ଦାରିଙ୍ଗବାଡି,୧୮/୩(ଆପ୍ର): ସ୍ଥାୟୀ ନିଯୁକ୍ତି ଓ ଛଟେଇ କର୍ମଚାରୀଙ୍କୁ ପୁନଃନିଯୁକ୍ତି ଦାବିରେ କଳାବ୍ୟାଜ ପରିଧାନ କରି ଆଉଟସୋର୍ସିଂ କର୍ମଚାରୀ ପ୍ରତିବାଦ କରିଛନ୍ତି । ଆସନ୍ତା ୨୧ ତାରିଖ ପର୍ଯ୍ୟନ୍ତ ଏଭଳି କଳାବ୍ୟାଜ ପିନ୍ଧି କର୍ମଚାରୀମାନେ ପ୍ରତିବାଦ କରିବେ ।
ଗତ ୧୨ ତାରିଖରେ ଏନେଇ ଜିଲ୍ଲା ମୁଖ୍ୟାଳୟରେ ଶାନ୍ତିପୂର୍ଣ୍ଣ ଭାବେ ଶୋଭାଯାତ୍ରା କରି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରିଥିଲେ । ହେଲେ ଦାବି ପୂରଣ ନେଇ ଦାରିଙ୍ଗବାଡି ବ୍ଲକ କାର୍ଯ୍ୟାଳୟରେ କାର୍ଯ୍ୟରତ ଆଉଟସୋର୍ସିଂ କର୍ମଚାରୀ ସୋମବାର ଠାରୁ କଳାବ୍ୟାଜ ପରିଧାନ କରି କାର୍ଯ୍ୟ କରୁଥିବା ଦେଖିବାକୁ ମିଳିଛି । ଆସନ୍ତା ୨୧ ତାରିଖ ପର୍ଯ୍ୟନ୍ତ ଏଭଳି କଳାବ୍ୟାଜ ପିନ୍ଧି ପ୍ରତିବାଦ କରିବା ନେଇ ଜିଲ୍ଲା ସଂଘ ପକ୍ଷରୁ ନିଷ୍ପତ୍ତି ନିଆଯାଇଥିବା କର୍ମଚାରୀ ସୂଚନା ଦେଇଛନ୍ତି । ଆଉଟସୋର୍ସିଂ କର୍ମଚାରୀ କୁଳମଣି ବେହେରା, ପୁରନ୍ତ ପ୍ରଧାନ, ବିକ୍ରମ ନାୟକ, ବିନାୟକ ଡାକୁଆ, ରାଜୀବ ପ୍ରଧାନ,ରଞ୍ଜିତ ଦିଗାଲ, ହିମାଂଶୁ ନାୟକ,ବାବୁନି ଉଠାନସିଂ, ଚୁମକି ଡାକୁଆ, ଚକ୍ରଧର ବଳିଆରସିଂ,ରଶ୍ମିତା ବେହେରା ପ୍ରମୁଖ କଳାବ୍ୟାଜ ପରିଧାନ କରିଥିଲେ ।
