ନୂଆଦିଲ୍ଲୀ: ଭାରତୀୟ ବାୟୁ ସେନା ମୁଖ୍ୟଙ୍କ ବଡ଼ ଖୁଲାସା ପରେ ଏବେ ଟେନସନ୍‌ରେ ପାକିସ୍ତାନ ।  ଏୟାର ଚିଫ ମାର୍ଶଲ ଏପି ସିଂହ କହିଥିଲେ, ଅପରେସନ୍‌ ସିନ୍ଦୂର ସମୟରେ ପାକିସ୍ତାନର ୫ଟି ଲଢ଼ୁଆ ବିମାନ ଧ୍ବଂସ ହୋଇଛି । ଏବେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ କହିଛନ୍ତି ଏଥିରେ କୌଣସି ସତ୍ୟତା ନାହିଁ । ସେ  ଶନିବାର ଦାବି କରିଛନ୍ତି ଯେ, ଭାରତୀୟ ସେନା ସେମାନଙ୍କ ସେନାର କୌଣସି ବିମାନକୁ ଧ୍ବଂସ କରିପାରି ନାହିଁ । 

ବାୟୁ ସେନା ମୁଖ୍ୟ ଏୟାର ଚିଫ୍ ମାର୍ଶଲ ଅମର ପ୍ରୀତ ସିଂହ କହିଥିଲେ ଯେ, ଭାରତୀୟ ବାୟୁ ସେନା (IAF) 'ଅପରେସନ୍ ସିନ୍ଦୂର' ସମୟରେ ୫ଟି ପାକିସ୍ତାନୀ ଲଢ଼ୁଆ ବିମାନ ଖସାଇ ଦେଇଛି । ଅତି କମରେ ଗୋଟିଏ AWC (ଏୟାରବର୍ଣ୍ଣ ୱାର୍ଣ୍ଣିଂ ଆଣ୍ଡ୍ କଣ୍ଟ୍ରୋଲ୍ ସିଷ୍ଟମ୍)  ଏବଂ କିଛି F-16 ବିମାନ ଥିବାର ସୂଚନା ପାଇଛୁ । ପ୍ରାୟ ୩୦୦ କିଲୋମିଟର ଦୂରରୁ ଟାର୍ଗେଟ କରି ପାକିସ୍ତାନୀ ବିମାନକୁ ଧ୍ବଂସ କରାଯାଇଛି । 

ଖ୍ବାଜା ଆସିଫ୍ ସୋସିଆଲ ମିଡିଆରେ ଏକ ପୋଷ୍ଟରେ ଦାବି କରିଛନ୍ତି ଯେ, ଭାରତ ଗୋଟିଏ ବି ପାକିସ୍ତାନୀ ବିମାନକୁ ଟାର୍ଗେଟ କିମ୍ବା ନଷ୍ଟ କରିପାରି ନାହିଁ । ତିନି ମାସ ପର୍ଯ୍ୟନ୍ତ ଏପରି କୌଣସି ଦାବି କରାଯାଇ ନଥିଲା । କିନ୍ତୁ ପାକିସ୍ତାନ ତୁରନ୍ତ ଅନ୍ତର୍ଜାତୀୟ ଗଣମାଧ୍ୟମକୁ ବିସ୍ତୃତ ସୂଚନା ପ୍ରଦାନ କରିଥିଲା। ଅପରେସନ୍ ସିନ୍ଦୂର' ସମୟରେ ପାକିସ୍ତାନୀ ବିମାନ ଧ୍ବଂସ ବିଷୟରେ ଭାରତୀୟ ବାୟୁ ସେନା ମୁଖ୍ୟଙ୍କ ଦ୍ୱାରା ଦିଆଯାଇଥିବା ବିବୃତ୍ତି ଅବିଶ୍ୱସନୀୟ । 

ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଦାବି କରିଛନ୍ତି ଯେ, ନିୟନ୍ତ୍ରଣ ରେଖାରେ ଭାରତୀୟ ସଶସ୍ତ୍ର ବାହିନୀ ମଧ୍ୟ ପ୍ରବଳ କ୍ଷତି ସହିଛି। ସତ୍ୟକୁ ନେଇ ସନ୍ଦେହ ହେଉଥିଲେ ଉଭୟ ପକ୍ଷ ବିମାନ ସଂପର୍କରେ ସ୍ୱାଧୀନ ଯାଞ୍ଚ କରିବା ଉଚିତ । ପାକିସ୍ତାନର ସାର୍ବଭୌମତ୍ୱ ଏବଂ କ୍ଷେତ୍ରୀୟ ଅଖଣ୍ଡତାର ପ୍ରତ୍ୟେକ ଉଲ୍ଲଂଘନର ଏକ ଦ୍ରୁତ, ନିର୍ଦ୍ଦିଷ୍ଟ ଏବଂ ସନ୍ତୁଳିତ ଜବାବ ଦିଆଯିବ ବୋଲି ସେ କହିଛନ୍ତି ।