ନୂଆଦିଲ୍ଲୀ, ୩୧।୧୦: ଦୀର୍ଘ ଦିନ ଧରି ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଉତ୍ତେଜନା ଲାଗି ରହିଛି । ପାକିସ୍ତାନର ବିମାନ ଆକ୍ରମଣ ପରେ କଡ଼ା ଜବାବ ଦେଇଥିଲା ତାଲିବାନ, ଯାହା ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ପଛକୁ ହଟିବାକୁ ବାଧ୍ୟ କରିଥିଲା । ବର୍ତ୍ତମାନ, ଦୁଇ ଦେଶ ମଧ୍ୟରେ ଏକ ଯୁଦ୍ଧବିରତି ପାଇଁ ସହମତ ହୋଇଛି । ତୁର୍କୀ ଏବଂ କତାର ଏଥିରେ ପ୍ରମୁଖ ଭୂମିକା ଗ୍ରହଣ କରିଛନ୍ତି । ତୁର୍କୀ ନଭେମ୍ବର ୬ ତାରିଖରେ ଆଉ ଏକ ବୈଠକ ଘୋଷଣା କରି ଏକ ମିଳିତ ବିବୃତ୍ତି ଜାରି କରିଛି । ତୁର୍କୀ ବୈଦେଶିକ ମନ୍ତ୍ରଣାଳୟ ଏକ ମିଳିତ ବିବୃତ୍ତିରେ କହିଛନ୍ତି, "୧୮ରୁ ୧୯ ଅକ୍ଟୋବରରେ ଦୋହାରେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଯୁଦ୍ଧବିରତି ପାଇଁ ସହମତ ହୋଇଥିଲା । ଏହାପରେ ୨୫ରୁ ୩୦ ଅକ୍ଟୋବରରେ ଇସ୍ତାନବୁଲରେ ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ତୁର୍କୀ ଏବଂ କତାରର ମଧ୍ୟସ୍ଥତାରେ ଏକ ବୈଠକ ହୋଇଥିଲା । ଏହି ସମୟରେ ସମସ୍ତ ପକ୍ଷ ଯୁଦ୍ଧବିରତିକୁ ସୁଦୃଢ଼ କରିବା ଉପରେ ଆଲୋଚନା କରିଥିଲେ ।"
ନଭେମ୍ବର ୬ରେ ଆଉ ଏକ ବୈଠକ:
ନଭେମ୍ବର ୬ ତାରିଖରେ ଇସ୍ତାନବୁଲରେ ତାଲିବାନ ଏବଂ ଇସଲାମାବାଦ ମଧ୍ୟରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହେବ, ଯେଉଁଥିରେ ଯୁଦ୍ଧବିରତି ନେଇ କାର୍ଯ୍ୟପନ୍ଥା ନିର୍ଣ୍ଣୟ କରାଯିବ । ତୁର୍କୀର ବୈଦେଶିକ ମନ୍ତ୍ରଣାଳୟ କହିଛି ଯେ, ଶାନ୍ତି ବଜାୟ ରଖିବା ଏବଂ ଯୁଦ୍ଧବିରତି ଉଲ୍ଲଂଘନକାରୀଙ୍କୁ ଦଣ୍ଡ ଦେବା ପାଇଁ ଏକ ତଦାରଖ ବ୍ୟବସ୍ଥା ଗଠନ କରାଯିବା ଉଚିତ୍ । ଏହି ନିଷ୍ପତ୍ତିରେ ସମସ୍ତ ପକ୍ଷ ସହମତ ହୋଇଛନ୍ତି ।
ପାକିସ୍ତାନକୁ ଉଚିତ୍ ଜବାବ ଦେଲା ଆଫଗାନିସ୍ତାନ:
ଚଳିତ ମାସ ପ୍ରାରମ୍ଭରେ କାବୁଲରେ ହୋଇଥିବା ବିସ୍ଫୋରଣ ପରେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଥିଲା । ତାଲିବାନ ସରକାର ପାକିସ୍ତାନୀ ସେନା ଉପରେ ଏକ ଆକ୍ରମଣର ଦୃଢ଼ ଜବାବ ଦେଇଥିଲା । ଆଫଗାନ ଅଧିକାରୀମାନେ ଦାବି କରିଛନ୍ତି ଯେ, ସେମାନଙ୍କ ପ୍ରତିଶୋଧରେ ୫୮ ଜଣ ପାକିସ୍ତାନୀ ସୈନିକ ନିହତ ହୋଇଥିଲେ । ଅନ୍ୟପଟେ ପାକିସ୍ତାନୀ ସେନା ୨୩ ଜଣ ନିହତ ହୋଇଥିବା କହିଛି । ଏହି ଯୁଦ୍ଧ ପରେ କତାର ଏକ ବୈଠକ ଡାକିଥିଲା, ଯାହା ପରେ ଏକ ଅସ୍ଥାୟୀ ଯୁଦ୍ଧବିରତି ହୋଇଥିଲା । ଇସ୍ତାନବୁଲରେ ୪ ଦିନ ଧରି ଚାଲିଥିବା ଆଲୋଚନା କୌଣସି ଚୁକ୍ତି ବିନା ଶେଷ ହୋଇଥିଲା । କିନ୍ତୁ, ତୁର୍କୀ ଓ କତାରର ଚେଷ୍ଟାରେ ଉଭୟ ପକ୍ଷ ପୁଣିଥରେ ଆଲୋଚନା ଜାରି ରଖିଥିଲେ । ଏବେ ଏକ ଯୁଦ୍ଧବିରତି ଉପରେ ସହମତ ହୋଇଛି ।
