ଭୁବନେଶ୍ବର,୧୭।୫ : ରାଜ୍ୟର ପ୍ରଶାସନିକ କ୍ଷେତ୍ରରେ ଗୁରୁ ଦାୟିତ୍ୱ ତୁଲାଉଥିବା ଅମଲା ଵା ଆସିଷ୍ଟାଣ୍ଟ ସେକ୍ସନ ଅଫିସର( ASO), ସେକ୍ସନ ଅଫିସର(S0)ଙ୍କୁ ପ୍ରଶିକ୍ଷଣ ଦେବା ପାଇଁ ନୂଆ ପ୍ରଶିକ୍ଷଣ ଅନୁଷ୍ଠାନ ଖୋଲିବ। ନବନିଯୁକ୍ତ ଏଏସଓ ଏଠାରୁ ପ୍ରଶିକ୍ଷଣ ନେବା ପରେ ହିଁ ବିଭିନ୍ନ ବିଭାଗରେ ନିଯୁକ୍ତି ପାଇବେ। 

ଦୈନନ୍ଦିନ ପ୍ରଶାସନିକ କାମ କିଭଳି ତୁଲାଇବେ  ଏଠାରେ  ସେ ସମ୍ପର୍କରେ ତିନି ମାସ ପାଠ ପଢିବେ। ଉତ୍ତରଦାୟିତ୍ୱର ସହ କିଭଳି ସରକାରୀ ଫାଇଲ କାମ କରିବେ ଓ ନୋଟିଙ୍ଗ ଲେଖିବେ ତାହା ମଧ୍ୟ ଏଠାରେ ଶିଖିବେ। ପୂର୍ବରୁ ତୋଷାଳି ଭବନରେ ଏକ ପ୍ରଶିକ୍ଷଣ ଅନୁଷ୍ଠାନ କାର୍ଯ୍ୟ କରୁଥିଲା। ତେବେ ପୂର୍ତ୍ତ ବିଭାଗ ପକ୍ଷରୁ ୟୁନିଟ- ୨ ମାର୍କେଟ ବିଲଡିଂ ପଛ ପାଖରେ ଓଡିଶା ସଚିବାଳୟ ପ୍ରଶିକ୍ଷଣ ଅନୁଷ୍ଠାନର ନୂଆ କୋଠା ତିଆରି କରାଯାଇଛି। ମୁଖ୍ୟମନ୍ତ୍ରୀ ଖୁବଶୀଘ୍ର ଏହି ନୂଆ କୋଠାକୁ ଉଦଘାଟନ କରିବେ ବୋଲି ସୂଚନା ମିଳିଛି।