ବୌଦ୍ଧ,୧/୧୦ : ବୌଦ୍ଧ ଜିଲ୍ଲାରେ ୩୪ତମ ଜିଲ୍ଲା ଆରକ୍ଷୀ ଅଧିକ୍ଷକ ଭାବେ ଯୋଗ ଦେଇଛନ୍ତି ବେଙ୍ଗାଲୁର କ୍ୟାଡ଼ର ୨୦୧୮ବ୍ୟାଚର ଆଇପିଏସ ଅଧିକାରୀ ନାଗାରାଜୁ ଦେବରକୋଣ୍ଡା । ନୂତନ ଏସପି ଆଜି ମଧ୍ୟାହ୍ନରେ ଏସପି କାର୍ଯ୍ୟାଳୟକୁ ଆସି ପୂର୍ବତନ ଏସପି ରାଜ ପ୍ରସାଦଙ୍କଠାରୁ ନିଜର ଦାୟିତ୍ଵ ଭାର ଗ୍ରହଣ କରିଛନ୍ତି । ଦାୟିତ୍ଵ ଗ୍ରହଣ କରିବା ପରେ ସେ ଜିଲ୍ଲାର ସମସ୍ତ ଥାନା ଅଧିକାରୀ, ଡିଏସପି ଏବଂ ଅନ୍ୟାନ୍ୟ ଅଧିକାରୀଙ୍କ ସହିତ ସାକ୍ଷାତ କରିଛନ୍ତି । ବୌଦ୍ଧ ଜିଲ୍ଲାର ଆରକ୍ଷୀ ଅଧିକ୍ଷକ ଭାବେ ଆଜି କାର୍ଯ୍ୟଭାର ସମ୍ଭାଳିଥିବାବେଳେ ଜିଲ୍ଲାରେ ମୁଖ୍ୟତଃ ଦୁଇଟି ବଡ ସମସ୍ୟା ରହିଛି । 

ଗୋଟିଏ ମାଓ ସମସ୍ୟା ଏବଂ ଅନ୍ୟଟି ଜିଲ୍ଲାରେ ପ୍ରଚୁର ପରିମାଣର ଗଞ୍ଜେଇ ଚାଷ ଏବଂ ଗଞ୍ଜେଇ ଚାଲାଣ । ତେବେ ଏହି ଦୁଇ ବଡ ସମସ୍ୟା ଉପରେ ପୂର୍ବରୁ ଯେମିତି ଭାବେ ଗୁରୁତ୍ଵ ଦିଆଯାଉଥିଲା ସେହିଭଳି ଭାବେ ଆଗାମୀ ଦିନରେ ମଧ୍ୟ ଜିଲ୍ଲାକୁ ମାଓମୁକ୍ତ କରିବା ସହିତ ନିଶାମୁକ୍ତ କରିବାକୁ ମଧ୍ୟ ଉଚିତ୍ ପଦକ୍ଷେପ ନିଆଯିବ ବୋଲି ନୂତନ ଏସପି ପ୍ରକାଶ କରିଛନ୍ତି । ସେହିପରି ଜିଲ୍ଲାରେ ପ୍ରତ୍ୟେକ ଥାନା ଗୁଡିକରେ ସାଧାରଣ ଲୋକଙ୍କୁ ଉଚିତ୍ ବ୍ୟବହାର ଦେବା ସହିତ ଲୋକଙ୍କ ଅଭିଯୋଗକୁ ଶୁଣିବା ପାଇଁ ଥାନା ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଏଥିସହିତ ବୌଦ୍ଧ ଜିଲ୍ଲାରେ ଶାନ୍ତି ଶୃଙ୍ଖଳା ଉପରେ ମଧ୍ୟ ଗୁରୁତ୍ଵ ଦିଆଯିବ ଏବଂ ଜିଲ୍ଲାର ଜନସାଧାରଣ ଯେ କୌଣସି ମୁହୂର୍ତ୍ତରେ ନିଜର ଅଭିଯୋଗ ମୋ ପାଖକୁ ଆଣିପାରିବେ ଏବଂ ଆମେ ସବୁବେଳେ ଜନସାଧାରଣଙ୍କ ସହିତ ଅଛୁ ବୋଲି କହିଛନ୍ତି ଏସପି ।