ନୂଆଦିଲ୍ଲୀ,୨୫/୦୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିମାନ 'ଇଣ୍ଡିଆ ୱାନ୍' ଫ୍ଳାଇଟରାଡାର ୨୪ (Flightradar24) ସାରା ବିଶ୍ୱରେ ସର୍ବାଧିକ ଟ୍ରାକ୍ ହୋଇଥିବା ବିମାନ ପାଲଟିଛି। ବୁଧବାର (୨୫ ଫେବୃଆରୀ, ୨୦୨୬) ନୂଆଦିଲ୍ଲୀରୁ ଉଡ଼ାଣ ଭରି ଇସ୍ରାଏଲର ତେଲ ଅଭିଭ ବିମାନବନ୍ଦରରେ ଅବତରଣ କରିଥିବା ଏହି ବିମାନ ସାରା ବିଶ୍ୱର ଲୋକଙ୍କ ଦୃଷ୍ଟି ଆକର୍ଷଣ କରିଥିଲା। ରେକର୍ଡ ହୋଇଥିବା ତଥ୍ୟ ଅନୁଯାୟୀ, ପ୍ରାୟ ଅପରାହ୍ନ ୪ଟା ସମୟରେ ୯,୨୨୫ ଜଣ ୟୁଜର ଏକକାଳୀନ ବିମାନକୁ ଟ୍ରାକ୍ କରୁଥିଲେ। ପ୍ରଧାନମନ୍ତ୍ରୀ ମୋଦୀ ଭାରତୀୟ ସମୟ ପ୍ରାୟ ଅପରାହ୍ନ ୪:୧୫ ସମୟରେ ତେଲ ଅଭିଭରେ ପହଞ୍ଚିଥିଲେ।

"ଇଣ୍ଡିଆ ୱାନ୍ ବିମାନରେ ଇସ୍ରାଏଲ ପହଞ୍ଚିଥିଲେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ"

ଫ୍ଳାଇଟରାଡାର ୨୪ ଏକ୍ସରେ ଏକ ପୋଷ୍ଟ କରିଥିଲା ଯେ, "ଇଣ୍ଡିଆ ୱାନ୍ ଆଜି ଇସ୍ରାଏଲକୁ ଉଡ଼ାଣ ଭରିଛି ଏବଂ ବର୍ତ୍ତମାନ ସାଉଦି ଆରବ ଉପରେ ଅଛି। ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିମାନରେ ଅଛନ୍ତି।" ଏହାର କିଛି ସମୟ ପରେ, ପ୍ରଧାନମନ୍ତ୍ରୀ ମୋଦୀଙ୍କ ସରକାରୀ ବିମାନ ଇସ୍ରାଏଲର ତେଲ ଅଭିଭ ବିମାନବନ୍ଦରରେ ଅବତରଣ କଲା, ଯେଉଁଠାରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ତାଙ୍କ ପତ୍ନୀଙ୍କ ସହିତ ତାଙ୍କୁ ସ୍ୱାଗତ କରିବା ପାଇଁ ପୂର୍ବରୁ ଉପସ୍ଥିତ ଥିଲେ।

ଆହୁରି ପଢ଼ନ୍ତୁ: ପିଏମ୍ ମୋଦିଙ୍କ ଇସ୍ରାଏଲ ଗସ୍ତକୁ ନେଇ ଗର୍ଜିଲେ ପ୍ରିୟଙ୍କା, ଜୟରାମ ରମେଶ ଦେଲେ ନେହୁରୁ-ଇନ୍ଦିରାଙ୍କ ଉଦାହରଣ

ନୂଆଦିଲ୍ଲୀରୁ ୬ ଘଣ୍ଟାର ବିମାନ ଯାତ୍ରା ପରେ ତେଲ ଅଭିଭରେ ପହଞ୍ଚିଲେ ମୋଦୀ:

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୁଧବାର ସକାଳ ପ୍ରାୟ ୯ଟାରେ ନୂଆଦିଲ୍ଲୀରୁ ତେଲ ଅଭିଭ ଅଭିମୁଖେ ଯାତ୍ରା କରିଥିଲେ ଏବଂ ଅପରାହ୍ନ ପ୍ରାୟ ୪:୧୫ ରେ ସେଠାରେ ପହଞ୍ଚିଥିଲେ। ଫ୍ଳାଇଟରାଡାର ୨୪ ଅନୁଯାୟୀ, ତାଙ୍କର ଯାତ୍ରା ଛଅ ଘଣ୍ଟା ଧରି ଚାଲିଥିଲା। ପ୍ରଧାନମନ୍ତ୍ରୀ ମୋଦୀ ଦୁଇ ଦିନିଆ ଇସ୍ରାଏଲ ଗସ୍ତରେ ଅଛନ୍ତି।

ନେସେଟକୁ ସମ୍ବୋଧିତ କରିବାରେ ପ୍ରଥମ ଭାରତୀୟ ନେତା ହେଉଛନ୍ତି ମୋଦୀ:

ନଅ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ମୋଦୀଙ୍କର ଏହା ହେଉଛି ଦ୍ୱିତୀୟ ଇସ୍ରାଏଲ ଗସ୍ତ, ପୂର୍ବରୁ ସେ ୨୦୧୭ ରେ ସେଠାକୁ ଯାଇଥିଲେ। ସେଠାରେ ପ୍ରଧାନମନ୍ତ୍ରୀ ମୋଦୀ ନେତାନ୍ୟାହୁଙ୍କ ସହ ଏକ ସଂକ୍ଷିପ୍ତ ବୈଠକ କରି ଉଭୟ ନେତା ଇସ୍ରାଏଲୀ ସଂସଦ, ନେସେଟର ଏକ ସ୍ୱତନ୍ତ୍ର ଅଧିବେଶନରେ ଯୋଗଦେଇଛନ୍ତି। ପ୍ରଧାନମନ୍ତ୍ରୀ ମୋଦୀ ନେସେଟକୁ ସମ୍ବୋଧିତ କରିବାରେ ପ୍ରଥମ ଭାରତୀୟ ନେତା ହୋଇଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଆର୍ଜେଣ୍ଟିନା ରାଷ୍ଟ୍ରପତି ଜାଭିୟର ମେଲି ମଧ୍ୟ ଇସ୍ରାଏଲୀ ସଂସଦକୁ ସମ୍ବୋଧିତ କରିଛନ୍ତି। ପ୍ରଧାନମନ୍ତ୍ରୀ ମୋଦୀ ତାଙ୍କ ନେସେଟ ଅଭିଭାଷଣ ପରେ ଏକ ବ୍ୟକ୍ତିଗତ ରାତ୍ରୀଭୋଜନରେ ଯୋଗଦେବେ।

ପ୍ରମେୟ ପୃଷ୍ଠାର ପ୍ରମୁଖ ଖବର: ସେନାରେ ତାଲିମ ପରେ ଭାରତର ଏହି ସ୍ଥାନକୁ ରହିବାକୁ ଆସନ୍ତି ଇସ୍ରାଏଲ ଯବାନ, ଜାଣନ୍ତୁ ଏମାନଙ୍କ ପାଇଁ କାହିଁକି ସ୍ବତନ୍ତ୍ର ଏହି ସ୍ଥାନ...