ମସ୍କୋ,୨୪/୧୨: ସିରିୟାର ପୂର୍ବତନ ରାଷ୍ଟ୍ରପତି ବଶର୍ ଅଲ୍ ଅସଦଙ୍କ ପତ୍ନୀ ଆସ୍ମା ଅଲ୍ ଅସଦ ଛାଡ଼ପତ୍ର ପାଇଁ ଆବେଦନ କରିଛନ୍ତି । ଜେରୁଜେଲମ ପୋଷ୍ଟ ମୁତାବକ, ସିରିୟାରୁ କ୍ଷମତାଚ୍ୟୁତ ହୋଇ ଅସଦ ରୁଷ୍ ପଳାୟନ କରିବା ପରେ ଆସ୍ମା ଚିନ୍ତିତ ହୋଇପଡ଼ିଛନ୍ତି । ରୁଷ୍ରେ ତାଙ୍କ ସହ ସେ ଆଦୌ ଖୁସି ନାହାନ୍ତି । ତେଣୁ ଛାଡ଼ପତ୍ର ନେବା ପରେ ସେ ବ୍ରିଟେନ୍ ଚାଲିଯିବାକୁ ଯୋଜନା କରୁଛନ୍ତି । ଦେଶ ଛାଡ଼ିବା ପାଇଁ ଆସ୍ମା ଇତିମଧ୍ୟରେ ରୁଷୀୟ ଅଦାଲତରେ ଆବେଦନ ବି କରିଛନ୍ତି ।
୪୯ ବର୍ଷୀୟା ଆସ୍ମା ୨୦୦୦ ମସିହାରେ ଅସଦଙ୍କୁ ବିବାହ କରିଥିଲେ । ତାଙ୍କ ପାଖରେ ବ୍ରିଟେନ୍ ଓ ସିରିୟାର ଦ୍ୱୈତ ନାଗରିକତା ରହିଛି। ୧୯୭୫ରେ ଲଣ୍ଡନରେ ତାଙ୍କର ଜନ୍ମ ହୋଇଥିଲା । ତାଙ୍କ ପିତାମାତା ସିରିୟାର । ସେ ଲଣ୍ଡନର କିଙ୍ଗ୍ସ କଲେଜରେ କମ୍ପ୍ୟୁଟର ସାଇନ୍ସ ଏବଂ ଫ୍ରେଞ୍ଚ୍ ଲିଟରେଚରରେ ଡିଗ୍ରୀ ହାସଲ କରିଥିଲେ । ଅସଦ ଓ ଆସ୍ମାଙ୍କର ୩ଟି ସନ୍ତାନ ଅଛନ୍ତି । ସେମାନେ ହେଉଛନ୍ତି ହାଫିଜ, ଜିନ୍ ଓ କରିମ୍ । ଆସ୍ମା ନିଜର ୩ ପିଲାଙ୍କ ସହ ଲଣ୍ଡନରେ ରହିବାକୁ ଚିନ୍ତା କରୁଛନ୍ତି ।
ଡିସେମ୍ବର ୮ରେ ସିରିୟା ରାଜଧାନୀ ଡାମାସ୍କସ୍ ଉପରେ ବିଦ୍ରୋହୀମାନେ କବ୍ଜା କରିଥିଲେ । ଏହାପରେ ଅସଦ ଦେଶ ଛାଡି଼ ସପରିବାର ପଳାୟନ କରିଥିଲେ । ରୁଷ୍ ସେମାନଙ୍କୁ ଶରଣ ଦେଇଥିଲା । ବର୍ତ୍ତମାନ ସେମାନେ ରାଜଧାନୀ ମସ୍କୋରେ ରହୁଛନ୍ତି । ରୁଷ୍ ଯଦିଓ ସେମାନଙ୍କୁ ରହିବାକୁ ଅନୁମତି ଦେଇଛି, କିନ୍ତୁ ସେମାନଙ୍କୁ ଅନେକ କଟକଣାର ସାମ୍ନା କରିବାକୁ ପଡୁଛି । ମସ୍କୋ ଛାଡ଼ିବା ଏବଂ କୌଣସି ରାଜନୈତିକ କାର୍ଯ୍ୟକଳାପରେ ସାମିଲ ହେବାକୁ ଅସଦଙ୍କୁ ବାରଣ କରାଯାଇଛି । ରୁଷୀୟ ଅଧିକାରୀମାନେ ତାଙ୍କ ସମ୍ପତ୍ତିକୁ ବି ଜବତ କରିନେଇଛନ୍ତି । ଏଥିରେ ୨୭୦ କିଲୋଗ୍ରାମ ସୁନା, ୨୦୦ କୋଟି ଡଲାର ଏବଂ ମସ୍କୋରେ ୧୮ଟି ଆପାର୍ଟମେଣ୍ଟ ଅନ୍ତର୍ଭୁକ୍ତ । ତୁର୍କୀ ଗଣମାଧ୍ୟମ ମୁତାବକ, ଅସଦ ମଧ୍ୟ ରୁଷ୍ ଛାଡ଼ି ବ୍ରିଟେନ୍ ଚାଲିଯିବାକୁ ଚାହୁଁଛନ୍ତି । ଅନ୍ୟପକ୍ଷରେ ଅସଦଙ୍କ ଭାଇ ମହେରଙ୍କୁ ଏ ପର୍ଯ୍ୟନ୍ତ ଶରଣ ଦେଇନାହିଁ ରୁଷ୍ । ସେଠାକାର ସରକାର ଏ ନେଇ ତଦନ୍ତ ଚଳାଇଛନ୍ତି । ତେବେ ବର୍ତ୍ତମାନ ସେ କେଉଁଠାରେ ଅଛନ୍ତି, ତାହା ନେଇ ସୂଚନା ମିଳିନାହିଁ ।
ସୂତ୍ର ମୁତାବକ, ଅସଦ ରୁଷ୍କୁ ୨୫୦ ନିୟୁତ ଡଲାର (୨,୦୮୨ କୋଟି ଟଙ୍କା) ନଗଦ ପଠାଇଛନ୍ତି । ରିପୋର୍ଟରେ କୁହାଯାଇଛି ଯେ ଏହି ଦେଣନେଣରେ ୧୦୦ ଡଲାର ଓ ୫୦୦ ୟୁରୋ ନୋଟ ରହିଥିଲା । ଏହାର ଓଜନ ପ୍ରାୟ ୨ ଟନ୍ ଥିଲା । ଏହାକୁ ୨୦୧୮ ଓ ୨୦୧୯ ମଧ୍ୟରେ ଡାମାସକସ୍ରୁ ମସ୍କୋର ଭାନୁକୋଭା ବିମାନବନ୍ଦରକୁ ପଠାଯାଇଥିଲା । ଏହି ନଗଦ ପଠାଇବା ପାଇଁ ୨୧ଟି ବିମାନ ବ୍ୟବହୃତ ହୋଇଥିଲା । ମସ୍କୋରେ ପହଞ୍ଚିବା ପରେ ଏହାକୁ ରୁଷୀୟ ବ୍ୟାଙ୍କଗୁଡ଼ିକରେ ଜମା କରାଯାଇଥିଲା । ରିପୋର୍ଟ ମୁତାବକ, ଅସଦ ସରକାରଙ୍କ ଉପରେ ପାଶ୍ଚାତ୍ୟ ଦେଶଗୁଡ଼ିକ ପ୍ରତିବନ୍ଧକ ଲଗାଇଥିଲେ । ତେଣୁ ସେ ଡଲାର ଓ ୟୁରୋ ବ୍ୟବହାର କରିପାରି ନ ଥିଲେ । ଏହାକୁ ସେ ରୁଷ୍ରେ ବ୍ୟବହାର ପାଇଁ ନିଷ୍ପତ୍ତି ନେଇଥିଲେ ।
