ସମ୍ବଲପୁର,୨୦/୦୯: ଦିନକ ପରେ ପବିତ୍ର ମହାଳୟା । ଏହି ଅବସରରେ ମା’ ସମଲେଶ୍ୱରୀ ଧବଳମୁଖୀ ବେଶ ବା ଗଙ୍ଗାବେଶ ଧାରଣ କରିବେ । ମହାଳୟା ଉପଲକ୍ଷେ ରବିବାରରୁ ମଙ୍ଗଳବାର ପୂର୍ବାହ୍ନ ୧୧.୪୫ ପର୍ଯ୍ୟନ୍ତ ଅଢ଼େଇ ଦିନ ଧରି ମା’ଏହି ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ଏହାପରେ ପୁଣି ସିନ୍ଦୁରବର୍ଣ୍ଣା ରୂପ ଧାରଣ କରିବେ । ସବୁବର୍ଷ ଭଳି ଚଳିତବର୍ଷ ମଧ୍ୟ ମା’ଙ୍କ ଏହି ଦୁର୍ଲ୍ଲଭ ବେଶ ଦର୍ଶନ କରିବାକୁ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହେବା ସମ୍ଭାବନା ରହିଛି । ଏହାକୁ ନେଇ ପ୍ରସ୍ତୁତି ଜୋର୍ଦାର ଚାଲିଥିବା ମନ୍ଦିର ଟ୍ରଷ୍ଟ ବୋର୍ଡ ସଭାପତି ସଞ୍ଜୟ ବାବୁ କହିଛନ୍ତି ।
ଶ୍ରୀ ବାବୁଙ୍କ ସୂଚନାନୁସାରେ, ରବିବାର, ସୋମବାର ଏବଂ ମଙ୍ଗଳବାର ଭୋର ସାଢ଼େ ୪ଟାରୁ ମଙ୍ଗଳ ଆଳତି ହେବ । ସକାଳ ୫ଟାରେ ପ୍ରାତଃ ଦର୍ଶନ ଆରମ୍ଭ ହେବ । ଅନ୍ନଭୋଗ ପାଇଁ ପୂର୍ବାହ୍ନ ୧୧.୪୫ଟାରୁ ୧୨.୩୦ ଯାଏଁ ସାଧାରଣ ଦର୍ଶନ ବନ୍ଦ ରହିବ । ସେହିଭଳି ସନ୍ଧ୍ୟା ମହାଆଳତି ପାଇଁ ସନ୍ଧ୍ୟା ୭.୪୫ରୁ ରାତି ୮ଟା ୩୦ ଯାଏଁ ଦର୍ଶନ ବନ୍ଦ କରିବାକୁ ନିଷ୍ପତ୍ତି ହୋଇଛି । ରାତି ସାଢ଼େ ୧୦ଟାରେ ମନ୍ଦିର ପହୁଡ଼ ପଡ଼ିବ । ପୂର୍ବଥର ଭଳି ଏଥର ମଧ୍ୟ ସ୍ୱତନ୍ତ୍ର ଦର୍ଶନ ବ୍ୟବସ୍ଥା ରହିଛି । ଟ୍ରଷ୍ଟ ବୋର୍ଡ ପକ୍ଷରୁ ଧାର୍ଯ୍ୟ ପାଉଣା ଦେଇ ହାତୀ ଦ୍ୱାର ପାଖରେ ଶ୍ରଦ୍ଧାଳୁ ଦର୍ଶନ କରିପାରିବେ । ୪ନଂ. ଗେଟ୍ ଦେଇ ସାଧାରଣ ଧାଡ଼ି ଦର୍ଶନ ବ୍ୟବସ୍ଥା କରାଯାଇଛି । ମହାଳୟାରେ ସ୍ୱତନ୍ତ୍ର ନୀତିକାନ୍ତି ପାଇଁ ଭୋଗ ମଣ୍ଡପ ବନ୍ଦ ରହିବ । ସୋମବାର ଓ ମଙ୍ଗଳବାର ଅନ୍ନ ଭୋଗ ହେବ ବୋଲି ନିଷ୍ପତ୍ତି ହୋଇଛି । ମହାଳୟା ପାଇଁ ମା’ଙ୍କ ମନ୍ଦିର ପରିସର ସହ ବେଢ଼ାକୁ ସଫାସୁତୁରା କରାଯାଇଛି । ମନ୍ଦିର ଗମ୍ଭୀରା ପିତ୍ତଳ କବାଟ ସଫେଇ ହୋଇଛି । କଟକରୁ ଆସିଥିବା ତାରକସି କାରିଗରଙ୍କ ଦ୍ୱାରା ପରଭା ଓ ଛତରକୁ ସଫା କରାଯାଇଛି।
