ଭୋଗରାଇ,୧୪/୧୧: ଭୋଗରାଇରେ ବୁଲା କୁକୁରର ଆତଙ୍କ । ଘରେ ପଶି ବୃଦ୍ଧାଙ୍କୁ କାମୁଡିବା ସହ ଝୁଣି ମାରିଦେଲା ପାଗଳ କୁକୁର । ଘଟଣାସ୍ଥଳରେ ବୃଦ୍ଧାଙ୍କ ପ୍ରାଣବାୟୁ ଉଡିଯାଇଛି । ମୃତ ବୃଦ୍ଧା ଜଣକ ବାସନ୍ତୀ ସାହୁ ବୋଲି ଜଣାପଡ଼ିଛି । ଏଭଳି ଘଟଣା ପରେ ଏହି ଅଞ୍ଚଳରେ ଶୋକର ଛାୟା ଖେଳି ଯାଇଛି । ବାଲେଶ୍ବର ଜିଲ୍ଲା ଭୋଗରାଇ ବ୍ଲକ୍ ଜୟରାମପୁର ଗାଁରେ ଏଭଳି ଅଘଟଣ ଘଟିଛି ।
ସୂଚନା ମୁତାବକ, ଜୟରାମପୁର ଗାଁର ମହିଳାମାନେ ପଞ୍ଚୁକ ବ୍ରତ ପାଳନ କରିବା ପାଇଁ ବାହାରକୁ ଯାଇଥିଲେ । ଏହି ସମୟରେ ବୃଦ୍ଧା ଜଣକ ଘରେ ଥିବା ବେଳେ ହଠାତ ଏକ ପାଗଳ କୁକୁର ଘର ଭିତରକୁ ପଶି ତାଙ୍କୁ କାମୁଡି ଦେଇଥିଲା । ଫଳରେ ଯନ୍ତ୍ରଣାରେ ବୃଦ୍ଧା ଜଣକ ଚିତ୍କାର କରିଥିଲେ । ଏହା ଶୁଣି ପଡୋଶୀ ଲୋକ ଦୌଡ଼ି ଆସି ତାଙ୍କୁ ରକ୍ଷା କରିବାକୁ ଚେଷ୍ଟା କରିଥିଲେ । କିନ୍ତୁ କୁକୁରଟି ବୃଦ୍ଧାଙ୍କୁ ଛାଡ଼ି ନଥିଲା । କୁକୁରଟି ବୃଦ୍ଧାଙ୍କ ଶରୀରର ପ୍ରାୟତଃ ସମସ୍ତ ଅଂଶକୁ କାମୁଡ଼ି ରକ୍ତାକ୍ତ କରି ସାରିଥିଲା । ଏହା ଦେଖି କୁକୁରକୁ ବାଡେଇ ବୃଦ୍ଧାଙ୍କୁ ଉଦ୍ଧାର କରିବାକୁ ପ୍ରୟାସ କରିଥିଲେ । କିନ୍ତୁ କୁକୁରଟି ତାଙ୍କୁ ଛାଡ଼ି ନଥିଲା । ଶେଷରେ ବାଧ୍ୟ ହୋଇ କୁକୁରକୁ ପିଟି ପିଟି ମାରିଥିଲେ ଲୋକେ କିନ୍ତୁ ଏହାରି ଭିତରେ ବୃଦ୍ଧାଙ୍କର ମୃତ୍ୟୁ ହୋଇଥିଲା ।
