• ମୃତ୍ୟୁ ପରେ ମଧ୍ୟ ମିଳେ ନାହିଁ ଶାନ୍ତି
  • କିଛିବର୍ଷରେ ପୁଣି ଖୋଳାଯାଏ କବର
  • କଙ୍କାଳ ସହିତ ସମ୍ପର୍କୀୟ କରନ୍ତି ନାଚ

ବ୍ୟୁରୋ ୧୩/୦୭ ; ଭାରତ ଭଳି ଦେଶରେ ଏପରି ପରମ୍ପରା ଅନେକଙ୍କୁ ଅସ୍ୱାଭାବିକ କିମ୍ବା ଭୟଙ୍କର ଲାଗିପାରେ। କିନ୍ତୁ ଆଫ୍ରିକା ମହାଦେଶର ଦ୍ୱୀପରାଷ୍ଟ୍ର ମାଡାଗାସ୍କରରେ ଏହା ଏକ ପ୍ରାଚୀନ, ସମ୍ମାନଜନକ ଓ ସାମାଜିକ ପରମ୍ପରା ଭାବେ ପାଳନ କରାଯାଏ। ସେଠାର ଲୋକମାନେ ମୃତ୍ୟୁକୁ ଜୀବନର ଶେଷ ବୋଲି ମନେ କରନ୍ତି ନାହିଁ। ବରଂ ଏହାକୁ ଜୀବନଚକ୍ରର ଏକ ପର୍ଯ୍ୟାୟ ଭାବେ ଦେଖନ୍ତି ଏବଂ ବିଶ୍ୱାସ କରନ୍ତି ଯେ ମୃତ୍ୟୁ ପରେ ମଧ୍ୟ ପୂର୍ବପୁରୁଷମାନଙ୍କ ଆତ୍ମା ପରିବାର ସହ ଜଡ଼ିତ ରହିଥାଏ।

ମାଡାଗାସ୍କରର ସବୁଠାରୁ ଅନନ୍ୟ ପରମ୍ପରା ମଧ୍ୟରୁ ଗୋଟିଏ ହେଉଛି 'ଫାମାଡିହାନା' ଯାହାକୁ 'ଅସ୍ଥି ଘୋଡ଼ାଇବା' ବୋଲି କୁହାଯାଏ। ଏହି ପରମ୍ପରାରେ ପରିବାର ସଦସ୍ୟମାନେ ପ୍ରତି ୫ରୁ ୭ ବର୍ଷରେ ଥରେ ନିଜ ପୂର୍ବପୁରୁଷଙ୍କ କବର ଖୋଳି ସେମାନଙ୍କ ଅସ୍ଥିକୁ ବାହାର କରନ୍ତି। ପରେ ସେହି ଅସ୍ଥିକୁ ନୂତନ ରେଶମୀ ବସ୍ତ୍ରରେ ଗୁଡ଼ାଇ ଘରକୁ ଆଣନ୍ତି। ସେଠାରେ ସଙ୍ଗୀତ, ନୃତ୍ୟ, ଭୋଜି ଓ ପାରିବାରିକ ମିଳନର ଆୟୋଜନ କରାଯାଏ। ଉତ୍ସବ ଶେଷ ହେବା ପରେ ପୁଣି ଅସ୍ଥିଗୁଡ଼ିକୁ ସମ୍ମାନର ସହ କବରରେ ରଖାଯାଏ।

ମାଡାଗାସ୍କରର ଆଦିବାସୀ ଲୋକମାନଙ୍କର ବିଶ୍ୱାସ ଅନୁଯାୟୀ, ମୃତ୍ୟୁ ପରେ ଜଣେ ବ୍ୟକ୍ତିଙ୍କ ଆତ୍ମା ପୂର୍ବପୁରୁଷର ରୂପ ନେଇ ପରିବାରକୁ ସୁରକ୍ଷା ଓ ଆଶୀର୍ବାଦ ପ୍ରଦାନ କରନ୍ତି। ସେଥିପାଇଁ ଫାମାଡିହାନା ମାଧ୍ୟମରେ ସେମାନେ ପୂର୍ବପୁରୁଷଙ୍କ ପ୍ରତି ସମ୍ମାନ ଜଣାଇବା ସହ ସେମାନଙ୍କ ସହ ପ୍ରତୀକାତ୍ମକ ଭାବେ ପୁନଃ ମିଳିତ ହୁଅନ୍ତି। ସ୍ଥାନୀୟ ଲୋକଙ୍କ କହିବା ଅନୁସାରେ, ପୂର୍ବପୁରୁଷମାନେ ସ୍ୱପ୍ନରେ ଆସି ପରିବାରକୁ ମାର୍ଗଦର୍ଶନ କରନ୍ତି। ତେଣୁ ସେମାନଙ୍କ ଅସ୍ଥିକୁ ବାହାର କରି ସମ୍ମାନ ଜଣାଇବା ଦ୍ୱାରା ସେମାନେ ଖୁସି ହୁଅନ୍ତି ଏବଂ ପରିବାରର ମଙ୍ଗଳ କରନ୍ତି ବୋଲି ବିଶ୍ୱାସ ରହିଛି।

ଏହି ଉତ୍ସବ ସାଧାରଣତଃ ଜୁନ୍ରୁ ସେପ୍ଟେମ୍ବର ମଧ୍ୟରେ ଶୁଷ୍କ ଋତୁରେ ପାଳନ କରାଯାଏ। ପରିବାରର ସଦସ୍ୟମାନେ କବରସ୍ଥାନକୁ ଯାଇ କବର ଖୋଳନ୍ତି। ଅସ୍ଥିଗୁଡ଼ିକୁ ସତର୍କତାର ସହ ବାହାର କରି ପୁରୁଣା କପଡ଼ା ବଦଳରେ ନୂଆ ବସ୍ତ୍ର ପିନ୍ଧାଯାଏ। ଏହାପରେ ଶୋଭାଯାତ୍ରାରେ ସେଗୁଡ଼ିକୁ ଘରକୁ ନିଆଯାଏ। ସେଠାରେ ଗୀତ, ସଙ୍ଗୀତ, ନୃତ୍ୟ ଓ ଭୋଜିର ଆୟୋଜନ ସହ ପରିବାରର ସମସ୍ତ ସଦସ୍ୟ ପୂର୍ବପୁରୁଷଙ୍କ ସ୍ମୃତିଚାରଣ କରନ୍ତି। ପିଲାମାନଙ୍କୁ ମଧ୍ୟ ପରିବାରର ପୂର୍ବପୁରୁଷଙ୍କ ବିଷୟରେ ପରିଚିତ କରାଯାଏ। କେତେକ ଅଞ୍ଚଳରେ ଅସ୍ଥିକୁ କାନ୍ଧରେ ବୋହି ନୃତ୍ୟ କରିବାର ପରମ୍ପରା ମଧ୍ୟ ରହିଛି।

ଆହୁରି ପଢନ୍ତୁ;- Kerala Man Repays Loan After 35 Years: ୩୫ ବର୍ଷ ତଳେ ବନ୍ଧୁଙ୍କଠୁ ଉଧାର ନେଇଥିଲେ ୧୦୦୦, ଫେରାଇଲେ ୨୫ ହଜାର

ଏହି ପରମ୍ପରା ମାଡାଗାସ୍କର ସଂସ୍କୃତିରେ ପୂର୍ବପୁରୁଷ ପୂଜା ସହ ଗଭୀର ଭାବେ ଜଡ଼ିତ। ସ୍ଥାନୀୟ ଲୋକମାନଙ୍କ ବିଶ୍ୱାସ ହେଉଛି, ଯଦି ପୂର୍ବପୁରୁଷଙ୍କୁ ଯଥାର୍ଥ ସମ୍ମାନ ଦିଆଯିବ ନାହିଁ, ତେବେ ସେମାନେ ଅସନ୍ତୁଷ୍ଟ ହୋଇ ପରିବାର ଉପରେ ବିପଦ ଆଣିପାରନ୍ତି। ସେଥିପାଇଁ ପରିବାରର ସୁଖ, ଶାନ୍ତି ଓ ସମୃଦ୍ଧି ପାଇଁ ଫାମାଡିହାନାକୁ ଅତ୍ୟନ୍ତ ଗୁରୁତ୍ୱ ଦିଆଯାଏ। ଆଧୁନିକ ସମୟରେ ସହରାଞ୍ଚଳରେ ଏହି ପରମ୍ପରାର ପ୍ରଭାବ କିଛିଟା କମିଥିଲେ ମଧ୍ୟ, ମାଡାଗାସ୍କରର ଗ୍ରାମାଞ୍ଚଳରେ ଆଜି ବି ଏହା ସମାନ ଉତ୍ସାହ ଓ ଶ୍ରଦ୍ଧାର ସହ ପାଳନ କରାଯାଉଛି।