ଭୁବନେଶ୍ୱର ୨୭/୧୦: କାର୍ତ୍ତିକ ପୂର୍ଣ୍ଣିମା ଦିନ ସ୍ନାନ, ଦାନ ଓ ଭଗବାନ ହରି -ହରଙ୍କୁ ପୂଜା କରିବା ଦ୍ୱାରା ସମୃଦ୍ଧି, ଶାନ୍ତି ଓ ସଫଳତା ପ୍ରାପ୍ତ ହୋଇଥାଏ । ପୁରାଣ ଅନୁସାରେ, ପ୍ରତ୍ୟେକ ମାସର ପୂର୍ଣ୍ଣିମା ତିଥି ଅତ୍ୟନ୍ତ ଶୁଭ ଓ ପବିତ୍ରତା ବହନ କରିଥାଏ । ଏହି ଦିନ ଭଗବାନ୍ ବିଷ୍ଣୁ ଓ ମାତା ଲକ୍ଷ୍ମୀଙ୍କୁ ବିଶେଷ ପୂଜାର୍ଚ୍ଚନା କରିବାର ବିଧାନ ରିହଛି । ଏହା ସହିତ ପୂର୍ଣ୍ଣିମା ଦିନ ସତ୍ୟନାରାୟଣଙ୍କ କଥା ଶୁଣିଲେ ଓ ଦାନ ପୂଣ୍ଣ୍ୟ କଲେ ବ୍ୟକ୍ତିକୁ ଅକ୍ଷୟ ଫଳ ପ୍ରାପ୍ତ ହୋଇଥାଏ ।
ବର୍ଷକ ୧୨ ମାସର ପୂର୍ଣ୍ଣିମା ମଧ୍ୟରୁ କାର୍ତ୍ତିକ ପୂର୍ଣ୍ଣିମାର ମହତ୍ତ୍ୱ ଅଧିକ ବୋଲି ବର୍ଣ୍ଣନା ରହିଛି । ଏହି ତିଥିରେ୍ ଲକ୍ଷ୍ମୀ-ନାରାୟଣଙ୍କ ସହିତ ଶିବଙ୍କୁ ବି ବିଶେଷ ପୂଜାର୍ଚ୍ଚନା କରାଯାଏ। ଚଳିତ ବର୍ଷ ନଭେମ୍ଭର ୫ ତାରିଖ ବୁଧବାର କାର୍ତ୍ତିକ ପୂର୍ଣ୍ଣିମା ପଡୁଛି । ଏହି ଦିନ ଶ୍ରଦ୍ଧାଳୁ ଗଙ୍ଗା ସ୍ନାନ, ଦାନ ଓ ଶ୍ରୀବିଷ୍ଣୁଙ୍କୁ ଆରାଧନା କଲେ ଅତ୍ୟନ୍ତ ପୁଣ୍ୟ ଫଳ ପ୍ରାପ୍ତି ହୋଇଥାଏ। କୌଣସି ଶୁଭ କାର୍ଯ୍ୟ କାର୍ତ୍ତିକ ପୂର୍ଣିମା ଦିନ ଆରମ୍ଭ କଲେ,ତାହା ଅଚିରେ ଫଳପ୍ରାପ୍ତ ହୋଇଥାଏ ।
ଜ୍ୟୋତିଷ ଶାସ୍ତ୍ର ଅନୁସାରେ, ଶହେ ବର୍ଷ ପରେ ଚଳିତ ବର୍ଷ କାର୍ତ୍ତିକ ପୂର୍ଣ୍ଣମାରେ ଦୁର୍ଲ୍ଲଭ ଯୋଗ ପଡୁଛି । ଏହି ଦିନ ସିଦ୍ଧି ଯୋଗ, ଅମୃତ ସିଦ୍ଧି ଯୋଗ, ଅଶ୍ୱିନୀ ନକ୍ଷତ୍ରର ବିଶେଷ ସଂଯୋଗ ରହିଛି । ଧାର୍ମିକ ଦୃଷ୍ଟିରୁ ଏହି ଦିନକୁ ଅତ୍ୟନ୍ତ ଶୁଭ ଫଳଦାୟକ ବିଶ୍ୱାସ କରାଯାଉଛି । ଶାସ୍ତ୍ରରେ ବର୍ଣ୍ଣିତ ରହିଛି କାର୍ତ୍ତିକ ପୂର୍ଣ୍ଣିମା ଦିନ ଭଗବାନ୍ ଶିବ ତ୍ରିପୁରାସୁରକୁ ବଧ କରିଥିଲେ । ଏଥିପାଇଁ ଏହି ତିଥିକୁ ତ୍ରିପୁରୀ ପୂର୍ଣ୍ଣିମା ତଥା ତ୍ରିପୁରାରୀ ପୂର୍ଣ୍ଣିମା ମଧ୍ୟ କୁହାଯାଏ ।
