ନୂଆଦିଲ୍ଲୀ: ମହାରାଷ୍ଟ୍ରର ନାସିକରେ ଭାୱାଲି ଡ୍ୟାମ୍ ଏବଂ ଜଳପ୍ରପାତ ନିକଟରେ ଗୁଣ୍ଡାଗର୍ଦ୍ଧିକୁ ବିରୋଧ କରିବାରୁ ଏକ ପରିବାର ଉପରେ ଦୁ୍ବୃର୍ତ୍ତ ମାନେ ଆକ୍ରମଣ କରିଛନ୍ତି। ଆକ୍ରମଣକାରୀ ମାନେ କେବଳ ପରିବାରକୁ ଆକ୍ରମଣ କରିନାହାନ୍ତି ବରଂ ପ୍ରାୟ ୧୫ କିଲୋମିଟର ପର୍ଯ୍ୟନ୍ତ ସେମାନଙ୍କୁ ପିଛା କରିଥିଲେ ଆଉ ସେମାନଙ୍କ କାରକୁ କ୍ଷତି ପହଞ୍ଚାଇଛନ୍ତି। ପୀଡିତଙ୍କ ଅଭିଯୋଗ ଆଧାରରେ ନାସିକରେ ଏକ ମାମଲା ରୁଜୁ କରାଯାଇଛି। ନାସିକ ସହର ଏବଂ ଗ୍ରାମୀଣ ପୋଲିସର ମିଳିତ ଦଳ ନଅ ଜଣଙ୍କୁ ଅଟକ ରଖିଛନ୍ତି।
ଜଣେ ମହିଳା ସଦସ୍ୟଙ୍କ ସହ ଅଭଦ୍ରାମୀରୁ ବିବାଦ ଆରମ୍ଭ ହୋଇଥିଲା…
ପୋଲିସ ଅଭିଯୋଗ ଅନୁଯାୟୀ, ନାସିକର ଭାଗବତ ପରିବାର ରବିବାର ଇଗତପୁରୀ ସହରର ଭାୱାଲି ଡ୍ୟାମ୍ ଯାଇଥିଲେ। ଜଳପ୍ରପାତ ନିକଟରେ କିଛି ଲୋକ ପୂର୍ବରୁ ଉପସ୍ଥିତ ଥିଲେ। ପରିବାର ପହଞ୍ଚିବା ମାତ୍ରେ ଅଭିଯୁକ୍ତ ମାନେ ଅଶ୍ଳୀଳ କମେଣ୍ଟ କରିଥିଲେ। ସେମାନେ ଜଣେ ମହିଳାଙ୍କୁ ସିଟି ମାରିଥିଲେ ଏବଂ ତାଙ୍କୁ ଅସଦାଚରଣ କରିଥିଲେ। ପରିବାର ପ୍ରତିବାଦ କରିବା ମାତ୍ରେ ଆକ୍ରମଣକାରୀ ମାନେ ହିଂସାତ୍ମକ ହୋଇଗଲେ ଏବଂ ଭାଗବତ ପରିବାରକୁ ଆକ୍ରମଣ ଏବଂ ଗାଳି ଦେବା ଆରମ୍ଭ କଲେ। ଭାଗବତ ପରିବାର କହିଛନ୍ତି ଯେ, ଆକ୍ରମଣ ଆରମ୍ଭ ହେବା ମାତ୍ରେ ସେମାନେ ନିଜ ଜୀବନ ବଞ୍ଚାଇବା ପାଇଁ ଶୀଘ୍ର ଘଟଣାସ୍ଥଳରୁ ପଳାଇ ଯାଇଥିଲେ।
ଜୀବନ ରକ୍ଷା ପାଇଁ ଟୋଲ୍ ବ୍ୟାରିକେଡ୍ ଭାଙ୍ଗିବାକୁ ପଡିଥିଲା…
ପରିବାର ଫେରିବା ପରେ, ଅଭିଯୁକ୍ତ ମାନେ ଏକ ବାଇକ୍ ରେ ସେମାନଙ୍କ ପିଛା କରିବା ଆରମ୍ଭ କଲେ। ସେମାନେ ରଡ୍ ଏବଂ ବାଡ଼ି ଧରି କାରର ୧୫ କିଲୋମିଟର ପର୍ଯ୍ୟନ୍ତ ପଛେ ପଛେ ଗଲେ। ରାସ୍ତାରେ ଆକ୍ରମଣକାରୀ ମାନେ କାରକୁ ଅନେକ ଥର ଭଙ୍ଗାରୁଜା କଲେ। ପୀଡିତାଙ୍କ ସ୍ୱାମୀ କହିଛନ୍ତି ଯେ, ସେମାନେ ଟୋଲ୍ ପ୍ଲାଜା ପାର ହେଉଥିବା ସମୟରେ, ଏକ କାର ଆସିଲା ଏବଂ ଏଥିରେ ଥିବା ଲୋକମାନେ ସେମାନଙ୍କ ଉପରେ ଆକ୍ରମଣ କରିବା ଆରମ୍ଭ କଲେ। ନିଜ ଜୀବନ ରକ୍ଷା ପାଇଁ, ସେମାନେ ଟୋଲ୍ ପ୍ଲାଜା ବ୍ୟାରିକେଡ୍ ଭାଙ୍ଗି ଏକ ସଂକୀର୍ଣ୍ଣ ରାସ୍ତା ଦେଇଗଲେ। ସେଠାରେ ମଧ୍ୟ ସେମାନଙ୍କ ଉପରେ ଆକ୍ରମଣ କରାଯାଇଥିଲା। ସେମାନେ ସ୍ଥାନୀୟ ଲୋକଙ୍କ ସାହାଯ୍ୟ ଲୋଡ଼ିଥିଲେ ଏବଂ ତା’ପରେ କୌଣସି ପ୍ରକାରେ ନାସିକର ଏକ ପୋଲିସ ଷ୍ଟେସନରେ ପହଞ୍ଚିଥିଲେ।
୯ ଜଣ ଅଭିଯୁକ୍ତ ଏବେ ପୋଲିସ ହେପାଜତରେ…
ଅଭିଯୋଗ ଆଧାରରେ ନାସିକ୍ ପୋଲିସ ଏକ ମାମଲା ରୁଜୁ କରିଛି। ନାସିକ୍ ସହର ଏବଂ ଗ୍ରାମାଞ୍ଚଳ ପୋଲିସର ଏକ ମିଳିତ ଦଳ ଅଭିଯୁକ୍ତଙ୍କୁ ଚିହ୍ନଟ କରିଛି। ପୋଲିସ ଅଧୀକ୍ଷକ କହିଛନ୍ତି ଯେ ଏଫଆଇଆର୍ ଦାୟର ହେବା ପରେ, ପୋଲିସ ଭିଡିଓ ଯାଞ୍ଚ ଏବଂ ବୈଷୟିକ ଯାଞ୍ଚ ସହିତ ପୁଙ୍ଖାନୁପୁଙ୍ଖ ତଦନ୍ତ କରିଥିଲା। ଏପର୍ଯ୍ୟନ୍ତ ନଅ ଜଣ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି।
ମୁଖ୍ୟମନ୍ତ୍ରୀ କଠୋର କାର୍ଯ୍ୟାନୁଷ୍ଠାନ ନିର୍ଦ୍ଦେଶ ଦେଇଛନ୍ତି…
ବିଜେପି ବିଧାୟକ ଦେବଯାନୀ ଫରାଣ୍ଡେ କହିଛନ୍ତି ଯେ ସ୍ଥାନୀୟ ଗୁଣ୍ଡାଙ୍କ ଦ୍ୱାରା ପର୍ଯ୍ୟଟକଙ୍କ ଉପରେ ଆକ୍ରମଣ ପରେ ମୁଖ୍ୟମନ୍ତ୍ରୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନାସିକ ଗ୍ରାମୀଣ ଏସପିଙ୍କୁ ନିର୍ଦ୍ଦେଶ ଦେଇଛନ୍ତି। ପୋଲିସ ନିଶ୍ଚିତ କରିଛି ଯେ ଆକ୍ରମଣକାରୀଙ୍କୁ ୨୪ ଘଣ୍ଟା ମଧ୍ୟରେ ଜେଲ ପଠାଯିବ। ପର୍ଯ୍ୟଟକଙ୍କୁ କ୍ଷତି ପହଞ୍ଚାଉଥିବା ଯେକୌଣସି ବ୍ୟକ୍ତିଙ୍କ ସହିତ ନାସିକ ଗ୍ରାମୀଣ ପୋଲିସ କଠୋରତାର ସହ କାର୍ଯ୍ୟ କରିବ। ଏପରି ଘଟଣା ପୁନରାବୃତ୍ତି ନହେବା ପାଇଁ ନାସିକ ଗ୍ରାମୀଣ ଏସପି ପଦକ୍ଷେପ ନେଉଛନ୍ତି।
