ନୂଆଦିଲ୍ଲୀ,୨୪/୦୭: ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ସହ ସ୍କଟଲାଣ୍ଡର ଗ୍ଲୋସଗୋରେ ଉଦ୍‌ଘାଟିତ ହୋଇଛି ୨୩ତମ ରାଜ୍ୟଗୋଷ୍ଠୀ କ୍ରୀଡ଼ା । ଦ ହାଇଡ୍ରୋ ଇନ୍‌ଡୋର ଷ୍ଟାଡିୟମରେ ଏହି ଉତ୍ସବ ଆୟୋଜିତ ହୋଇଥିଲା । ୯୬ ବର୍ଷ ରାଜ୍ୟଗୋଷ୍ଠୀ କ୍ରୀଡ଼ା ଇତିହାସରେ ପ୍ରଥମ ଥର କ୍ରୀଡ଼ାର ଉଦ୍‌ଘାଟନୀ ଇନ୍‌ଡୋର ଷ୍ଟାଡିୟମରେ ଆୟୋଜନ କରାଯାଇଥିଲା । ରାଜା ଚାର୍ଲ୍ସ ଓ ରାଣୀ କାମିଲା ଟାର୍ଡିସ (ସମୟ ଯନ୍ତ୍ର)ରୁ ବାହାରିବା ପରେ ଆସନ ଅଳଂକୃତ କରିଥିଲେ । ଏହାପରେ ପରେଡ ଆରମ୍ଭ ହୋଇଥିଲା । ପର୍ଯ୍ୟାୟକ୍ରମିକ ଭାବେ ୭୪ଟି ଅଂଶ ଗ୍ରହଣକାରୀ ଦେଶର ଖେଳାଳି ଏଥିରେ ସାମିଲ ହୋଇଥିଲେ । ପରେଡ ପରେ ଆରମ୍ଭ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ । ଏଥିରେ ସ୍କଟଲାଣ୍ଡର କଳା, ସଂସ୍କୃତି ଓ ଐତିହ୍ୟ ପ୍ରତିଫଳିତ ହୋଇଥିଲା । ବିଭିନ୍ନ ପ୍ରତିଷ୍ଠିତ କଳାକାରଙ୍କ ଦ୍ୱାରା କାର୍ଯ୍ୟକ୍ରମ ପରିବେଶଣ କରାଯାଇଥିଲା । 

ଏହି କ୍ରୀଡ଼ା ଆସନ୍ତା ୨ ତାରିଖରେ ଉଦ୍‌ଯାପିତ ହେବ । ଏହାର ପରବର୍ତ୍ତୀ ସଂସ୍କରଣରେ ଭାରତରେ ଆୟୋଜିତ ହେବ । ଅହମ୍ମଦାବାଦ ସଂସ୍କରଣ ହେବ ରାଜ୍ୟଗୋଷ୍ଠୀ କ୍ରୀଡ଼ା ଇତିହାସର ଶତାବ୍ଦୀ ସଂସ୍କରଣ । ଅଷ୍ଟ୍ରେଲିଆର ଭିକ୍ଟୋରିଆ ୨୦୨୬ ସଂସ୍କରଣ ଆୟୋଜନରୁ ଓହରି ଯିବା ପରେ ସ୍କଟଲାଣ୍ଡ ସୀମିତ ସମୟ ମଧ୍ୟରେ କ୍ରୀଡ଼ା ଆୟୋଜନ କରିଥିବାରୁ ଏହାକୁ ୧୦ କ୍ରୀଡ଼ା ମଧ୍ୟରେ ସୀମିତ ରଖାଯାଇଛି । ତେଣୁ ୧୦ଟି କ୍ରୀଡ଼ାରେ ୨୧୫ଟି ଇଭେଣ୍ଟ ଆୟୋଜିତ ହେବ । ୭୪ଟି ଦେଶରୁ ୩୦୦୦ କ୍ରୀଡ଼ାବିତ ଅଂଶ ଗ୍ରହଣ କରିଛନ୍ତି । ପରେଡରେ ତ୍ରିରଙ୍ଗା ଧରି ଭାରତୀୟ ଦଳର ନେତୃତ୍ୱ ନେଇଥିଲେ ମହିଳା ଭାରୋତ୍ତୋଳକ ମୀରାବାଈ ଚାନୁ ଓ ବକ୍ସର ଲଭ୍‌ଲିନା ବୋର୍ଗୋହେଁ । ୧୨୫ ଜଣ ଭାରତୀୟ ବିଭିନ୍ନ ୮ଟି କ୍ରୀଡ଼ାରେ ଭାଗ ନେଇଛନ୍ତି ।