ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପହଲଗାମର ବୈସରଣ ଉପତ୍ୟକାରେ ମଙ୍ଗଳବାର ଏକ ଭୟଙ୍କର ଆତଙ୍କବାଦୀ ଆକ୍ରମଣରେ ଅତି କମରେ ୨୬ ଜଣ ପର୍ଯ୍ୟଟକଙ୍କ ମୃତ୍ୟୁ ଘଟିଛି। ଏହି ଆକ୍ରମଣରେ ଦୁଇ ଜଣ ବିଦେଶୀ ନାଗରିକ ମଧ୍ୟ ସାମିଲ ରହିଛନ୍ତି। ‘ମିନି ସ୍ଵିଟ୍ଜରଲ୍ୟାଣ୍ଡ’ ଭାବେ ପରିଚିତ ଏହି ସ୍ଥାନରେ ପାକିସ୍ତାନ ସମର୍ଥିତ ଆତଙ୍କବାଦୀମାନେ ଏକ ନିର୍ଦ୍ଦିଷ୍ଟ ଯୋଜନାରେ ଏହି ଆକ୍ରମଣ କରିଥିବା ଜଣାପଡ଼ିଛି।

ଆକ୍ରମଣର ପୃଷ୍ଠଭୂମି:

ବୈସରଣ ଉପତ୍ୟକା, ଯାହା ପହଲଗାମ ସହରଠାରୁ ପ୍ରାୟ ୫.୫ କିଲୋମିଟର ଦୂରରେ ଅବସ୍ଥିତ, ଏକ ଦୁର୍ଗମ ସ୍ଥାନ ଭାବେ ପରିଚିତ। କିନ୍ତୁ ଏଠାରେ ଭରି ରହିଥିବା ପ୍ରାକୃତିକ ସୈନ୍ଧର୍ଯ୍ୟକୁ ଉପଭୋଗ କରିବା ପାଇଁ ହଜାର ହଜାର ପର୍ଯ୍ୟଟକ ଏହି କ୍ଲିଷ୍ଟ ପଥ ଅତିକ୍ରମ କରି ଦେଖିବାକୁ ଆସିଥାନ୍ତି। ଏହି ଉପତ୍ୟାକାକୁ ଏକ ସର୍ପିଲ ଟ୍ରେକିଂ ରୁଟ ଦେଇ ପହଞ୍ଚିବା ସମ୍ଭବ। ଯାହା ନଦୀ, ଘନ ଜଙ୍ଗଲ ଓ କାଦୁଅ ରାସ୍ତା ଦେଇ ଗତି କରିଥାଏ। ଏହି ରାସ୍ତାର ଅନେକ ଅଂଶ ଗାଡ଼ି ଚଳାଚଳ ପାଇଁ ଅନୁପଯୁକ୍ତ। କାରଣ ଏଠାରେ ପହଞ୍ଚିବାକୁ ଯାଇଥିବା ରାସ୍ତା ଏତେ କଦର୍ମାକ୍ତ ଓ ଚିକ୍କଣ ଯେ ଚକା ଖସିଯିବାର ଭୟ ଥାଏ। ଆଉ ଏହା ଏକ ଘାଟି ଅଞ୍ଚଳ ହୋଇଥିବାରୁ ଜୀବନ ଯିବାର ମଧ୍ୟ ଭୟ ରହିଛି। ଏଣୁ ପର୍ଯ୍ୟଟକମାନେ ଏହି ସ୍ଥାନକୁ ପାଦ ବା ତଟୁ ଘୋଡ଼ା ସାହାଯ୍ୟରେ ପହଞ୍ଚିଥାନ୍ତି। ଏହି ଦୁର୍ଗମ ଭୂଖଣ୍ଡ ଯୋଗୁଁ ଆତଙ୍କବାଦୀମାନେ ଏହି ସ୍ଥାନକୁ ଆକ୍ରମଣ ପାଇଁ ବାଛିଥିବା ବିଶ୍ଲେଷଣ କରାଯାଇଛି।

ସୁରକ୍ଷାରେ ତ୍ରୁଟି:

ବୈସରଣ ଉପତ୍ୟକାରେ ପର୍ଯ୍ୟଟକଙ୍କ ବହୁଳ ଆଗମନ ସତ୍ତ୍ଵେ ପାହାଲଗାମ-ବୈସରଣ ରୁଟରେ କୌଣସି ସୁରକ୍ଷା ବ୍ୟବସ୍ଥା ନଥିଲା। ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ’ର ଜଣେ ସାମ୍ବାଦିକଙ୍କ ଏନେଇ ମତ୍ତ ରକି କହିଛନ୍ତି ଯେ, ଆକ୍ରମଣ ପରେ ଘଟଣାସ୍ଥଳକୁ ଯିବା ବେଳେ ଏହି ୫.୫ କିଲୋମିଟର ଲମ୍ବ ରାସ୍ତାରେ ଗୋଟିଏ ମଧ୍ୟ ପୁଲିସ ପୋଷ୍ଟ ଦେଖାଯାଇ ନଥିଲା। ଏହି ସୁରକ୍ଷା ଜନିତ ଅଭାବ ଆତଙ୍କବାଦୀମାନଙ୍କୁ ସୁଯୋଗ ପ୍ରଦାନ କରିଥିଲା।

ଆକ୍ରମଣର ବିବରଣୀ:

ମଙ୍ଗଳବାର ଦିନ ଦ୍ଵିପ୍ରହର ପ୍ରାୟ ୨ଟା ୩୦ ସମୟରେ ସଶସ୍ତ୍ର ଆତଙ୍କବାଦୀମାନେ, ସୈନ୍ୟ ପୋଷାକ ଓ କୁର୍ତ୍ତା-ପାଜାମାରେ ସଜ୍ଜିତ ହୋଇ ବୈସରଣର ଖୋଲା ପ୍ରାନ୍ତରରେ ପର୍ଯ୍ୟଟକଙ୍କ ଉପରେ ଅତର୍କିତ ଭାବେ ଗୁଳି ଚଳାଇଥିଲେ। ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ଆତଙ୍କବାଦୀମାନେ ନିକଟରେ ଥିବା ପାଇନ ଜଙ୍ଗଲରୁ ବାହାରି ନିକଟ ଦୂରତାରୁ ଗୁଳି ଚଳାଇଥିଲେ। ଯାହା ଫଳରେ ଅନେକ ପର୍ଯ୍ୟଟକ ପ୍ରାଣ ହରାଇଥିଲେ ଏବଂ ଅନ୍ୟମାନେ ଆହତ ହୋଇଥିଲେ। ଖୋଲା ପ୍ରାନ୍ତରରେ ଲୁଚିବା ପାଇଁ କୌଣସି ସ୍ଥାନ ନଥିବାରୁ ପର୍ଯ୍ୟଟକମାନେ ଆତଙ୍କିତ ହୋଇ ଦୌଡ଼ିବାକୁ ଚେଷ୍ଟା କରିଥିଲେ।

ଦାୟୀ ସଂଗଠନ:

ପାକିସ୍ତାନର ଆତଙ୍କବାଦୀ ସଂଗଠନ ଲସ୍କର-ଏ-ତୋଇବାର ଏକ ସ୍ଥାନୀୟ ଶାଖା ଦ ରେଜିଷ୍ଟାନ୍ସ ଫ୍ରଣ୍ଟ (ଟିଆରଏଫ) ଏହି ଆକ୍ରମଣର ଦାୟିତ୍ଵ ଗ୍ରହଣ କରିଛି। ଗୁଇନ୍ଦା ସୂତ୍ର ଅନୁସାରେ, ଏହି ଆକ୍ରମଣର ମୁଖ୍ୟ ଯୋଜନା ଲସ୍କର-ଏ-ତୋଇବାର ଶୀର୍ଷ କମାଣ୍ଡର ସୈଫୁଲ୍ଲା କାସୁରୀ ଓ ଦୁଇ ଜଣ ପିଓକେ-ଆଧାରିତ ଅପରେଟିଭଙ୍କ ଦ୍ଵାରା ପ୍ରସ୍ତୁତ କରାଯାଇଥିଲା।

ସରକାରଙ୍କ ପ୍ରତିକ୍ରିୟା:

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜ ସାଉଦି ଆରବ ଗସ୍ତ ଅଧାରୁ ଛାଡ଼ି ଦିଲ୍ଲୀ ଫେରିଛନ୍ତି ଏବଂ କ୍ୟାବିନେଟ କମିଟି ଅନ ସିକ୍ୟୁରିଟି (ସିସିଏସ) ବୈଠକରେ ଅଧ୍ୟକ୍ଷତା କରିଛନ୍ତି। ସେ ଏକ ବିବୃତି ଜାରି କରି କହିଛନ୍ତି ଯେ, “ଏହି ଜଘନ୍ୟ କାର୍ଯ୍ୟରେ ସାମିଲ ଥିବା ଲୋକଙ୍କୁ କୌଣସି ପ୍ରକାରର କ୍ଷମା ଦିଆଯିବ ନାହିଁ। ଏହା ଆମର ଆତଙ୍କବାଦ ବିରୋଧୀ ସଂକଳ୍ପ ଅଟଳ।” ଗୃହମନ୍ତ୍ରୀ ଅମିତ ଶାହ ଶ୍ରୀନଗର ପହଞ୍ଚି ଘଟଣାସ୍ଥଳ ପରିଦର୍ଶନ କରିବା ସହ ଆହତମାନଙ୍କୁ ଭେଟିଛନ୍ତି। ସେ ମଧ୍ୟ ଏକ ଉଚ୍ଚସ୍ତରୀୟ ସୁରକ୍ଷା ବୈଠକରେ ଅଂଶଗ୍ରହଣ କରିଛନ୍ତି।

ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ଏକ ଦଳ ଘଟଣାସ୍ଥଳରେ ପହଞ୍ଚି ଅନୁସନ୍ଧାନ ଆରମ୍ଭ କରିଛି। ସୁରକ୍ଷା ବାହିନୀ ଗୁଲିକାଣ୍ଡ ହୋଇଥିବା ଅଞ୍ଚଳରେ ଘେରାବନ୍ଦୀ କରି ଆତଙ୍କବାଦୀମାନଙ୍କୁ ଖୋଜିବାରେ ଲାଗିଛନ୍ତି। ଜମ୍ମୁ ଓ କାଶ୍ମୀର ପୁଲିସ ଆକ୍ରମଣ ସମ୍ବନ୍ଧୀୟ ନିର୍ଭରଯୋଗ୍ୟ ସୂଚନା ପାଇଁ ୨୦ ଲକ୍ଷ ଟଙ୍କା ପୁରସ୍କାର ରାଶି ମଧ୍ୟ ଘୋଷଣା କରିଛି।

ଆକ୍ରମଣ ପରେ ପାହାଲଗାମରେ ଏକ ଭୟାବହ ସ୍ଥିତି ସୃଷ୍ଟି ହୋଇଛି। ହୋଟେଲ ମାଲିକ ଓ ଦୋକାନୀମାନେ ଏକ ମହମବତି ଜାଳି ଏହାର ପ୍ରତିବାଦ କରିଛନ୍ତି। ଅନେକ ପର୍ଯ୍ୟଟକ କାଶ୍ମୀର ଅଞ୍ଚଳ ଛାଡ଼ି ଚାଲିଯାଇଛନ୍ତି। ଯାହା ପାହାଲଗାମର ପର୍ଯ୍ୟଟନ ଉପରେ ଗଭୀର ପ୍ରଭାବ ପକାଇଛି। ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏକ ସର୍ବଦଳୀୟ ବୈଠକ ଡାକି ପରିସ୍ଥିତିର ନିରିକ୍ଷଣ କରିଛନ୍ତି।