ମାୟାମୀ, ୨୯/୦୩: ଚଳିତ ମାୟାମୀ ଓପନ ଟେନିସ୍ ଟୁର୍ଣ୍ଣାମେଣ୍ଟର ମହିଳା ସିଙ୍ଗଲ୍ସ ଫାଇନାଲ୍ ଲାଇନ୍ ଅପ୍ ଚୂଡ଼ାନ୍ତ ହୋଇଛି । ଆସନ୍ତା ରବିବାର ଟପ୍ ସିଡ୍ ଅର୍ନ୍ୟା ସାବାଲେଙ୍କା ଓ ଚତୁର୍ଥ ସିଡ୍ ଜେସିକା ପେଗୁଲାଙ୍କ ମଧ୍ୟରେ ଟାଇଟଲ୍ ଲଢ଼େଇ ହେବ । ପୁରୁଷ ବର୍ଗରେ ସେମି ଫାଇନାଲ୍ ଲାଇନ୍ ଚୂଡ଼ାନ୍ତ ହୋଇଛି । ଶନିବାର ନୋଭାକ ଜୋକୋଭିକ-ଗ୍ରିଗୋର ଦିମିତ୍ରୋଭ ଏବଂ ଟେଲର ଫ୍ରିଜ୍-ଚେକ୍ ଗଣରାଜ୍ୟର ଜାକବ ମେନ୍ସିକ୍ଙ୍କ ମଧ୍ୟରେ ସେମି ଫାଇନାଲ୍ ଖେଳାଯିବ ।
ମହିଳା ସିଙ୍ଗଲ୍ସ: ସେମିରେ ବିଶ୍ୱର ଏକ ନମ୍ବର ଖେଳାଳି ବେଲାରୁଷର ସାବାଲେଙ୍କା ସିଧାସଳଖ ୬-୨, ୬-୨ ସେଟ୍ରେ ଷଷ୍ଠ ସିଡ୍ ଇଟାଲୀର ଯସ୍ମିନ ପାଓଲିନିଙ୍କୁ ପରାସ୍ତ କରିଥିଲେ । ମ୍ୟାଚ୍ ଜିତିବା ପାଇଁ ତାଙ୍କୁ ୧ଘଣ୍ଟା ୧୩ମିନିଟ୍ ଲାଗିଥିଲା । ସେ ପ୍ରଥମ ଥର ମାୟାମୀ ଓପନ ଏବଂ କ୍ୟାରିୟରରେ ୧୨ ଥର ଡବ୍ଲ୍ୟୁଟିଏ ୧୦୦୦ ଫାଇନାଲ୍ରେ ପ୍ରବେଶ କରିଛନ୍ତି । ଅନ୍ୟ ମ୍ୟାଚ୍ରେ ଆମେରିକାର ପେଗୁଲା ୭-୬ (୭-୩), ୫-୭, ୬-୩ରେ ଫିଲିପାଇନ୍ସର ଆଲେଜାନ୍ଦ୍ରା ଏଲାଙ୍କୁ ହରାଇଥିଲେ । ଏଲା ପୂର୍ବରୁ ଗ୍ରାଣ୍ଡସ୍ଲାମ୍ ଜିତିଥିବା ୩ଜଣ ଖେଳାଳିଙ୍କୁ ହରାଇ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ ।
ପୁରୁଷ ସିଙ୍ଗଲ୍ସ: କ୍ୱାର୍ଟରରେ ଚତୁର୍ଥ ସିଡ୍ ସର୍ବିୟା ତାରକା ଜୋକୋଭିକ ୬-୩, ୭-୬ (୭-୪)ରେ ଆମେରିକାର ସେବାଷ୍ଟିଆନ୍ କର୍ଡାଙ୍କୁ ପରାଜିତ କରିଥିଲେ । ଏଥିସହ ସେ (୩୭ବର୍ଷ ୧୦ମାସ) ବୟୋଜ୍ୟେଷ୍ଠ ଖେଳାଳି ଭାବେ ଏଟିପି ମାଷ୍ଟର୍ସ ୧୦୦୦ ସେମିରେ ପ୍ରବେଶ କରିଛନ୍ତି । ପୂର୍ବରୁ ଏହି ରେକର୍ଡ଼ ପ୍ରସିଦ୍ଧ ଖେଳାଳି ରୋଜର ଫେଡେରର (୩୭ବର୍ଷ ୭ମାସ)ଙ୍କ ନାମରେ ରହିଥିଲେ । ଅନ୍ୟ ମ୍ୟାଚ୍ରେ ତୃତୀୟ ସିଡ୍ ଫ୍ରିଜ୍ ୭-୫, ୬-୭ (୭- ୯), ୭-୫ରେ ଇଟାଲୀର ମାଟେଓ ବେରେଟିନିଙ୍କୁ, ବୁଲଗାରିଆର ଦିମିତ୍ରୋଭ ୬-୭ (୬-୮), ୬-୪, ୭-୬ (୭-୩)ରେ ଆର୍ଜେଣ୍ଟିନାର ଫ୍ରାନ୍ସିସ୍କୋ ସେରୁଣ୍ଡୋଲୋଙ୍କୁ ଏବଂ ଚେକ ଗଣରାଜ୍ୟର ମେନସିକ୍ ୭-୬ (୭-୫), ୬-୧ରେ ଫ୍ରାନ୍ସର ଆର୍ଥର ଫିଲ୍ସଙ୍କୁ ହରାଇ ସେମିରେ ପ୍ରବେଶ କରିଛନ୍ତି ।
