ବରଗଡ଼, ୦୩/୦୬: ସାପ କାମୁଡ଼ାକୁ ହେଳା କରିବାରୁ ଚାଲିଗଲା ଜୀବନ। ହସ୍ପିଟାଲକୁ ବିଳମ୍ବରେ ଯିବାରୁ ବ୍ୟକ୍ତଙ୍କ ମୃତ୍ୟୁ ହୋଇଛି। ଏଭଳି ଘଟଣା ସାମ୍ନାକୁ ଆସିଛି ବରଗଡ଼ ଜିଲ୍ଲା ବରଗଡ଼ ଗଙ୍ଗାଧର ନଗରରୁ। ସାପ କାମୁଡ଼ାରେ ମିଟୁ ମେହେର ନାମଙ୍କ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି।
ସୂଚନାନୁଯାୟୀ, ମିଟୁ ମେହେର ତାଙ୍କ ସ୍ତ୍ରୀଙ୍କ ସହ ସାବିତ୍ରୀ ବ୍ରତ ପାଇଁ ବିଭିନ୍ନ ପୂଜା ସାମଗ୍ରୀ ବିକ୍ରି କରିବାକୁ ବଲାଙ୍ଗୀର ସହରକୁ ଯାଇଥିଲେ। ସେଠାରେ ରାତିରେ ଶୋଇ ଥିବାବେଳେ ଏକ ବିଷାକ୍ତ ସାପ ତାଙ୍କ ଗୋଡ଼କୁ ଚୋଟ ମାରିଥିଲା । ପର ଦିନ ସାବିତ୍ରୀ ଅମାବାସ୍ୟା ଥିବାରୁ ଏହାକୁ ସେ ଗୁରୁତ୍ବ ନଦେଇ ପୂଜା ସାମଗ୍ରୀ ବିକ୍ରି କରିବାରେ ଲାଗିପଡ଼ିଥିଲେ । ରାତିରେ ଘରକୁ ଫେରି ଦେଖିଲା ବେଳକୁ ଗୋଡ଼ ଫୁଲି ଯାଇଥିଲା। ବରଗଡ଼ ସରକାରୀ ଡାକ୍ତରଖାନାକୁ ଯାଇ ଦେଖାଇଥିଲେ। ହେଲେ ବୁର୍ଲା ଡ଼ାକ୍ତରଖାନା ଯିବା ପାଇଁ ଡ଼ାକ୍ତର ତାଙ୍କୁ କହିଥିଲେ। ମାତ୍ର ସେ ଗୁଣିଆ ପାଖକୁ ଯାଇ ଝଡ଼ା ଫୁଙ୍କା କରିଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ଡାକ୍ତରଖାନା ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଗତକାଲି ତାଙ୍କର ମୃତ୍ୟୁ ଘଟିଛି। ମଙ୍ଗଳବାର ଶବ ବ୍ୟବଚ୍ଛେଦ ହେବ ବୋଲି ସୂଚନା ମିଳିଛି।
