ଜୟପୁର,୩୦/୧୧: ଅବିଭକ୍ତ କୋରାପୁଟ ଜିଲ୍ଲାରେ ତ୍ୱରାନ୍ୱିତ ହେବ ବିମାନସେବା । ଏଣିକି ସବୁଦିନ ଭୁବନେଶ୍ୱରରୁ ଜୟପୁର ଚଳାଚଳ କରିବ ୨ ଫ୍ଲାଇଟ୍ । ଡିସେମ୍ବର ପହିଲାରୁ ପ୍ରତିଦିନ ସକାଳ ୬ଟା ୫୫ରେ ପ୍ରଥମ ଏବଂ ପୂର୍ବାହ୍ଣ ୧୦ଟା ୫୫ରେ ଦ୍ୱିତୀୟ ବିମାନ ଉଡ଼ିବ । ଏଠାରେ ପହଞ୍ଚିବା ପରେ ଉଭୟ ବିମାନ ଯଥାକ୍ରମେ ସକାଳ ୮ ଟା୫୫ ଏବଂ ଅପରାହ୍ଣ ୩ଟା ୧୫ରେ ଭୁବନେଶ୍ୱର ଅଭିମୁଖେ ଉଡ଼ାଣ ଭରିବ । ସେବାପ୍ରଦାନକାରୀ ସଂସ୍ଥା ଇଣ୍ଡିଆୱାନ୍ ଏୟାର ପକ୍ଷରୁ ସାମାଜିକ ଗଣମାଧ୍ୟମ ‘ଏକ୍ସ’ରେ ଏହି ସୂଚନା ଦିଆଯାଇଛି । ଜୟପୁର-ବିଶାଖାପାଟଣା-ଜୟପୁର ବିମାନସେବା ଡିସେମ୍ବରରୁ ପ୍ରତି ମଙ୍ଗଳବାର ବନ୍ଦ ରହିବ ।
ମିଳିଥିବା ସୂଚନା ଅନୁଯାୟୀ, ଆସନ୍ତା ୧ ତାରିଖ ସକାଳ ୬.୫୫ରେ ୯ ଆସନ ବିଶିଷ୍ଟ ପ୍ରଥମ ଫ୍ଲାଇଟ୍(୧୭୧୦୯) ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରୁ ବାହାରିବ । ୧ ଘଣ୍ଟା ୪୦ ମିନିଟ୍ର ଉଡ଼ାଣ ପରେ ଜୟପୁର ଏୟାରପୋର୍ଟରେ ୮ଟା ୩୫ରେ ପହଞ୍ଚିବ । ଫ୍ଲାଇଟ୍-୧୭୨୦୯ ଏଠାରୁ ପୂର୍ବାହ୍ଣ ୮.୫୫ରେ ବାହାରି ୧ ଘଣ୍ଟା ୩୫ ମିନିଟ୍ ପରେ ଅର୍ଥାତ ପୂର୍ବାହ୍ଣ ୧୦.୩୦ରେ ବିଜୁ ପଟ୍ଟନାୟକ ବିମାନବନ୍ଦରରେ ଲ୍ୟାଣ୍ଡ କରିବ । ସେଦିନର ଦ୍ୱିତୀୟ ବିମାନସେବା ଭୁବନେଶ୍ୱର-ଜୟପୁର-ବିଶାଖାପାଟଣା-ଜୟପୁର-ଭୁବନେଶ୍ୱର ମଧ୍ୟରେ ଚାଲିବ । ଅର୍ଥାତ ଦ୍ୱିତୀୟ ଫ୍ଲାଇଟ୍(୧୭୧୦୩) ପୂର୍ବାହ୍ଣ ୧୦.୫୫ରେ ଭୁବନେଶ୍ୱରରୁ ବାହାରି ମଧ୍ୟାହ୍ଣ ୧୨.୩୦ରେ ଜୟପୁର ଏୟାରପୋର୍ଟରେ ପହଞ୍ଚିବ । ୨୦ ମିନିଟ୍ ରହଣି ପରେ ଫ୍ଲାଇଟ୍(୧୭୧୦୪) ବିଶାଖାପାଟଣା ଅଭିମୁଖେ ୧୨.୫୦ରେ ବାହାରିବ । ୫୦ ମିନିଟ ପରେ ଅପରାହ୍ଣ ୧.୪୦ରେ ସେଠାକାର ଏୟାରପୋର୍ଟରେ ଲ୍ୟାଣ୍ଡ କରିବ । ୨୦ ମିନିଟ୍ ପରେ ଯାତ୍ରୀଙ୍କୁ ନେଇ ଅପରାହ୍ଣ ୨ଟା ରେ ବାହାରି ୨.୫୫ରେ ଏଠାରେ ପହଞ୍ଚିବ । ୩ଟା ୧୫ରେ ଫ୍ଲାଇଟ୍(୧୭୨୦୩)ଯାତ୍ରୀଙ୍କୁ ଉଠାଇ ୪.୫୦ରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବ । ଯାତ୍ରା ଅବଧି ରହିବ ୧ ଘଣ୍ଟା ୩୫ ମିନିଟ୍ । କମ୍ପାନି ୱେବସାଇଟ୍ରେ ଟାଇମ୍ଟେବୁଲ୍ ଏବଂ ଟିକଟ ବାବଦ ଦେୟ ଉଲ୍ଳେଖ କରାଯାଇଛି । ଡିସେମ୍ବରର କୌଣସି ମଙ୍ଗଳବାର କମ୍ପାନି ବିମାନ ଜୟପୁର-ବିଶାଖାପାଟଣା-ଜୟପୁର ମଧ୍ୟରେ ଚଳାଚଳ କରିବନି ବୋଲି ଜଣାପଡ଼ିଛି । ୱେବସାଇଟ୍ରେ ବି ଏହି ରୁଟ୍ରେ ମଙ୍ଗଳବାର ଟିକଟ ବୁକିଂ ଲାଗି ସ୍ଲଟ୍ ରଖାଯାଇନି ।
ସୂଚନାଥାଉ କି, ୨୦୨୨ ଅକ୍ଟୋବର ୩୧ରେ ଭୁବନେଶ୍ୱର-ଜୟପୁର ମଧ୍ୟରେ ପ୍ରଥମ ବିମାନସେବା ଆରମ୍ଭ ହୋଇଥିଲା । ପରେ ଏହା ବିଶାଖାପାଟଣାକୁ ସଂପ୍ରସାରିତ କରାଯାଇଥିଲା । ସେବେଠୁ ଭୁବନେଶ୍ୱର-ଜୟପୁର-ବିଶାଖାପାଟଣାଜୟପୁର-ଭୁବନେଶ୍ୱର ମଧ୍ୟରେ ଇଣ୍ଡିଆୱାନ୍ ଏୟାର କମ୍ପାନିର ଗୋଟିଏ ୯ ଆସନ ବିଶିଷ୍ଟ ଫ୍ଲାଇଟ୍ ଚଳାଚଳ କରୁଛି । ଯାତ୍ରୀସଂଖ୍ୟା ବୃଦ୍ଧି ପାଉଥିବାରୁ ଅଧିକ ସିଟ୍ ଥିବା ଫ୍ଲାଇଟ୍ ଚଳାଚଳ ଲାଗି ବାରମ୍ବାର ଦାବି ହେଉଥିଲା । ୨୦୨୩ ନଭେମ୍ବର ୬ରେ କମ୍ପାନି ପକ୍ଷରୁ ଭୁବନେଶ୍ୱରଜୟପୁର-ଭୁବନେଶ୍ୱର ଦ୍ୱିତୀୟ ବିମାନସେବା ଆରମ୍ଭ ହୋଇଥିଲା । ସପ୍ତାହରେ ସୋମ ଏବଂ ଶୁକ୍ରବାର ଚାଲିଥିଲା । ପରେ ଗତ ସେପ୍ଟେମ୍ବର ୪ରୁ ବୁଧବାର ବି ଏହି ସେବା ଉପଲବବ୍ଧ ହୋଇଥିଲା । ଏବେ ପ୍ରଥମ ବିମାନ ଭୁବନେଶ୍ୱର-ଜୟପୁରଭୁବନେଶ୍ୱର ମଧ୍ୟରେ ସବୁଦିନ ଚଳାଚଳ କରିବ ।
