ଜମ୍ମୁ,୦୭/୧୦: କୋଣାର୍କ ସୂର୍ଯ୍ୟସ ଓଡ଼ିଶା ଲିଜେଣ୍ଡସ ଲିଗ୍ରେ ଅର୍ବାନାଇଜର୍ସ ହାଇଦ୍ରାବାଦ ଠାରୁ ୪ ୱିକେଟ୍ରେ ପରାଜିତ ହୋଇଛି । ପ୍ରଥମେ ବ୍ୟାଟିଂ କରି କୋଣାର୍କ ନିର୍ଦ୍ଧାରିତ ଓଭରରେ ୯ ୱିକେଟ୍ ହରାଇ ୧୦୦ ରନ୍ କରିଥିଲା । ଜବାବରେ ହାଇଦ୍ରାବାଦ ୧୮.୨ ଓଭରରେ ୬ ୱିକେଟ୍ ହରାଇ ବିଜୟୀ ହୋଇଥିଲା ।
ହାଇଦ୍ରାବାଦ ଅଧିନାୟକ ଗୁରକୀରତ ସିଂ ପ୍ରଥମେ ଟସ୍ ଜିତି ଫିଲ୍ଡିଂ କରିଥିଲେ । କୋଣାର୍କ ସୂର୍ଯ୍ୟସ ମାତ୍ର ୩୦ ରନ୍ ମଧ୍ୟରେ ପ୍ରାରମ୍ଭିକ ୩ଟି ୱିକେଟ୍ ହରାଇ ସଙ୍କଟରେ ପଡ଼ିଥିଲା । ଓପନର ରିଚାର୍ଡ ଲେବି ୧, ଜେସ୍ ରାଇଡର ୧୧ ଏବଂ କେଭିନ ଓ’ବ୍ରାଏନ ୫ ରନ୍ କରି ଆଉଟ୍ ହୋଇଥିଲେ ।
ଦିଲସାନ ମୁନାବୀରା ଯଦିଓ ମଧ୍ୟଭାଗରେ ଅର୍ଦ୍ଧଶତକୀୟ ଇନିଂସ (୫୧) ଖେଳିଥିଲେ କିନ୍ତୁ ଅନ୍ୟମାନେ ବିଫଳ ହେବା ଯୋଗୁ କୋଣାର୍କ ମାତ୍ର ୧୦୦ ରନ୍ରେ ଅଟକି ଯାଇଥିଲା । ରାଜେଶ ବିଷ୍ଣୋଇ ୨, ଇରଫାନ ପଠାନ ୭, ୟୁସୁଫ ପଠାନ ୭ ଓ ଦିୱେଶ ପଠାନିଆ ୪ ରନ୍ କରିଥିଲେ ।
ସୀମିତ ବିଜୟ ଲକ୍ଷ୍ୟକୁ ପିଛା କରି ଅଧିନାୟକ ଗୁରକୀରତଙ୍କ (୫୦) ଅପରାଜିତ ଅର୍ଦ୍ଧଶତକୀୟ ଇନିଂସ ସହାୟତାରେ ଦଳ ବିଜୟୀ ହୋଇଥିଲା । ଜର୍ଜ ୱକର ୧୨, ଚଡୱିକ ୱାଲଟନ ୮, ପିଟର ଟ୍ରେଗୋ ୭ ରନ୍ କରିଥିଲେ । ଦିଲସାନ ୩ ୱିକେଟ୍ ହାସଲ କରିଥିଲେ ।
