ଲସ୍ ଏଞ୍ଜେଲସ,୧୧/୦୧: କାଲିଫର୍ଣ୍ଣିଆରେ ନିଆଁ ଦିନକୁ ଦିନ ଭୟଙ୍କର ରୂପ ନେଉଛି । ଆଖି ଆଗରେ ଗଛ, ଲତା, ଘର ଏବଂ ଆବାସପତ୍ର ସବୁ କିଛି ପୋଡ଼ି ଛାରଖାର ହୋଇଯାଉଛି । ଏହି ନିଆଁ ଗ୍ରାସ କରି ଦେଇଛି ଆମେରିକାର କିମ୍ବଦନ୍ତୀ ସୁଇମର ଗ୍ୟାରୀ ହଲ ଜୁନିୟରଙ୍କର ୧୦ ଅଲିମ୍ପିକ୍ସ ପଦକ ଏବଂ ୬ଟି ବିଶ୍ୱ ଚାମ୍ପିଅନସିପ୍ ପଦକ ।
ଅତି ଦୁଃଖର ସହ ଗ୍ୟାରୀ କହିଛନ୍ତି, ‘ମୋ ଆଖି ଆଗରେ ସବୁ କିଛି ଜଳିଗଲା କିନ୍ତୁ ମୁଁ କିଛି କରିପାରିଲି ନାହିଁ । ଭାବୁଥିଲି ଘରୁ ପଦକ ଆଣିବାର ଯଥେଷ୍ଟ ସମୟ ମୋ ପାଖରେ ଅଛି । କିନ୍ତୁ ପାହାଡ଼ରୁ ଯେମିତି ନିଆଁ ମାଡ଼ି ଆସୁଥିଲା ତାହା ଅତି ଭୟଙ୍କର ଥିଲା । କେବଳ ଗୋଟିଏ ପେଣ୍ଟିଂ ସହ ମୋ ଗାଡ଼ିକୁ ନେଇ ଫେରି ଆସିଲି । ଏତିକିବେଳେ ଆକାଶରୁ ଅଗ୍ନି ପିଣ୍ଡୁଳା ବର୍ଷା ହେଉଥିଲା । ମୋ ଶୋଇବା କୋଠରୀରେ ସବୁ ପଦକ ଥିଲା । ଯାହା ମୋଠାରୁ ମାତ୍ର ୭୦ ମିଟର ଦୂରରେ ରହିଥିଲା । କିନ୍ତୁ ମୋ ପାଖରେ ସମୟ ନଥିଲା ଯାଇ ପଦକ ଆଣିବାକୁ । ୩ ମିନିଟ ମଧ୍ୟରେ ପାହାଡ଼ ଉପରୁ ନିଆଁ ଆସି ସବୁ କିଛି ଗ୍ରାସ କରି ପକାଇଲା ।’
