ନୂଆଦିଲ୍ଲୀ,୦୨/୦୫: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ସମସ୍ୟା ପୁଣି ବଢ଼ିବା ଭଳି ମନେହେଉଛି। ଅନ୍ତର୍ଜାତୀୟ ଅପରାଧ ନ୍ୟାୟାଧିକରଣ ଶେଖ୍ ହସିନା ଏବଂ ତାଙ୍କ ସହଯୋଗୀଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛି। ଏକ ଅଡିଓ କ୍ଲିପ୍ ଆଧାରରେ, ଜଷ୍ଟିସ୍ ମୁର୍ଜତା ମଜୁମଦାରଙ୍କ ନେତୃତ୍ୱାଧୀନ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି।
୧୫ ମେ' ସୁଦ୍ଧା ଜବାବ ରଖିବାକୁ ନିର୍ଦ୍ଦେଶ:
ଶେଖ୍ ହାସିନାଙ୍କ ଉପରେ ନ୍ୟାୟିକ ପ୍ରକ୍ରିୟାରେ ହସ୍ତକ୍ଷେପ କରିବା ଏବଂ ଧମକ ଦେବାର ଅଭିଯୋଗ ଆସିଛି। ଆଇସିଟି ପବ୍ଲିକ ପ୍ରସିକ୍ୟୁଟର ଗାଜି ଏମଏଚ୍ ତମିମ କହିଛନ୍ତି ଯେ,' ହସିନା ଏବଂ ବଂଲାଦେଶ ଛେତ୍ର ଲିଗ୍ (ବିସିଏଲ୍) ନେତା ଶକିଲ ଆଲମ ବୁଲବୁଲ ମେ' ୧୫ ତାରିଖ ମଧ୍ୟରେ କାରଣ ଦର୍ଶାଅ ନୋଟିସର ଜବାବ ରଖିବାକୁ ଦିଆଯାଇଛି।" ନିକଟରେ, ସୋସିଆଲ ମିଡିଆରେ ଏକ ଅଡିଓ କ୍ଲିପ୍ ଭାଇରାଲ ହେଊଛି, ଯେଉଁଥିରେ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ କହୁଛନ୍ତି ଯେ, "ମୋ ପାଖରେ ୨୨୭ ଜଣଙ୍କୁ ହତ୍ୟା କରିବାର ଲାଇସେନ୍ସ ଅଛି। ମୋ ବିରୁଦ୍ଧରେ ୨୨୭ଟି ମାମଲା ରୁଜୁ ହୋଇଛି।" ଓକିଲ ତମିମ କହିଛନ୍ତି ଯେ କ୍ଲିପ୍ର ଫରେନସିକ୍ ତଦନ୍ତ ପରେ ଆଇସିଟି ଏହି ନୋଟିସ୍ ଜାରି କରିଛି।
ଏହା ବ୍ୟତୀତ, ଗୁରୁବାର ଦିନ ଅନ୍ତର୍ଜାତୀୟ ଅପରାଧ ନ୍ୟାୟାଧିକରଣ ଗତ ବର୍ଷ ଜୁଲାଇ ମାସରେ ନାରାୟଣଗଞ୍ଜରେ ହୋଇଥିବା ଜନବିଦ୍ରୋହ ସମୟରେ ମାନବତା ବିରୁଦ୍ଧରେ ଅପରାଧ କରିଥିବା ଆଠ ଜଣଙ୍କ ବିରୁଦ୍ଧରେ ଗିରଫ ପରୱାନା ଜାରି କରିଛନ୍ତି। ଆଇସିଟିର ମୁଖ୍ୟ ପବ୍ଲିକ ପ୍ରସିକ୍ୟୁଟର ମହମ୍ମଦ ତାଜୁଲ ଇସଲାମ କହିଛନ୍ତି ଯେ ଅଭିଯୁକ୍ତମାନେ ନାରାୟଣଗଞ୍ଜରେ ବ୍ୟାପକ ବିରୋଧ ପ୍ରଦର୍ଶନ ସମୟରେ ସାଧାରଣ ଲୋକଙ୍କ ଉପରେ ନିର୍ମମ ଆକ୍ରମଣରେ ସାମିଲ ଥିଲେ।
କହି ରଖୁଛୁ ଯେ, ଗତ ବର୍ଷ ୫ ଅଗଷ୍ଟରେ ଛାତ୍ର ନେତୃତ୍ୱାଧୀନ ଏକ ବିଶାଳ ଆନ୍ଦୋଳନ ପରେ ହସିନା ଭାରତ ପଳାଇ ଆସିଥିଲେ, ଯାହା ଫଳରେ ତାଙ୍କ ୧୫ ବର୍ଷର ସରକାରର ପତନ ଘଟିଥିଲା। ତିନି ଦିନ ପରେ, ମହମ୍ମଦ ୟୁନୁସ୍ ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ପରାମର୍ଶଦାତା ଭାବରେ କାର୍ଯ୍ୟଭାର ଗ୍ରହଣ କରିଥିଲେ।
