ନୂଆଦିଲ୍ଲୀ,୭।୫: ପହଲଗାମ୍ ଆତଙ୍କୀ ହମଲାର ବଡ଼ ଜବାବ୍ ଦେଇଛି ଭାରତ। ‘ଅପରେସନ୍ ସିନ୍ଦୂର’ଏବେ ପାକିସ୍ତାନକୁ କରିଛି ଭୟଭୀତ। ଭାରତର ଆକ୍ରମଣ ଯୋଗୁଁ ବ୍ୟାପକ କ୍ଷୟକ୍ଷତିର ସମ୍ମୁଖୀନ ହୋଇଛି ପାକିସ୍ତାନ । ଭାରତର ଆକ୍ରମଣ ଜବାବରେ ଆକ୍ରମଣ କରିବାକୁ ପାକ୍ ସେନା ଓ ସରକାର ପ୍ରସ୍ତୁତ ହେଉଛନ୍ତି । ଏଥିପାଇଁ ପାକ ପ୍ରଧାନମନ୍ତ୍ରୀ ଶେହବାଜ ସରିଫ ପାକିସ୍ତାନ ସେନାକୁ ଅନୁମତି ପ୍ରଦାନ କରିଛନ୍ତି । ଏଥିପାଇଁ ପାକିସ୍ତାନ ପ୍ରଧାନମନ୍ତ୍ରୀ ତୁରନ୍ତ ଏକ ବୈଠକ ଡକାଇଥିଲେ। ରାଷ୍ଟ୍ରୀୟ ସୁରକ୍ଷା ସମିତି(ଏନ୍ଏସ୍ସି) ବୈଠକରେ ପ୍ରଧାନମନ୍ତ୍ରୀ ଶେହବାଜ ସରିଫ୍, ସେନା ମୁଖ୍ୟ ମୁନିରଙ୍କ ସହ ଅନ୍ୟ ସବୁ ବରିଷ୍ଠ ଅଧିକାରୀ ଯୋଗ ଦେଇଥିଲେ। ଏହି ସମୟରେ ପାକିସ୍ତାନ କହିଛି ଆମେ କେବେ ବି ଏହି ଆକ୍ରମଣକୁ ବରଦାସ୍ତ କରିବୁନି। ଏବେ ଯାହା ପରିଣାମ ହେବ, ସେଥିପାଇଁ ଭାରତ ଦାୟୀ ହେବ।
ଏହି ବୈଠକରେ କୁହାଯାଇଛି ଭାରତର କାର୍ଯ୍ୟାନୁଷ୍ଠାନ ଉପସାଗରୀୟ ଦେଶର ବାଣିଜ୍ୟିକ ଏୟାରଲାଇନ୍ସର ଅଧିକ କ୍ଷତି କରିଛି। ଫଳରେ ହଜାର ହଜାର ଯାତ୍ରୀଙ୍କ ଜୀବନ ବିପଦରେ ପଡିଯାଇଛି। ପାକିସ୍ତାନ କହିଛି, ଜାତିସଂଘର ଚାର୍ଟର ଧାରା-୫୧ ଅନୁସାରେ, ପାକିସ୍ତାନକୁ ଆତ୍ମରକ୍ଷାର ଅଧିକାର ପାକିସ୍ତାନର ରହିଛି । ଜବାବୀ କାର୍ଯ୍ୟାନୁଷ୍ଠାନ ପାଇଁ ପାକିସ୍ତାନ ନିଜେ ସ୍ଥାନ, ସମୟ ଓ ପଦ୍ଧତି ନିଶ୍ଚିତ କରିବ । ପାକିସ୍ତାନ ସରକାର ଓ ସେନା ଭାରତର ଏହି ଆକ୍ରମଣକୁ ନିନ୍ଦା କରିଥିଲେ ଓ ଏହା ଦ୍ବାରା ନିରୀହ ନାଗରିକ, ମହିଳା ଓ ଶିଶୁମାନଙ୍କୁ ଟାର୍ଗେଟ୍ କରାଯାଉଛି । ଏହା ପାକିସ୍ତାନର ସାର୍ବଭୌମତ୍ବର ହନନ ବୋଲି ପାକ ସରକାର କହିଛନ୍ତି ।
