ପାଟଣାଗଡ, ୧/୨(ଆପ୍ର): ଭତ୍ତା ଆଣିବା ପାଇଁ ଜଣେ ବୃଦ୍ଧା ଦିନ ଦ୍ୱିପ୍ରହରରେ ରାସ୍ତା ମଝିରେ ଘୁସୁରି ଘୁସୁରି ଆସୁଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏଭଲି ଏକ ଅଭାବନୀୟ ଘଟଣା ଘଟିଛି ବଲାଙ୍ଗୀର ଜିଲ୍ଲା ପାଟଣଗଡ ବ୍ଲକ ଫଟ୍ଟାମୁଣ୍ଡା ପଞ୍ଚାୟତରେ । ଉକ୍ତ ବୃଦ୍ଧା ଜଣକ ହେଲେ ପାଣ୍ଡେସରା ଗାଁର ସୁରେଖା ନାଏକ ।
ସୁରେଖା ବାର୍ଦ୍ଧକ୍ୟ ଜନିତ ଅସୁବିଧା ଯୋଗୁଁ ଚଲାବୁଲା କରିପାରୁ ନାହାଁନ୍ତି । ପ୍ରତିମାସ ପଞ୍ଚାୟତକୁ ଭତ୍ତା ଟଙ୍କା ଆଣିବା ପାଇଁ ଅଟୋଭଡା ୨ ସହ ଟଙ୍କା ଦେଇଥାନ୍ତି । ଗତକାଲି ଅଟୋ ନମିଳିବାରୁ ସେ ସାହାସ ଜୁଟାଇ ଗାଁରୁ ୨ କିଲୋମିଟର ଦୂରରେ ଥିବା ପଞ୍ଚାୟତକୁ ୧ ହଜାର ଭତ୍ତାଟଙ୍କା ପାଇଁ ରାସ୍ତାରେ ଘୁସୁରି ଘୁସୁରି ଯାଇଥିଲେ ।
ଭତ୍ତା ଟଙ୍କା ନେଇ ଫେରୁଥିବା ସମୟରେ ସେହିରାସ୍ତା ଦେଇ ଆସୁଥିବା ଏକ ଟ୍ରାକ୍ଟର ବୃଦ୍ଧା ଜଣକୁ ଦେଖି ଅଟକିଥିଲା । ସେହି ଟ୍ରାକ୍ଟରରେ କାମକରି ଯାଇଥିବା ଶ୍ରମିକମାନେ ବୃଦ୍ଧାଙ୍କ ପ୍ରତି ସହାନୁଭୂତି ଦେଖାଇ ଟ୍ରାକ୍ଟର ଉପରେ ବୃଦ୍ଧାଙ୍କୁ ବସାଇ ତାଙ୍କଘରେ ଛାଡି ଦେଇଥିଲେ । ଯାହାର ଏକ ଭିଡିଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ତେବେ ଭତ୍ତା ପାଇଁ ଜଣେ ବୃଦ୍ଧା ଦିନ ଦିଇ ପହରେ ବିଚ୍ ରାସ୍ତାରେ ଘୁସୁରି ଘୁସୁରି ଯାଉଥିବା ପାଟଣାଗଡ ବ୍ଲକ ପ୍ରଶାସନର ପାରିବାପଣିଆ ଉପରେ ଅଙ୍ଗୁଳି ନିର୍ଦ୍ଦେଶ କରିଛି ।
