ନାରାୟଣପାଟଣା,୦୯/୧୧: ବାର୍ଦ୍ଧକ୍ୟ ଭତ୍ତା ଆଣିବାକୁ ଯାଇଥିବା ବେଳେ ଅଘଟଣ । ଶୀତ କାକରରେ ପଡି ରହି ପ୍ରାଣ ହରାଇଲେ  ୮୩ ବର୍ଷର ବୃଦ୍ଧା କାନ୍ତା ମେଲେକା । କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକରେ ଏଭଳି ଅଭାବନୀୟ ଘଟଣା ଘଟିଛି ।

ସୂଚନା ମୁତାବକ, ବାଉଁଶପୁଟ ଗ୍ରାମର ନିଜ ଭଉଣୀ ସୋନାଇ ମେଲେକାଙ୍କ ସହ ରହୁଛନ୍ତି କାନ୍ତା ମେଲେକା । ଶୁକ୍ରବାର ଦୁଇ ଭଉଣୀ ମିଶି ବନ୍ଧୁଗାଁ ଉତ୍କଳ ଗ୍ରାମ୍ୟ ବ୍ୟାଙ୍କକୁ ଭତ୍ତା ପାଇଁ ଆସିଥିଲେ । ବ୍ୟାଙ୍କରେ ପହଞ୍ଚି ନପାରି ବନ୍ଧୁଗାଁ ଇନ୍ଦଲମା ଠାକୁରାଣୀ ମନ୍ଦିର ନିକଟରେ କାନ୍ତା ମେଲେକା ଅସୁସ୍ଥ ହୋଇପଡ଼ି ଥିଲେ। ତାଙ୍କ ସ୍ୱାସ୍ଥ୍ୟାବସ୍ଥା ଭଲ ନଥିବାରୁ ବନ୍ଧୁଗାଁ ଇନ୍ଦଲମା ଠାକୁରାଣୀ ମନ୍ଦିର ନିକଟରେ ବସି ରହିଥିଲେ  । ଶୀତ କାକର ସମ୍ଭାଳି ନପାରି ବିଳମ୍ବିତ ରାତିରେ ମୃତ୍ୟୁବରଣ କରିଥିଲେ କାନ୍ତା ମେଲେକା । ଏନେଇ ତାଙ୍କ ଭଉଣୀ ସୂଚନା ଦେଇଛନ୍ତି । ଉଉଣୀକୁ ଏପରି ଅବସ୍ଥାରେ ଦେଖି ସୋନାଇ ମେଲେକା ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ବୃଦ୍ଧାଙ୍କ ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି । ଅନ୍ୟପଟେ ଏପରି ସ୍ଥିତିରେ ବୟସ୍କ ମାନଙ୍କୁ ଘରେ ଘରେ ଭତ୍ତା ପହଞ୍ଚାଇବା ବ୍ୟବସ୍ଥା କରାଯିବା ପାଇଁ ଦାବୀ କରିଛନ୍ତି ସ୍ଥାନୀୟ ନେତା ଡି ଏଙ୍କାଟି I