ଭୁବନେଶ୍ୱର,୨୬/୦୪: କଳିଙ୍ଗ ସୁପର କପ୍ରେ ଆଜିଠୁ କ୍ୱାର୍ଟର ଫାଇନାଲ ଖେଳାଯିବ । ଆଜି ୨ଟି ମ୍ୟାଚ୍ ରହିଛି । ପ୍ରଥମ ମ୍ୟାଚ୍ କେରଳ ବ୍ଲାଷ୍ଟର୍ସକୁ ମୋହନ ବାଗାନ ଏସ୍ଜି ଏବଂ ଦ୍ୱିତୀୟ ମ୍ୟାଚ୍ ଏଫ୍ସି ଗୋଆକୁ ପଞ୍ଜାବ ଭେଟିବ ।
ଆଇ-ଲିଗ୍ ଦଳ ଚର୍ଚ୍ଚିଲ ବ୍ରଦର୍ସ ଓହରି ଯିବାରୁ ଆଇଏସ୍ଏଲ୍ ଚାମ୍ପିଅନ ମୋହନ ବାଗାନ ବାଇ ପାଇ ସିଧାସଳଖ କ୍ୱାର୍ଟର ଫାଇନାଲରେ ପ୍ରବେଶ କରିଥିଲା । ତେଣୁ ପ୍ରି-କ୍ୱାର୍ଟର ମ୍ୟାଚ୍ ଦଳ ଖେଳି ନଥିଲା । କିନ୍ତୁ କେରଳ ବ୍ଲାଷ୍ଟର୍ସ ୨-୦ ଗୋଲରେ ଇଷ୍ଟ୍ ବେଙ୍ଗଲକୁ ପରାସ୍ତ କରି କ୍ୱାର୍ଟରକୁ ଉନ୍ନୀତ ହୋଇଥିଲା । ଆଇଏସ୍ଏଲରେ ମୋହନ ବାଗାନର ପ୍ରଦର୍ଶନ ବେଶ ଉନ୍ନତ ରହିଥିଲା । ଦଳ ଲିଗ୍ ପର୍ଯ୍ୟାୟରେ ଟେବୁଲ ଟପ୍ପର ହେବା ସହ ଶେଷରେ ଚାମ୍ପିଅନ ହୋଇଥିଲା । ତଥାପି କେରଳ ବ୍ଲାଷ୍ଟର୍ସର ଶ୍ରେଷ୍ଠ ପ୍ରଦର୍ଶନ ଦେଇ ସେମି ଫାଇନାଲରେ ପ୍ରବେଶ କରିବାକୁ ଲକ୍ଷ୍ୟ ରଖିଛି । ମ୍ୟାଚ୍ ସଂଘର୍ଷପୂର୍ଣ୍ଣ ହେବ ବୋଲି ଆଶା କରାଯାଉଛି ।
ସେମିତି ଦ୍ୱିତୀୟ କ୍ୱାର୍ଟରରେ ଗୋଆ ଓ ପଞ୍ଜାବ ମୁହାଁମୁହିଁ ହେବେ । ପ୍ରି-କ୍ୱାର୍ଟରରେ ଗୋଆ ୩-୦ ଗୋଲରେ ଆଇ-ଲିଗ୍ ଦଳ ଗୋକୁଳମ କେରଳକୁ ପରାଜିତ କରିଥିଲା । ସେହିପରି ପଞ୍ଜାବ ଘରୋଇ ଓଡ଼ିଶା ଏଫ୍ସି ଦଳକୁ ହରାଇଥିଲା । ଉଭୟ ଦଳ ପୂର୍ବ ମ୍ୟାଚ୍ରେ ୩ଟି ଲେଖାଏଁ ଗୋଲ୍ ଦେବାରେ ସଫଳ ହୋଇଥିଲେ । ଦୁଇ ଦଳ ନିଜ ନିଜର ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରସ୍ତୁତ ରହିଛନ୍ତି ।
୨୭ ତାରିଖରେ ତୃତୀୟ କ୍ୱାର୍ଟର ଇଣ୍ଟର କାଶୀ ଓ ମୁମ୍ବାଇ ସିଟି ଏବଂ ଅନ୍ତିମ କ୍ୱାର୍ଟର ନର୍ଥଇଷ୍ଟ୍ ୟୁନାଇଟେଡ୍ ଓ ଜାମସେଦପୁର ମଧ୍ୟରେ ଖେଳାଯିବ । ଆସନ୍ତା ୩୦ରେ ସେମି ଫାଇନାଲ ଏବଂ ମେ’ ୩ ତାରିଖରେ ଟାଇଟଲ ଲଢ଼େଇ ହେବ ।
