ନୂଆଦିଲ୍ଲୀ: ପାକିସ୍ତାନର ଲାହୋର ଏବଂ ଅନ୍ୟାନ୍ୟ ଅଂଶରେ ବିଷାକ୍ତ ଧୂଆଁ ବ୍ୟାପିବାରେ ଲାଗିଛି। ଏହି ଧୂଆଁ ଏକ ନୂତନ ସ୍ୱାସ୍ଥ୍ୟ ସଙ୍କଟ ସୃଷ୍ଟି କରିଛି । ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ୧୫ ହଜାରରୁ ଅଧିକ ଲୋକ ଶ୍ୱାସକ୍ରିୟା ଏବଂ ଭାଇରାଲ ସଂକ୍ରମଣର ଶିକାର ହୋଇଛନ୍ତି।

ଗଣମାଧ୍ୟମ ଅନୁଯାୟୀ, ଲାହୋରର ଡାକ୍ତରଖାନା ଗୁଡ଼ିକରେ ଶୁଖିଲା କାଶ, ଶ୍ୱାସକ୍ରିୟାରେ ଅସୁବିଧା, ନିମୋନିଆ ଏବଂ ଛାତି ସଂକ୍ରମଣରେ ପୀଡିତ ରୋଗୀମାନଙ୍କ ସଂଖ୍ୟା ବଢିବାରେ ଲାଗିଛି । ଏଠାରେ ଥିବା ପ୍ରମୁଖ ଡାକ୍ତରଖାନା ଗୁଡ଼ିକରେ ରୋଗୀଙ୍କ ସଂଖ୍ୟା ବେଳକୁ ବେଳ ବୃଦ୍ଧି ପାଉଛି । ଯାହା ସୂଚନା ରହିଛି ଚାରି ହଜାରରୁ ଅଧିକ ରୋଗୀ ମାୟୋ ହସ୍ପିଟାଲରେ, ୩୫ ଶହ ରୋଗୀ ଜିନ୍ନା ହସ୍ପିଟାଲରେ, ୩ ହଜାର ରୋଗୀ ଗଙ୍ଗାରାମ ହସ୍ପିଟାଲରେ ଏବଂ ଦୁଇ ହଜାରରୁ ଅଧିକ ରୋଗୀ ଅନ୍ୟାନ୍ୟ ହସ୍ପିଟାଲରେ ଚିକିତ୍ସିତ ଅଛନ୍ତି । 

ପାକିସ୍ତାନୀ ଡାକ୍ତର ଆଶରଫ ଜିଆ କହିଛନ୍ତି ଯେ ଆଜମା ଏବଂ ହୃଦଘାତରେ ପୀଡିତ ଶିଶୁ ଏବଂ ରୋଗୀଙ୍କ ପାଇଁ ଏହି ଧୂଆଁ ଅଧିକ ବିପଜ୍ଜନକ ହୋଇପାରେ। ବିଶେଷକରି ପିଲାମାନଙ୍କ ଉପରେ ଏହା ଅତ୍ୟନ୍ତ ଗମ୍ଭୀର ପ୍ରଭାବ ପକାଉଛି । ବିଷାକ୍ତ ଧୂଆଁ ବିଭିନ୍ନ ଭାଇରାଲ୍ ରୋଗ ଯଥା ନିମୋନିଆ ଏବଂ ଚର୍ମ ରୋଗରେ ବୃଦ୍ଧି ଘଟାଇଛି । ବର୍ତ୍ତମାନ ଲାହୋରରେ ଦଶରୁ ଅଧିକ ଭାଇରାଲ ରୋଗ ବ୍ୟାପିଛି ।

ବିଷାକ୍ତ ଧୂଆଁର ମୁକାବିଲା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି। ଏଥିମଧ୍ୟରେ ବିବାହ ଉପରେ ତିନିମାସ ବ୍ୟାନ, ପରିବହନ ବିଭାଗ ଦ୍ବାରା ନୂତନ ନିର୍ଦ୍ଦେଶାବଳୀ ଜାରି ଏବଂ ପଞ୍ଜାବ ପ୍ରଦେଶର ସ୍କୁଲ ଏବଂ କଲେଜ ଗୁଡିକୁ ବନ୍ଦ ନିର୍ଦ୍ଦେଶ ଦିଆଯାଇଛି । ନାସା ଏହି ବିଷାକ୍ତ କୁହୁଡ଼ିର ଚିତ୍ର ମଧ୍ୟ ସେୟାର କରିଛି, ଯେଉଁଥିରେ ଉତ୍ତର ପାକିସ୍ଥାନ ଉପରେ ଏକ ଘନ କୁହୁଡ଼ି ସ୍ତର ଦୃଶ୍ୟମାନ ହେଉଛି ।