥିଲେ । ଏହି ଭାଗରେ କେରଳ ଗୋଲ୍ ପରିଶୋଧ କରିପାରି ନଥିଲା । ଦ୍ୱିତୀୟାର୍ଦ୍ଧ ଖେଳ ଆରମ୍ଭରୁ ସୁହେଲ ଅହମ୍ମସ ଭଟ (୫୧ମିନିଟ୍)ଙ୍କ ଗୋଲ୍ ବଳରେ ମୋହନ ବାଗାନ ୨-୦ରେ ଅଗ୍ରଣୀ ହାସଲ କରିଥିଲା ।
ଏହାପରେ କେରଳ ମ୍ୟାଚ୍କୁ ଫେରିବା ପାଇଁ ସବୁ ଶକ୍ତ ଲଗାଇ ଦେଇଥିଲା । ମାତ୍ର ନିର୍ଦ୍ଧାରିତ ସମୟ ମଧ୍ୟରେ ଦଳ ଗୋଲ୍ କରିବାରେ ବିଫଳ ହୋଇଥିଲା । ଇନ୍ଜ୍ୟୁରୀ ଟାଇମ୍ରେ କେରଳ ପକ୍ଷରୁ ଶ୍ରୀକୁଟ୍ଟନ ଏମ୍ଏସ୍ ଗୋଟିଏ ଗୋଲ୍ ପରିଶୋଧ କରିବାରେ ସଫଳ ହୋଇଥିଲେ ।
ଏଫ୍ସି ଗୋଆ ବନାମ ପଞ୍ଜାବ ଏଫ୍ସି: ମ୍ୟାଚ୍ ତୀବ୍ର ପ୍ରତିଦ୍ୱନ୍ଦ୍ୱୀତାମୂଳକ ହୋଇଥିଲା । ଇନ୍ଜ୍ୟୁରୀ ଟାଇମ୍ରେ ମହମ୍ମଦ ୟାସିର ଗୋଟିଏ ଦର୍ଶନୀୟ ଗୋଲ୍ କରି ଗୋଆ ବିଜୟରେ ହିରୋ ସାଜିଥିଲେ ।
ପ୍ରଥମାର୍ଦ୍ଧ ଖେଳ ଆକ୍ରମଣ ଓ ପ୍ରତିଆକ୍ରମଣ ମଧ୍ୟରେ ଗୋଲଶୂନ୍ୟ ରହିଥିଲା । ଦ୍ୱିତୀୟାର୍ଦ୍ଧରେ ପଞ୍ଜାବ ଆକ୍ରମଣ ଜୋରଦାର କରି ଖାତା ଖୋଲିଥିଲା । ୫୭ମିନିଟ୍ରେ ଏନ୍. ଏଜେକୁଇଲ ଭିଡାଲ ଏହି ଗୋଲ୍ ସ୍କୋର କରିଥିଲେ । ଏହାପରେ ଗୋଆ ଗୋଲ୍ ପରିଶୋଧ ପାଇଁ ଘନଘନ ଆକ୍ରମଣ ଜାରି ରଖିଥିଲା । ୮୮ମିନିଟ୍ ପର୍ଯ୍ୟନ୍ତ ପଞ୍ଜାବ ଅଗ୍ରଣୀ ବଜାୟ ରଖିଥିଲା । ୮୯ମିନିଟ୍ରେ ବୋର୍ଜା ହେରେରା ଗୋଞ୍ଜାଲେଜଙ୍କ ଗୋଲ୍ ବଳରେ ଗୋଆ ସ୍ଥିତି ୧-୧ରେ ବରାବର କରିଥିଲା । ମାତ୍ର ଇନ୍ଜ୍ୟୁରୀ ଟାଇମ୍ରେ ୟାସିର ଆଉ ଏକ ଗୋଲ୍ କରି ଗୋଆକୁ ସେମିରେ ପହଞ୍ଚାଇଥିଲେ ।
