ଆନନ୍ଦପୁର,୩।୧୦ : ଘଷିପୁରା ବ୍ଲକ୍ ପୁରୁଣାବାନ୍ଦୋଗଡା ପଞ୍ଚାୟତ ସରପଞ୍ଚଙ୍କ ଦିଅରକୁ ମରଣାନ୍ତକ ଆକ୍ରମଣ କରାଯାଇଛି । ଠେଙ୍ଗା ଓ ଲୁହାରଡରେ ଆକ୍ରମଣ ଯୋଗୁଁ ତାଙ୍କର ଦୁଇଟି ଗୋଡ ଭାଙ୍ଗି ଯାଇଛି । ଗୁରୁତର ଅବସ୍ଥାରେ ସରପଞ୍ଚ ଙ୍କ ଦିଅର ସୁଜିତ୍ କୁମାର ଧିରଙ୍କୁ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଛି ।
ବୁଧବାର ଗ୍ରାମସଭା ଚାଲିଥିଲା। ଏହି ସମୟରେ ପ୍ରତିପକ୍ଷ ଗୋଷ୍ଠୀର କିଛି ଲୋକେ ଗ୍ରାମସଭାକୁ ବିରୋଧ କରି ହୋହାଲ୍ଲା କରିବା ସହ ଫାଇଲ ପତ୍ର ଫୋପଡା ଫିଙ୍ଗା କରିଥିଲେ । ସୁଜିତଙ୍କ ସହ ସେମାନଙ୍କର ବଚସା ହୋଇଥିଲା । ଆଜି ସୁଜିତ୍ ନିଜ ସ୍ତ୍ରୀ ଙ୍କୁ ଧରି ବାଇକ୍ ରେ ଯାଉଥିଲେ। ଏହି ସମୟରେ ଗତକାଲିର ଘଟଣାକୁ କେନ୍ଦ୍ରକରି ଗାଁ ନିକଟରେ କେତେ ଜଣ ତାଙ୍କୁ ଅଟକାଇ ଅତର୍କିତ ଆକ୍ରମଣ କରିଥିବା ଅଭିଯୋଗ ହୋଇଛି । ତେବେ ଏହି ଘଟଣାରେ ବର୍ତ୍ତମାନ ସୁଦ୍ଧା ଥାନାରେ ଅଭିଯୋଗ ହୋଇନାହିଁ । ରାମଚନ୍ଦ୍ରପୁର ପୋଲିସ ଘଟଣା ସମ୍ପର୍କରେ ଖବରପାଇ ଗାଁରେ ପହଁଞ୍ଚି ତଦନ୍ତ ଆରମ୍ଭ କରିଛି ।
