ନୂଆଦିଲ୍ଲୀ ୦୯/୦୪: ଅନେକ ମଙ୍ଗଳ ଗ୍ରହରେ ରହିବା ସ୍ୱପ୍ନ ଦେଖୁଛନ୍ତି। ତେବେ ମଙ୍ଗଳର ଧୂଳି ମଣିଷର ସ୍ୱାସ୍ଥ୍ୟ ପାଇଁ ବିପଦ ସୃଷ୍ଟି କରିପାରେ ବୋଲି ଏକ ନୂତନ ଅଧ୍ୟୟନରୁ ଜଣାପଡିଛି। ଏହାର ଧୂଳିକଣାରେ ଥିବା ବିଷାକ୍ତ ତତ୍ତ୍ୱ ଶ୍ୱାସକ୍ରିୟାରେ ସମସ୍ୟା ସୃଷ୍ଟି କରିବା ସହ ଅନ୍ୟ ରୋଗର ବି କାରଣ ହୋଇପାରେ ବୋଲି ଏଥିରେ କୁହାଯାଇଛି। ସେହିପରି ବୈଜ୍ଞାନିକମାନେ ଜାଣିବାକୁ ପାଇଛନ୍ତି, ମଙ୍ଗଳ ଗ୍ରହର ଧୂଳି ଅପେକ୍ଷାକୃତ ଛୋଟ ହୋଇଥାଏ। ତେଣୁ ଏହାର ସୂକ୍ଷ୍ମ କଣିକା ମଣିଷ ଫୁସଫୁସରେ ପ୍ରବେଶ କରିବା ସହ ରକ୍ତରେ ମଧ୍ୟ ମିଶି ଯାଇପାରେ। ଏହି ଧୂଳିରେ ସିଲିକା, ଜିପସମ୍ ଏବଂ ଅନ୍ୟ ପ୍ରକାରର ଧାତୁ ମିଳିଥାଏ। ଏହା ସ୍ୱାସ୍ଥ୍ୟ ପାଇଁ କ୍ଷତିକାରକ ହୋଇଥାଏ।
କେବଳ ସେତିକି ନୁହେଁ, ଏହା ଯୋଗୁଁ ସେଠାରେ ମାନବ ମିଶନକୁ ଅନେକ ଚ୍ୟାଲେଞ୍ଜର ସାମ୍ନା କରିବାକୁ ପଡିବ। ଚନ୍ଦ୍ରପୃଷ୍ଠର ଧୂଳିଠାରୁ ମଙ୍ଗଳର ଧୂଳି ଅତ୍ୟନ୍ତ କ୍ଷତିକାରକ ହୋଇପାରେ। କାରଣ ଏଥିରେ ବିଷାକ୍ତ ତତ୍ତ୍ୱ ଅଛି। ସେହିପରି ଆପୋଲୋ ମିଶନ୍ ସମୟରେ ଚନ୍ଦ୍ରପୃଷ୍ଠର ଧୂଳି କଣିକା ମହାକାଶ ଯାତ୍ରୀଙ୍କ ଠାରେ କାଶ, ଆଖିରେ ଜଳାପୋଡା ଭଳି ସମସ୍ୟା ସୃଷ୍ଟି କରିଥିଲା। ଅନ୍ୟପଟେ ମଙ୍ଗଳ ଗ୍ରହର ଧୂଳିରେ ଥିବା ସିଲିକା, ଫୁସଫୁସ୍ ରୋଗ ସିଲିକୋସିସର କାରଣ ମଧ୍ୟ ହୋଇପାରେ। ଏହାବାଦ୍ ଏହି ଧୂଳିରେ ଥିବା କ୍ରୋମିୟମ୍ ଏବଂ ଆର୍ସେନିକ ସ୍ୱାସ୍ଥ୍ୟ ପାଇଁ ହାନିକାରକ। ଏଣୁ ବୈଜ୍ଞାନିକମାନଙ୍କ କହିବା କଥା, ମଙ୍ଗଳ ଗ୍ରହରେ ଥିବା ମାଇକ୍ରୋଗ୍ରାଭିଟି ଏବଂ ରେଡିଏଶନ ଯୋଗୁଁ ଏହି ଉପାଦାନଗୁଡିକର ପ୍ରଭାବ ଆହୁରି ବିପଜ୍ଜନକ ହୋଇପାରେ। ଅପର ପକ୍ଷରେ ମଙ୍ଗଳ ମିଶନରେ ମହାକାଶ ଯାତ୍ରୀ ତୁରନ୍ତ ପୃଥିବୀ ପୃଷ୍ଠକୁ ଫେରିପାରିବେ ନାହିଁ। ତେଣୁ ସେଠାରେ ସୁରକ୍ଷା ଲାଗି ବିଶେଷ ବ୍ୟବସ୍ଥା ହେବା ଆବଶ୍ୟକ।
