ମୋହନା,୦୩/୧୧: ଦୁଷ୍କର୍ମ ମାମଲାରେ ଅନ୍ତରବା ପୁରୁଣାସାହିରୁ ଗିରଫ ହୋଇଥିଲା ଜଣେ ଯୁବକ । ଗିରଫ ହୋଇଥିବା ଯୁବକ ଜଣକ ଜୁଏଲ ଶବର ବୋଲି ଜଣାପଡ଼ିଛି । ଅଭିଯୁକ୍ତକୁ ମହାରାଷ୍ଟ୍ରର ନାଗପୁର ପୋଲିସ ଗିରଫ କରିଥିବା ବେଳେ ପୋଲିସ ହେପାଜତରୁ ବେଡ଼ି ସହ ଚମ୍ପଟ ମାରିଲା ଆସାମୀ । ଗଜପତି ଜିଲ୍ଲା ମୋହନା ବ୍ଲକ୍ରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଜୁଏଲ ଶବର ନାମକ ଜଣେ ଯୁବକକୁ ଏକ ଦୁଷ୍କର୍ମ ମାମଲାରେ ମହାରାଷ୍ଟ୍ରର ନାଗପୁର ପୋଲିସ ଆକୋଲା ଷ୍ଟେସନରୁ ଗିରଫ କରିଥିଲା । ଗିରଫ କରିବା ପରେ ଶନିବାର ବିଳମ୍ବିତ ରାତିରେ ତଦନ୍ତ ପାଇଁ ନାଗପୁର ପୋଲିସ ଏକ କାର୍ରେ ଜୁଏଲକୁ ମୋହନା ଆଣିଥିଲେ । ଆସାମୀ ଜୁଏଲର ଗୋଡ଼ରେ ବେଡି ପକାଇ ଲଜ୍ରେ ପୋଲିସ କର୍ମଚାରୀ ଗାଧୋଉଥିବା ବେଳେ ଏହି ଘଟଣା ଘଟିଥିଲା । ପୋଲିସ କର୍ମଚାରୀ ଗାଧୋଉଥିବା ବେଳେ ଏହାର ସୁଯୋଗ ନେଇ ଜୁଏଲ ଲଜ୍ରୁ ଚମ୍ପଟ ମାରିଥିଲା । ଗୋଧୋଇବା ପରେ ଅଭିଯୁକ୍ତ ଖସି ପଳାଇଥିବା କଥା ଜାଣି ପାରିଥିଲା ପୋଲିସ । ଏହା ଜାଣି ତୁରନ୍ତ ନାଗପୁର ପୋଲିସ ମୋହନା ପୋଲିସକୁ ଖବର ଦେଇଥିଲା । ବର୍ତ୍ତମାନ ନାଗପୁର ପୋଲିସ ମୋହନା ପୋଲିସ ସହାୟତାରେ ପୋଲ ତଳେ ଓ ବିଭିନ୍ନ ସ୍ଥାନରେ ଅଭିଯୁକ୍ତକୁ ଖୋଜାଖୋଜି କରୁଛନ୍ତି ।
