ଭୁବନେଶ୍ୱର, ୩୦/୦୪: ମନ୍ତେଇ ନଈର ଶାଖା ନଈରେ ପଡି ମିଶ୍ରପୁର ଗ୍ରାମର ନାବାଳିକାଙ୍କ ମୃତ୍ୟୁ । ମୃତକ ହେଲେ କାରଣପଲ୍ଲୀ ଗ୍ରାମର ଅର୍ଜୁନ ମାଈତିଙ୍କ ୭ ବର୍ଷିୟ ଝିଅ ଝିଲି । ଦୀର୍ଘ ସମୟ ପରେ ସଂଜ୍ଞାହୀନ ଅବସ୍ଥାରେ ଉଦ୍ଧାର କଲା ଅଗ୍ନିଶମ ବାହିନୀ । ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଜଗନ୍ନାଥପ୍ରସାଦ ପଞ୍ଚାୟତ ମିଶ୍ରପୁର ଗ୍ରାମରେ ଏଭଲି ଘଟଣା ଘଟିଛି ।
ସୂଚନା ମୁତାବକ, ଝିଲି ତାର ଅଜା ଘର ମିଶ୍ରପୁରକୁ ମାଆ ସହିତ ବୁଲିବାକୁ ଆସିଥିଲା । ଅପରାହ୍ନରେ ଝିଲି ଏକୁଟିଆ ମନ୍ତେଇ ନଈର ଶାଖା ନଈ ନିକଟରେ ଖେଳୁଥିଲା । ହେଲେ କୌଣସି ଅସାବଧାନତାରୁ ଝିଲି ଉକ୍ତ ନଈରେ ଖସିପଡ଼ିଥିଲା। ଦୀର୍ଘ ସମୟ ଧରି ଝିଲି ଘରକୁ ନ ଫେରିବାରୁ ପରିବାର ଲୋକେ ଖୋଜା ଖୋଜି କରିଥିଲେ। ପରେ ସନ୍ଦେହ ହେବାରୁ ଉକ୍ତ ନଈରେ ଖୋଜାଖୋଜି କରିଥିଲେ। ଝିଅକୁ ନ ପାଇବାରୁ ପରିବାର ଲୋକେ ଅଗ୍ନିଶମ ବାହିନୀକୁ ଖବର କରିଥିଲେ। ଅଗ୍ନିଶମ ବାହିନୀ ପହଞ୍ଚିଦୀର୍ଘ ସମୟ ପରେ ଝିଲିକୁ ସଂଜ୍ଞାହୀନ ଅବସ୍ଥାରେ ଉଦ୍ଧାର କରି ବାସୁଦେବପୁର ଡାକ୍ତରଖାନା ନେଇଆସିଥିଲେ। ହେଲେ ଡାକ୍ତର ସେଠାରେ ଝିଲିକୁ ମୃତ ଘୋଷଣା କରିଥିଲେ।
