ଭୁବନେଶ୍ୱର,୨୬/୬ : ରାଜ୍ୟରେ ବଢିବ ଚିଙ୍ଗୁଡ଼ି ଉତ୍ପାଦନ। ବର୍ତ୍ତମାନ ବାର୍ଷିକ ଯେତିକି ଚିଙ୍ଗୁଡ଼ି ଉତ୍ପାଦନ ହେଉଛି, ଆସନ୍ତା ୧୦ବର୍ଷ ମଧ୍ୟରେ ତାହା ୯ଗୁଣ ଅଧିକରେ ପହଞ୍ଚିବ । ଏବେ ବାର୍ଷିକ ୧ ଲକ୍ଷ ୬୦ହଜାର ଟନ୍ ଉତ୍ପାଦନ ହେଉଥିବା ବେଳେ ୨୦୩୬ରେ ୯ଲକ୍ଷ ଟନ୍ ଚିଙ୍ଗୁଡ଼ି ଉତ୍ପାଦନ ହେବ । ରପ୍ତାନୀ ମଧ୍ୟ ବୃଦ୍ଧି ପାଇବ । ଓଡ଼ିଶାର ଚିଙ୍ଗୁଡ଼ି ଦେଶବିଦେଶରେ ପହଞ୍ଚିବ । ଚିଙ୍ଗୁଡ଼ି ଚାଷୀଙ୍କ ଆର୍ଥିକ ମେରୁଦଣ୍ଡ ମଧ୍ୟ ସୁଦୃଢ଼ ହେବ । ଏଥିପାଇଁ ରାଜ୍ୟ ସରକାର ପ୍ରତିଷ୍ଠା କରିବେ ‘ଓଡ଼ିଶା ଚିଙ୍ଗୁଡ଼ି ମିଶନ୍’ । ଏଭଳି ଏକ ଭିଜନ ରଖି ରାଜ୍ୟ ସରକାର ଏବେ କାମ ଆରମ୍ଭ କରିଛନ୍ତି।
ଓଡ଼ିଶା ବଙ୍ଗୋପସାଗର ଉପକୂଳରେ ଅବସ୍ଥିତ ଥିବାରୁ ଦେଶର ଏହା ଏକ ଗୁରୁତ୍ୱପୂର୍ଣ୍ଣ ସାମୁଦ୍ରିକ ରାଜ୍ୟ । ସାମୁଦ୍ରିକ ମତ୍ସ୍ୟ ବିକାଶ ପାଇଁ ଏଠାରେ ଅପାର ସୁଯୋଗ ରହିଛି । ତେଣୁ ସାମୁଦ୍ରିକ ଅର୍ଥନୀତିକୁ କିଭଳି ମଜଭୁତ କରାଯିବ ସେନେଇ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି । ସେଥିପାଇଁ ସମୁଦ୍ରରୁ ଉତ୍ପାଦନ ହେଉଥିବା ଚିଙ୍ଗୁଡ଼ି ସମେତ ସାମୁଦ୍ରିକ ଓ ମଧୁର ଜଳ ମାଛ ଉତ୍ପାଦନ ବଢ଼ାଯିବ ।
ସରକାରଙ୍କ ତଥ୍ୟ ଅନୁସାରେ, ଏବେ ବାର୍ଷିକ ୧୧ ଲକ୍ଷ ୨୦ହଜାର ଟନ୍ ମତ୍ସ୍ୟ ଓ ଅନ୍ୟାନ୍ୟ ଜଳଜୀବ(ଚିଙ୍ଗୁଡ଼ି, କଙ୍କଡ଼ା) ଉତ୍ପାଦନ ହେଉଛି । ଆସନ୍ତା ୫ବର୍ଷରେ ଏହି ଉତ୍ପାଦନ ୨୨ଲକ୍ଷ ଟନ୍ ଓ ୨୦୩୬ ସୁଦ୍ଧା ୩୩ ଲକ୍ଷ ଟନ୍ରେ ପହଞ୍ଚିବ । ବର୍ତ୍ତମାନ ରାଜ୍ୟରେ ୨ଲକ୍ଷ ୨୦ହଜାର ଟନ୍ ଲୁଣି ମାଛ ଉତ୍ପାଦନ ହେଉଥିବା ବେଳେ ୭ ଲକ୍ଷ ୩୦ହଜାର ଟନ୍ ମଧୁର ମାଛ ଉତ୍ପାଦନ ହେଉଛି । ତଥାପି ଆମେ ବାହାର ରାଜ୍ୟରୁ ମଧୁର ମାଛ ଆଣୁଛୁ । ୨୦୨୯ ସୁଦ୍ଧା ରାଜ୍ୟରେ ୩ଲକ୍ଷ ୫୦ହଜାର ଟନ୍, ୨୦୩୬ ସୁଦ୍ଧା ୪ଲକ୍ଷ ୫୦ହଜାର ଟନ୍ ସାମୁଦ୍ରିକ ମାଛ ଉତ୍ପାଦନ ହେବ । ଆଗାମୀ ୫ବର୍ଷରେ ୧୩ଲକ୍ଷ ୫୦ହଜାର ଟନ୍ ଓ ୧୦ବର୍ଷରେ ୧୯ଲକ୍ଷ ୫୦ହଜାର ଟନ୍ ମିଠା ଜଳ ମାଛ ଉତ୍ପାଦନ କରିବାକୁ ଲକ୍ଷ୍ୟ ରଖିଛନ୍ତି ସରକାର।
ଉଲ୍ଲେଖଯୋଗ୍ୟ, ଦେଶରେ ମାଛ ଖାଉଥିବା ଲୋକଙ୍କ ମଧ୍ୟରେ ଓଡ଼ିଶା ଏକ ପ୍ରମୁଖ ରାଜ୍ୟ । ଜାତୀୟ ପରିବାର ସ୍ୱାସ୍ଥ୍ୟ ସର୍ବେକ୍ଷଣ-୫(୨୦୧୯-୨୦) ଅନୁସାରେ, ଓଡ଼ିଶାରେ ୯୪.୭୫% ଲୋକ ମାଛ ଖାଆନ୍ତି । ୨୦୧୯-୨୦ରେ ଓଡ଼ିଶାରେ ମୁଣ୍ଡ ପିଛା ମାଛ ବ୍ୟବହାର ୧୬.୨୪ କିଲୋଗ୍ରାମ ଥିବା ବେଳେ ୨୦୨୩-୨୪ରେ ଏହା ୧୮.୩୩କିଗ୍ରାରେ ପହଞ୍ଚିଛି । ତଥ୍ୟ ଉପରେ ନଜର ଦେଲେ, ଏବେ ବାର୍ଷିକ ୪ କୋଟି ଟଙ୍କାର ଚିଙ୍ଗୁଡ଼ି ରପ୍ତାନୀ ହେଉଛି । ୨୦୨୯ରେ ୧୦ କୋଟି ଓ ୨୦୩୬ରେ ୨୫ କୋଟି ଟଙ୍କାର ଚିଙ୍ଗୁଡ଼ି ରପ୍ତାନୀ ହେବ । ସେହିପରି ଏବେ ରାଜ୍ୟରେ ୨୮ଟି ଚିଙ୍ଗୁଡ଼ି ହାଚେରୀ ଅଛି । ୨୦୨୯ରେ ୪୨ ଓ ୨୦୩୬ରେ ୭୩ଟି ହାଚେରୀ ନିର୍ମାଣ ହେବ । ରାଜ୍ୟରେ ୨୦୩୬ ସୁଦ୍ଧା ୩ଟି ଗଭୀର ସମୁଦ୍ର ମାଛଧରା ବନ୍ଦର ସହ ୧୧୫ଟି ମାଛଧରା ବନ୍ଦର ଏବଂ ଅବତରଣ କେନ୍ଦ୍ର ପ୍ରତିଷ୍ଠା ହେବ । ଗୋପାଳପୁରରେ ପ୍ରଥମ ଗଭୀର ସମୁଦ୍ର ମାଛଧରା ବନ୍ଦର ଓ ଅସ୍ତରଙ୍ଗ, ଚୁଡ଼ାମଣି, ଗୋପାଳପୁର ଓ ବାହାବଳପୁରରେ ମାଛଧରା ବନ୍ଦର ରହିବ । ଏହି ଯୋଜନା ଯଦି ସଫଳ ହୁଏ ତେବେ ଓଡ଼ିଶା ଚିଙ୍ଗୁଡ଼ି ଉତ୍ପାଦନ ଓ ରପ୍ତାନୀରେ ଶ୍ରେଷ୍ଠ ୨ରାଜ୍ୟ ମଧ୍ୟରେ ସ୍ଥାନ ପାଇବ । ଏଥିସହ ମଧୁରଜଳ ସାମୁଦ୍ରିକ ଖାଦ୍ୟ ପ୍ରଜାତିରୁ ଉତ୍ପାଦନ ଓ ରପ୍ତାନୀ ପାଇଁ ଶ୍ରେଷ୍ଠ ୩ ରାଜ୍ୟ ମଧ୍ୟରେ ରହିବ ।
