ଉତ୍ତରପ୍ରଦେଶ, ୧୮।୩: ରାଧାକୃଷ୍ଣଙ୍କ ଶାଶ୍ୱତ ପ୍ରେମକୁ ନେଇ ଅନେକ ପୌରାଣିକ କାହାଣୀ ରହିଛି । ରାଧାକୃଷ୍ଣଙ୍କ ବିବାହକୁ ନେଇ ଦ୍ୱିମତ ରହିଛି । ରାଧାକୃଷ୍ଣ ବିବାହ ବନ୍ଧନରେ ଆବଦ୍ଧ ହୋଇନଥିଲେ ବୋଲି ଅଧିକାଂଶ ଦର୍ଶାଇଛନ୍ତି । ଅନ୍ୟପଟେ ଋଷି ଗର୍ଗାଚାର୍ଯ୍ୟ ‘ଗର୍ଗ ସଂହିତା’ ଉଲ୍ଲେଖ କରିଛନ୍ତି, ଯେ ରାଧାକୃଷ୍ଣଙ୍କ ମଧ୍ୟରେ ବିବାହ ହୋଇଥିଲା । ଏହାର ପ୍ରମାଣ ମଥୁରା ସ୍ଥିତ ରାଧା-କୃଷ୍ଣ ବିବାହ ମନ୍ଦିର । ମଥୁରାର ଭାଣ୍ଡୀରବନରେ ରହିଛି ଏକମାତ୍ର ରାଧା-କୃଷ୍ଣ ବିବାହ ମନ୍ଦିର । ଏକ ବିରାଟକାୟ ବଟବୃକ୍ଷ ତଳେ ପ୍ରତିଷ୍ଠିତ ଏହି ମନ୍ଦିରରେ ଭଗବାନ୍ ଶ୍ରୀକୃଷ୍ଣ ଏବଂ ରାଧାରାଣୀଙ୍କୁ ବର କନ୍ୟା ବେଶରେ ସଜ୍ଜିତ ହୋଇଥିବାର ଦେଖିବାକୁ ମିଳେ । ରାଧା, କୃଷ୍ଣ ପରସ୍ପରକୁ ବରଣମାଳା ପିନ୍ଧାଇଦେଉଥାନ୍ତି । ରାଧାକୃଷ୍ଣ ଯୁଗଳ ପ୍ରତିମା ନିକଟରେ ରହିଛି ସୃଷ୍ଟିକର୍ତ୍ତା ବ୍ରହ୍ମାଙ୍କ ପ୍ରତିମା । ବ୍ରହ୍ମା ହିଁ ରାଧାକୃଷ୍ଣଙ୍କ ମଧ୍ୟରେ ବିବାହ ସମ୍ପନ୍ନ କରାଇଥିବାର ଋଷି ଗର୍ଗାଚାର୍ଯ୍ୟ ବର୍ଣ୍ଣନା କରିଛନ୍ତି । ଏଠାରେ ଏକ ଯଜ୍ଞକୁଣ୍ଡ ରହିଛି ଯାହା ଭାଣ୍ଡୀରକୁଣ୍ଡ ନାମରେ ଖ୍ୟାତ । ଏହି ଭାଣ୍ଡୀରବନରେ କୃଷ୍ଣଙ୍କ ଜ୍ୟେଷ୍ଠ ଭ୍ରାତା ବଳରାମ କଂସ ପ୍ରେରିତ ପ୍ରଳମ୍ବାସୁର ଅସୁରକୁ ବଧ କରିଥିଲେ ବୋଲି କୁହାଯାଏ ।
କ’ଣ କହେ ଗର୍ଗ ସଂହିତା : ଏକଦା ନନ୍ଦ ରାଜା ଶିଶୁ କୃଷ୍ଣଙ୍କୁ କାଖେଇ ଧରି ଗାଈ ଚରାଇବାକୁ ବନକୁ ଯାଇଥିଲେ । ଗାଈ ଚରାଉ ଚରାଉ ବନର ଘଞ୍ଚ ଅଞ୍ଚଳକୁ ଚାଲିଗଲେ । ଏତିକି ବେଳେ ମେଘପବନ ମାଡ଼ି ଆସିଲା । ନନ୍ଦ ପିଲାଟିକୁ କିପରି ସୁରକ୍ଷିତ ରଖିବେ ବୋଲି ବିଚଳିତ ହୋଇପଡ଼ିଲେ । ସେ ସମୟରେ ରାଧାଙ୍କ ଆବିର୍ଭାବ ଘଟିଲା ସେଠାରେ । ଗର୍ଗ ସଂହିତା ବର୍ଣ୍ଣନା କରିଛନ୍ତି ଯେ, ରାଧାଙ୍କୁ ସେଠାରେ ରାଜା ନନ୍ଦ ପ୍ରଣାମ କରି କହିଛନ୍ତି ଯେ ମୁଁ ଜାଣେ ଯେ କୃଷ୍ଣ ହେଉଛନ୍ତି ସ୍ୱୟଂ ଭଗବାନ୍ । ରାଧାଙ୍କ ହାତରେ କୃଷ୍ଣଙ୍କୁ ସମର୍ପଣ କରି ନନ୍ଦ ସେଠାରୁ ବିବାୟ ନେବା ପରେ ବାଳୁତ କୃଷ୍ଣ ଯୁବାବସ୍ଥାର ରୂପ ଗ୍ରହଣ କରିଛନ୍ତି । ସେଠାରେ ବିବାହ ମଣ୍ଡପ ସହିତ ବିବାହର ସମସ୍ତ ସାମଗ୍ରୀ ପୂର୍ବରୁ ରହିଛି । ବିବାହ ମଣ୍ଡପରେ ସ୍ୱୟଂ ବ୍ରହ୍ମା ଉପସ୍ଥିତ ହୋଇ ବେଦ ମନ୍ତ୍ର ଉଚ୍ଚାରଣ ସହ ରାଧାକୃଷ୍ଣଙ୍କ ମଧ୍ୟରେ ବିବାହ ସମ୍ପନ୍ନ କରିଛନ୍ତି । ବିଶ୍ୱାସ ରହିଛି ଯେ କେହି କେହି ଭାଣ୍ଡୀରବନରେ ରାଧାକୃଷ୍ଣଙ୍କ ଦିବ୍ୟ ବିବାହ ଦୃଶ୍ୟକୁ ବାସ୍ତବରେ ଦର୍ଶନ କରିପାରନ୍ତି । ଯେଉଁମାନେ ଏହି ସୌଭାଗ୍ୟ ପାଇଥାନ୍ତି, ସେମାନେ ନିଶ୍ଚୟ ଦ୍ୱାପର ଯୁଗରେ ରାଧାକୃଷ୍ଣଙ୍କ ବିବାହର ସାକ୍ଷୀ ରହିଥିବା ଗାଈଗୋରୁ, ମୟୂର,ଶୁଆ ଅବା ସଖୀଗଣ,ବୃକ୍ଷଲତା ଇତ୍ୟାଦି ଥିଲେ ।
