ଭୁବନେଶ୍ୱର,୦୮/୦୩: ନନ୍ଦନକାନନ ପାଇଁ ଆସୁଛି ବିଶ୍ୱସ୍ତରୀୟ ମାଷ୍ଟରପ୍ଲାନ। ବ୍ୟବସ୍ଥା, ଭିତ୍ତିଭୂମି ଓ ସୁବିଧାର ହେବ ନବକଳେବର । ଏମିତି ବ୍ୟବସ୍ଥା ଖଞ୍ଜାଯିବ, ଦେଶବିଦେଶରୁ ପର୍ଯ୍ୟଟକ ଭିଡ଼ି ହୋଇ ଆସିବେ । ଏଭଳି ଯୋଜନା ଚଳାଇଛନ୍ତି ରାଜ୍ୟ ସରକାର ।
ନୂଆ ସରକାର ଆସିବା ପରେ ନନ୍ଦନକାନନ ପାଇଁ ବିଶ୍ୱସ୍ତରୀୟ ଯୋଜନା କରାଯାଉଛି । ଜଙ୍ଗଲ ଓ ପରିବେଶ ବିଭାଗ ଏଥିପାଇଁ ଆନ୍ତର୍ଜାତିକ ସ୍ତରର ବ୍ୟବସ୍ଥା ନିର୍ମାଣ କରିବାକୁ ଅଣ୍ଟା ଭିଡ଼ିଛନ୍ତି । ଏହି ପରିପ୍ରେକ୍ଷୀରେ ଆସନ୍ତା ଆର୍ଥିକ ବର୍ଷରେ ୨୦୨୫- ୨୬ରେ ନନ୍ଦନକାନନରେ ଆକର୍ଷଣୀୟ ଆକ୍ୱାରିୟମ ନିର୍ମାଣ ପ୍ରସ୍ତାବ ରହିଛି । ମାଟି ତଳେ ଏହି ଆକ୍ୱାରିୟମ ହେବ ପର୍ଯ୍ୟଟକଙ୍କ ପ୍ରମୁଖ ଆକର୍ଷଣର କେନ୍ଦ୍ର । ଏହା ଭିତରେ ବିଭିନ୍ନ କିମସର ମାଛ ଦେଖିବାକୁ ମିଳିବ । ଖାଲି ସେତିକି ନୁହେଁ, ଜଳରେ ବସବାସ କରୁଥିବା ବିଭିନ୍ନ ପ୍ରଜାତିର ପକ୍ଷୀ ରହିବେ ।
ନନ୍ଦନକାନନରେ ଅଚଳ ହୋଇ ପଡ଼ିଥିବା ଟଏ ଟ୍ରେନର ପୁନରୁଦ୍ଧାର ହେବ । ଏହାକୁ ନୂଆ ରୂପ ଦେବାକୁ ଯୋଜନା ହୋଇଛି । ଦୀର୍ଘ ବର୍ଷ ଅଚଳ ରହିବା ପରେ ଏହି ଟଏ ଟ୍ରେନ କାର୍ଯ୍ୟକ୍ଷମ ହୋଇଥିଲା । ମାତ୍ର ଗତ ଦେଢ଼ମାସ ହେବ ଏହି ଟ୍ରେନଟି ପୁଣି ଅଚଳ ହୋଇପଡ଼ିଛି । ବାରମ୍ବାର ଟ୍ରାକ୍ ଚ୍ୟୁତ ହେବାରୁ କର୍ତ୍ତୃପକ୍ଷ ଏହାକୁ ବନ୍ଦ କରି ଦେଇଛନ୍ତି । ଏବେ ଯୋଜନା ହେଉଛି, ଏହାକୁ ନୂଆ ରୂପ ଦେବା ସହ ପୂର୍ବଠାରୁ ଆହୁରି ଆକର୍ଷଣୀୟ କରାଯିବ।
