ଭୁବନେଶ୍ୱର, ୦୬/୦୫ : ଅଢ଼େଇ ଦଶନ୍ଧିର ଲଢ଼େଇ। କଲୋନୀର ଶୋଭାବର୍ଦ୍ଧନ କରୁଥିବା ପାର୍କକୁ ଜବରଦଖଲମୁକ୍ତ କରିବା ପାଇଁ ବିଡିଏ, ବିଏମ୍ସି, ସହରାଞ୍ଚଳ ବିକାଶ ବିଭାଗରେ ଗଦା ଗଦା ଅଭିଯୋଗ। ସେଥିରେ ଏକାଧିକ ଅଦାଲତଙ୍କ ଆଦେଶ । ଗୁହାରି କରି କରି ଥକିଗଲେ କଲୋନିର ସଭାପତି । ଶେଷରେ ଚିରଦିନ ପାଇଁ ଆଖିବୁଜି ଦେଲେ ସିନା ଜବରଦଖଲକାରୀଙ୍କୁ ହଟାଇ ପାରିଲାନି ପ୍ରଶାସନ-ପୁଲିସ । ଜବରଦଖଲକାରୀ ନିଶକୁ ମୋଡ଼ି ଏବେ ବି ସର୍ବସାଧାରଣ ପାର୍କକୁ କବ୍ଜା କରି ନିଜର ବେପାର ଚଳାଇଛନ୍ତି । ଜନମଙ୍ଗଳ ସରକାରରେ ଏ ହେଉଛି ସାଧାରଣ ନାଗରିକଙ୍କ ଚରମ ଦୁର୍ଦ୍ଦଶାର ଅନ୍ୟତମ ନିଦର୍ଶନ । ବିଏମ୍ସି ୱାର୍ଡ ନମ୍ବର-୪୪ରେ ଥିବା ମେଘେଶ୍ୱର ପାର୍କର ଅବସ୍ଥା । ପ୍ରାୟ ୨୫ ବର୍ଷ ହେବ ଜଣେ ପ୍ରଭାବଶାଳୀ ବ୍ୟକ୍ତି ଏହି ସର୍ବସାଧାରଣ ପାର୍କଟିକୁ ମାଡ଼ି ବସି ନିଜର ବ୍ୟକ୍ତିଗତ ସମ୍ପତ୍ତି ଭଳି ବ୍ୟବହାର କରୁଛନ୍ତି । ଏହି ଅବଧି ଭିତରେ ପାର୍କକୁ ଜବରଦଖଲମୁକ୍ତ କରିବା ପାଇଁ ବିଏମ୍ସି ଉଚ୍ଛେଦ ଟିମ୍ ଡୋଜର ଧରି ୫ ଥର ଆସିଲାଣି । ହେଲେ ସଂପୃକ୍ତ ଜବରଦଖଲକାରୀ କ’ଣ ସଲାସୁତୁରା କରୁଛନ୍ତି କେଜାଣି, ସାପ ଗଦ ଶୁଙ୍ଘିଲା ଭଳି ଉଚ୍ଛେଦ ଟିମ୍ ସେଠାରୁ ଧୀରେ କିନା ପଳାଉଛନ୍ତି ।
୧୯୯୧ରେ ବିଡିଏ ୨୦ ଲକ୍ଷ ଟଙ୍କା ବ୍ୟୟରେ ମେଘେଶ୍ୱର କଲୋନୀ ପାର୍କ ନିର୍ମାଣ କରିଥିଲା । ବଡଗଡ ବ୍ରିଟ୍ କଲୋନି ସମେତ ବଡ଼ଗଡ଼, ବ୍ରହ୍ମେଶ୍ୱର ପାଟଣା ବାସିନ୍ଦାଙ୍କ ଖେଳକୁଦ ଏବଂ ମନୋରଞ୍ଜନ ନିମନ୍ତେ ଏହି ପାର୍କ ଲୋକାର୍ପିତ ହୋଇଥିଲା । ପାର୍କ ଭିତରେ ପାଥ୍ ୱେ, ବେଞ୍ଚ, ପିଲାମାନଙ୍କ ପାଇଁ ବିଭିନ୍ନ ଖେଳ ସରଞ୍ଜାମ, ୱାଟର ଫାଉଣ୍ଟେନ ଓ ନାନାଦି ରକମର ଫୁଲ ଗଛ ସହ ଘାସ ଗାଲିଚା କରାଯାଇଥିଲା । ଏଠାରେ ସକାଳୁ ସନ୍ଧ୍ୟା ଯାଏ ଲୋକଙ୍କର ଭିଡ଼ ଲାଗି ରହୁଥିଲା । ୧୯୯୯ ମହାବାତ୍ୟାରେ ପାର୍କରେ ଗଛଗୁଡ଼ିକ ଉପୁଡ଼ି ଗଲା । ବିପର୍ଯ୍ୟୟରେ ଖେଳ ସାମଗ୍ରୀ, ଫାଉଣ୍ଟେନ ଆଦି ଭାଙ୍ଗି ଚୁରମାର ହୋଇଗଲା । ପାର୍କର ପୁନରୁଦ୍ଧାର ପାଇଁ କଲୋନି ସଭାପତି ସଂଗ୍ରାମ କେଶରୀ ନାୟକ ବିଡିଏ ଅଧ୍ୟକ୍ଷଙ୍କୁ ଜଣାଇଲେ । କିନ୍ତୁ ବିଡିଏ ପକ୍ଷରୁ କିଛି ପଦକ୍ଷେପ ନିଆଗଲା ନାହିଁ । ପାର୍କକୁ ଲୋକେ ନ ଆସିବାରୁ ୨୦୦୦ ମସିହାରେ ଜଣେ ପ୍ରଭାବଶାଳୀ ବ୍ୟକ୍ତି ଏହି ପରିତ୍ୟକ୍ତ ପାର୍କଟିକୁ କବ୍ଜା କରି ସେଥିରେ ଏକ ଘର ବନାଇଦେଲେ । ସେ ଘରେ କ୍ୟାଟରିଂ ବେପାର ଆରମ୍ଭ କଲେ । ସ୍ଥାନୀୟ ଲୋକେ ପ୍ରତିବାଦ କରିବାରୁ ନାଲି ଆଖି ଦେଖାଇଲେ । ପାର୍କରୁ ଜବରଦଖଲ ହଟାଇ ଏହାକୁ ବ୍ୟବହାର ଯୋଗ୍ୟ କରିବାକୁ କଲୋନି କମିଟିର ସଭାପତି ବିଡିଏ ଉପାଧ୍ୟକ୍ଷ, ବିଏମ୍ସି କର୍ତ୍ତୃପକ୍ଷ, ଖୋର୍ଦ୍ଧା ଜିଲ୍ଲାପାଳଙ୍କୁ ବାରମ୍ବାର ଚିଠି ଲେଖି ଚାଲିଲେ । ଏହାର ପ୍ରତିକ୍ରିୟା ସ୍ୱରୂପ ପ୍ରତି ୪-୫ ବର୍ଷରେ ଉଚ୍ଛେଦ ଟିମ୍ ସାଜସାମାନ ନେଇ ଘଟଣାସ୍ଥଳରେ ପହଞ୍ଚନ୍ତି । ସଂପୃକ୍ତ ଜବରଦଖଲକାରୀ ସହିତ ୨/୪ ପଦ କଥା ହେବା ପରେ ହୋଇ ସେଠାରୁ ଚୁପ୍ଚାପ୍ ପଳାନ୍ତି ।
ଏଇ ୨୫ ବର୍ଷ ଜବରଦଖଲ ଅବଧି ଭିତରେ କଲୋନୀ ବାସିନ୍ଦାଙ୍କୁ ସନ୍ତୁଷ୍ଟ କରିବା ପାଇଁ ସରକାର କେବଳ ପାର୍କ ସାମନାରେ ଗୋଟିଏ ବୋର୍ଡ ପୋତିଛନ୍ତି । ସେଥିରେ ଲେଖା ହୋଇଛି ‘ଏହା ଓଡ଼ିଶା ସରକାରଙ୍କ ସମ୍ପତ୍ତି, ଅନଧିକାର ପ୍ରବେଶ ଦଣ୍ଡନୀୟ । ଜବରଦଖଲ ନ ହଟାଇବା ପାଇଁ ଉଚ୍ଛେଦ ଟିମ୍ ସହିତ ମୋଟା ଅଙ୍କର କାରବାର ହେଉଛି ବୋଲି କଲୋନି ବାସିନ୍ଦା ଅଭିଯୋଗ କରିଛନ୍ତି । ଇତିମଧ୍ୟରେ ଅଢ଼େଇ ଦଶନ୍ଧି ବିତିଗଲାଣି । କେତେ କାଉନସିଲର, କର୍ପୋରେଟର, ମେୟର , କମିଶନର, ବିଡିଏ ଅଧିକାରୀ ଆସି ଗଲେଣି । କଲୋନି ବାସିନ୍ଦାଙ୍କ ଅଭିଯୋଗ ଫାଇଲ ଦିନକୁ ଦିନ ମୋଟା ହେବାରେ ଲାଗିଛି । ସବୁଠାରୁ ଦୁଃଖର ବିଷୟ ପାର୍କ ପୁନରୁଦ୍ଧାର ଲଢ଼େଇ କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିଥିବା କଲୋନି ସଭାପତି ଶ୍ରୀ ନାୟକ ମଧ୍ୟ ଗତବର୍ଷ ଆରପାରିକୁ ଚାଲିଗଲେ । ହେଲେ ଜବରଦଖଲକାରୀ ସେଠାରୁ ଚଙ୍କୁ ନାହାନ୍ତି । ଏହି ସମ୍ପର୍କରେ ବଡ଼ଗଡ଼ ଗ୍ରାମର ଯୁବ ବିଜେପି ନେତା ସଂଗ୍ରାମ ମାର୍ଥା କହିଛନ୍ତି, ଜବରଦଖଲକାରୀଙ୍କ ଆଗରେ ପୂର୍ବ ସରକାର ଅମଳରେ ଥିବା ଅଫିସର ଓ ଉଚ୍ଚପଦସ୍ଥ ଅଧିକାରୀମାନେ ମୁଣ୍ଡ ନୁଆଁଇଥିଲେ । ଆମେ ଏ ବାବଦରେ ଏକାମ୍ର ବିଧାୟକ ବାବୁ ସିଂଙ୍କ ଦୃଷ୍ଟି ଆକର୍ଷଣ କରିଛୁ । ୨୫ ବର୍ଷର ଜବରଦଖଲର ଅନ୍ତ ନିକଟ ଭବିଷ୍ୟତରେ ନିଶ୍ଚୟ ଘଟିବ । ସେହିଭଳି ଭୁବନେଶ୍ୱର ମହାନଗର ନିଗମର ଜୋନାଲ ଡେପୁଟି କମିଶନର ରାଜଲକ୍ଷ୍ମୀ ନାୟକ କହିଛନ୍ତି, ଉକ୍ତ ପାର୍କ ବିଡିଏ ଅଧୀନରେ ଅଛି ଓ ଏହା ବିଏମ୍ସିକୁ ବିଧିବଦ୍ଧ ଭାବେ ହସ୍ତାନ୍ତର କରାଯାଇନାହିଁ ।
ଏହି ଖବରଟିକୁ ପଢନ୍ତୁ-ରାଜଧାନୀରେ ପସରା ମେଲାଇଛି ବିହାରର ଲିଚୁ, ବାଲେଶ୍ୱର ଜାମୁରୋଳ
