ଭୁବନେଶ୍ୱର,୧୯/୧୦: ପାରାଦୀପ ଓ ଧାମରା ବନ୍ଦର ସହ ଜଳପଥରେ ଯୋଡ଼ି ହେବ ତାଳଚେର । ଅର୍ନ୍ତଦେଶୀୟ ଜଳପଥ-୫ ଏହି ଦୁଇ ବନ୍ଦର ସହିତ ତାଳଚେରକୁ ସଂଯୋଗ କରିବ । ଇନଲ୍ୟାଣ୍ଡ ୱାଟରୱେଜ୍ ଅଥରିଟି ଅଫ ଇଣ୍ଡିଆ (ଆଇଡବ୍ଲୁଏଆଇ) ରାଜ୍ୟ ସରକାରଙ୍କ ସହ ମିଶି ଖଣିଜ ପରିବହନ ପାଇଁ ଏହି ଅଭିନବ ପ୍ରକଳ୍ପର ଅଗ୍ରଗତି ନେଇ କାମ କରିବ । ଶୁକ୍ରବାର ବାଣିଜ୍ୟ ଓ ପରିବହନ ବିଭାଗ ସଚିବ ଉଷା ପାଢ଼ୀ ଦୀର୍ଘସ୍ଥାୟୀ ଅର୍ନ୍ତଦେଶୀୟ ଜଳପଥର ଆବଶ୍ୟକତା ଉପରେ ଗୁରୁତ୍ୱ ଦେଇ ଏହି ସୂଚନା ଦେଇଛନ୍ତି । ଶ୍ରୀମତୀ ପାଢ଼ୀ କହିଛନ୍ତି, ଏହି ପ୍ରକଳ୍ପର ବିସ୍ତୃତ ମାଷ୍ଟରପ୍ଲାନ ଆଇଆଇଟି ମାଡ୍ରାସ, ଆଇଡବ୍ଲୁଏଆଇ ଓ ରାଜ୍ୟ ସରକାର ମିଳିତ ଭାବେ ପ୍ରସ୍ତୁତ କରୁଛନ୍ତି । ଖୁବଶୀଘ୍ର ଏହାକୁ ଚୂଡ଼ାନ୍ତ କରାଯିବ ବୋଲି ସେ କହିଛନ୍ତି ।
ମିଳିଥିବା ସୂଚନା ମୁତାବକ, ଦେଶରେ ହେବାକୁ ଥିବା ୬ଟି ଅର୍ନ୍ତଦେଶୀୟ ଜଳପଥ ମଧ୍ୟରୁ ଜାତୀୟ ଜଳପଥ-୫ ସବୁଠାରୁ ଗୁରୁତ୍ୱପୂର୍ଣ୍ଣ । ମୋଟ ୬୨୩ କିଲୋମିଟର ଦୈର୍ଘ୍ୟ ବିଶିଷ୍ଟ ଏହି ଜାତୀୟ ଜଳପଥର ୫୩୨ କିଲୋମିଟର ଓଡ଼ିଶା ଦେଇଯିବ । ବାକି ୯୧ କିଲୋମିଟର ପଶ୍ଟିମବଙ୍ଗରେ ରହିବ । ପ୍ରଥମ ପର୍ଯ୍ୟାୟରେ ଏହା ତାଳଚେରରୁ ମଙ୍ଗଳାଯୋଡ଼ି ହୋଇ ଧାମରା ବନ୍ଦରକୁ ସଂଯୋଗ କରିବ । ପରବର୍ତ୍ତୀ ପର୍ଯ୍ୟାୟରେ ଏହା ଧାମରାରୁ ପଶ୍ଚିମବଙ୍ଗର ହଳଦିଆ ବନ୍ଦରକୁ ସଂଯୋଗ କରିବ । ଦେଶର ପ୍ରମୁଖ ଇସ୍ପାତ ଉତ୍ପାଦନ କରୁଥିବା ଓଡ଼ିଶା ୨୦୩୦ ସୁଦ୍ଧା ବାର୍ଷିକ ୧୦୦ ମିଲିୟନ ଟନ ଇସ୍ପାତ ଉତ୍ପାଦନ ପାଇଁ ଲକ୍ଷ୍ୟ ରଖିଥିଲାବେଳେ ରାଜ୍ୟରେ ଥିବା କଞ୍ଚାମାଲ ପରିବହନ ପାଇଁ ଜାତୀୟ ଜଳପଥ ଏକ ପ୍ରକୃଷ୍ଟ ମାଧ୍ୟମ ହେବ ବୋଲି କୁହାଯାଉଛି।
