ନୂଆଦିଲ୍ଲୀ: ନେପାଳ ଏବଂ ଓମାନ ୨୦୨୬ ଟି-20 ବିଶ୍ୱକପ୍ ପାଇଁ ସ୍ଥାନ ସୁରକ୍ଷିତ କରିଛନ୍ତି। ମୋଟ ୧୯ଟି ଦଳ ଆସନ୍ତା ବର୍ଷ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିଛନ୍ତି । କେବଳ ଗୋଟିଏ ସ୍ଥାନ ଖାଲି ରହିଛି। ନେପାଳ ବର୍ତ୍ତମାନ ଏସିଆ ପ୍ରଶାନ୍ତ ମହାସାଗରୀୟ ଯୋଗ୍ୟତା ଅର୍ଜନର ସୁପର ୬ ପର୍ଯ୍ୟାୟରେ ପଏଣ୍ଟ ଟେବୁଲର ଶୀର୍ଷରେ ଅଛି । ଏପର୍ଯ୍ୟନ୍ତ ସମସ୍ତ ଚାରୋଟି ମ୍ୟାଚ୍ ଜିତିଛି। ଅନ୍ୟପକ୍ଷରେ ଓମାନ ମଧ୍ୟ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରି ଶ୍ରେଷ୍ଠ ଦୁଇରେ ରହିଛି।
ନେପାଳ ଏବଂ ଓମାନ ପୂର୍ବରୁ ଟେବୁଲର ଶୀର୍ଷ ଦୁଇଟି ସ୍ଥାନରେ ଥିଲେ । ବୁଧବାର ଦିନ ସାମୋଆ ବିପକ୍ଷରେ ୟୁଏଇର ୭୭ ରନର ବିଜୟ ନେପାଳ ଏବଂ ଓମାନକୁ ଲାଭ ଦେଇଥିଲା । ଦୁଇ ଟିମ୍ ବିଶ୍ବକପ୍ରେ ସ୍ଥାନ ପକ୍କା କରିଛନ୍ତି । ଏହି ଯୋଗ୍ୟତା ଅର୍ଜନ ଟୁର୍ଣ୍ଣାମେଣ୍ଟରୁ ଏକ ତୃତୀୟ ଦଳ ମଧ୍ୟ ଉଭା ହେବ । କିନ୍ତୁ ଏହାର ସ୍ଥିତି ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ୟୁଏଇ ବର୍ତ୍ତମାନ ଟେବୁଲର ୩ ନମ୍ବରରେ ରହିଛି । କିନ୍ତୁ ବିଶ୍ୱକପରେ ଏହାର ସ୍ଥାନ ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ।
ଓମାନ ଶେଷ ଥର ପାଇଁ ୨୦୨୪ ଟି୨୦ ବିଶ୍ୱକପ୍ ଖେଳିଥିଲା। ଏହା ହେବ ଓମାନର ତୃତୀୟ ଟି୨୦ ବିଶ୍ୱକପ୍ । ପୂର୍ବରୁ ଏହା ୨୦୧୬ ଏବଂ ୨୦୨୪ ବିଶ୍ୱକପ୍ ଖେଳିଥିଲା। ସେହିଭଳି ନେପାଳ ମଧ୍ୟ ତୃତୀୟ ଥର ପାଇଁ ଟି୨୦ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିଛି। ଦୁର୍ଭାଗ୍ୟବଶତଃ, ନେପାଳ ଏବଂ ଓମାନ ଉଭୟ ୨୦୨୪ ବିଶ୍ୱକପ୍ ପ୍ରଥମ ରାଉଣ୍ଡ ଅତିକ୍ରମ କରିବାରେ ବିଫଳ ହୋଇଥିଲେ। ୨୦୨୬ ଟି -୨୦ ବିଶ୍ବକପ ଫେବୃଆରୀ ୭ ତାରିଖରୁ ଆରମ୍ଭ ହୋଇ ମାର୍ଚ୍ଚ ୮ ତାରିଖ ପର୍ଯ୍ୟନ୍ତ ଚାଲିବ । ଭାରତ ଏବଂ ଶ୍ରୀଲଙ୍କା ମିଳିତ ଭାବରେ ଏହି ବିଶ୍ୱକପ୍ ଆୟୋଜନ କରିବେ। ୨୦୨୪ ବିଶ୍ୱକପ୍ ପରି, ଦଳଗୁଡ଼ିକ ଗ୍ରୁପ୍ ପର୍ଯ୍ୟାୟ ଦେଇ ସୁପର ୮ ପର୍ଯ୍ୟାୟକୁ ଯିବେ । ଏହା ପରେ ନକଆଉଟ୍ ପର୍ଯ୍ୟାୟ ଆରମ୍ଭ ହେବ।
୧୯ଟି ଦଳ ଯୋଗ୍ୟତା ଅର୍ଜନ କରିଛନ୍ତି: ଭାରତ, ଅଷ୍ଟ୍ରେଲିଆ, ଇଂଲଣ୍ଡ, ଦକ୍ଷିଣ ଆଫ୍ରିକା, ଶ୍ରୀଲଙ୍କା, ଆଫଗାନିସ୍ତାନ, ବାଂଲାଦେଶ, ଆମେରିକା, ୱେଷ୍ଟଇଣ୍ଡିଜ୍, ଆୟର୍ଲାଣ୍ଡ, ନ୍ୟୁଜିଲାଣ୍ଡ, ପାକିସ୍ତାନ, କାନାଡା, ଇଟାଲି, ନେଦରଲାଣ୍ଡ, ନାମିବିଆ, ଜିମ୍ବାୱେ, ନେପାଳ, ଓମାନ।
