ନୂଆଦିଲ୍ଲୀ,୨୬।୨: ବିବାଦୀୟ ଚଳଚ୍ଚିତ୍ର ‘ଦ କେରଳ ଷ୍ଟୋରୀ ୨: ଗୋଜ୍ ବିୟଣ୍ଡ‘ ର ନିର୍ମାତାଙ୍କୁ କେରଳ ହାଇକୋର୍ଟରୁ ଲାଗିଛି ବଡ଼ ଝଟକା। କୋର୍ଟ ଚଳଚ୍ଚିତ୍ର ଉପରେ ଅନ୍ତରୀଣ ରହିତାଦେଶ ଜାରି କରିଛନ୍ତି। କୋର୍ଟ ସେଣ୍ଟ୍ରାଲ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ୍(CBFC)କୁ ଆବେଦନକାରୀଙ୍କ ଆବେଦନ ଉପରେ ବିଚାର କରିବାକୁ ଏବଂ ଆଗାମୀ ଦୁଇ ସପ୍ତାହ ମଧ୍ୟରେ ଏହି ମାମଲାର ନିଷ୍ପତ୍ତି ନେବାକୁ ନିର୍ଦ୍ଦେଶ ଦେଇଛନ୍ତି। ଫିଲ୍ମ ବିରୋଧରେ କୋର୍ଟରେ ତିନୋଟି ଆବେଦନ ଦାଖଲ କରାଯାଇଥିଲା, ଯେଉଁଥିରେ ଏହାର ସେନ୍ସର ପ୍ରମାଣପତ୍ର ପ୍ରତ୍ୟାହାର କରିବା ଏବଂ ଏହାର ରିଲିଜକୁ ବନ୍ଦ କରିବା ପାଇଁ ଦାବି କରାଯାଇଥିଲା। ଫିଲ୍ମଟି ଆସନ୍ତାକାଲି ଅର୍ଥାତ ୨୬ ଫେବୃଆରୀରେ ହଲରେ ରିଲିଜ ହେବାର ଥିଲା, କିନ୍ତୁ ଆଜି କେରଳ ହାଇକୋର୍ଟ ଏହାର ରିଲିଜ୍ ଉପରେ ଅନ୍ତରୀଣ ରହିତାଦେଶ ଲଗାଇଛନ୍ତି।
ଆବେଦନକାରୀଙ୍କ କହିବା ଅନୁସାରେ, ଫିଲ୍ମରେ କେରଳ ରାଜ୍ୟକୁ ଭୁଲ ଭାବରେ ଚିତ୍ରଣ କରାଯାଇଛି। ଏହାର ରିଲିଜ୍ ସାମ୍ପ୍ରଦାୟିକ ସ୍ଥିତିକୁ ବିଗାଡିପାରେ। ଜଷ୍ଟିସ୍ କୁରିୟନ୍ ଥୋମାସ୍ଙ୍କ ଏକକ ଖଣ୍ଡପୀଠ ଏହି ମାମଲାରେ ଶୁଣାଣୀ କରି କହିଛନ୍ତି,ପ୍ରଥମ ନଜରରୁ ଲାଗୁଛି ସିବିଏଫ୍ସି ଫିଲ୍ମକୁ ସାର୍ଟିଫିକେଟ୍ ଦେବା ସମୟରେ ବୁଝିବିଚାରି କାମ କରିନି। ତେଣୁ କୋର୍ଟ ଦୁଇ ସପ୍ତାହ ମଧ୍ୟରେ ଆବେଦନକାରୀଙ୍କ ଦ୍ୱାରା ଦାଖଲ କରାଯାଇଥିବା ରିଭିଜନ୍ ପିଟିସନ୍ ଉପରେ ବିଚାର କରିବାକୁ CBFCକୁ ନିର୍ଦ୍ଦେଶ ଦେଇଛନ୍ତି। ଯେଉଁ ପର୍ଯ୍ୟନ୍ତ ସିବିଏଫ୍ସି ନୂତନ ନିର୍ଦ୍ଦେଶ ଜାରି କରିନାହିଁ, ସେ ପର୍ଯ୍ୟନ୍ତ କୋର୍ଟ ଫିଲ୍ମର ରିଲିଜ୍ ଉପରେ ସ୍ଥଗିତାଦେଶ ବଜାୟ ରଖିଛନ୍ତି। ଶୁଣାଣି ସମୟରେ, ହାଇକୋର୍ଟ କହିଥିଲେ ଯେ ସାଧାରଣତଃ ଏକ ଫିଲ୍ମ ରିଲିଜ୍ରେ ହସ୍ତକ୍ଷେପ କରନ୍ତି ନାହିଁ, କିନ୍ତୁ ଯେତେବେଳେ ଫିଲ୍ମରେ କଣ୍ଟେଣ୍ଟରେ ସାମ୍ପ୍ରଦାୟିକ ସଦ୍ଭାବନାକୁ ବାଧା ଦେବାର ସମ୍ଭାବନା ଥାଏ, ସେତେବେଳେ ହସ୍ତକ୍ଷେପ କରିବାକୁ ପଡିଥାଏ।
ଗତ କାଲି ଅର୍ଥାତ୨୫ ଫେବୃଆରୀରେ ଶୁଣାଣି ସମୟରେ, କୋର୍ଟ ସ୍ପଷ୍ଟ କରିଥିଲେ ଯେ ସମସ୍ତ ପକ୍ଷଙ୍କୁ ଶୁଣିବା ପର୍ଯ୍ୟନ୍ତ ଫିଲ୍ମର ରିଲିଜକୁ ସ୍ଥଗିତ ରଖାଯାଇପାରିବ। ଶୁଣାଣି ବିଚାରାଧୀନ ଅଛି, ଏବଂ ଯଦି ଫିଲ୍ମଟି ରିଲିଜ ହୁଏ, ତେବେ ଆବେଦନଟି ନିରର୍ଥକ ହୋଇଯିବ। ସେପେଟେ ‘କେରଳ ଷ୍ଟୋରୀ-୨’ ର ପ୍ରଯୋଜକ ବିପୁଲ ଶାହ କହିଛନ୍ତି ସେ କେରଳ ହାଇକୋର୍ଟର ରାୟ ବିରୁଦ୍ଧରେ ସୁପ୍ରିମକୋର୍ଟରେ ଆବେଦନ କରିବେ।
ଆହୁରି ପଢନ୍ତୁ :ସାତଜନ୍ମର ସାଥୀ ହେଲେ ବିଜୟ-ରଶ୍ମିକା;ତେଲୁଗୁ ରୀତିନୀତିରେ ସରିଲା ବିବାହ, ଛୁଟୁଛି ଶୁଭେଚ୍ଛାର ସୁଅ
