ନୂଆଦିଲ୍ଲୀ,୦୭/୦୯: କ୍ରିକେଟ୍ ମ୍ୟାଚ୍ ଚାଲିଥିବା ବେଳେ ଷ୍ଟାଡିୟମରେ ବିସ୍ଫୋରଣ। ଫଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଲୋକ ଆହତ ହୋଇଛନ୍ତି । ତେବେ ଏହି ଘଟଣା ପାକିସ୍ତାନର ଖାଇବର ପଖତୁନଖ୍ୱା ତହସିଲର କୌସର କ୍ରିକେଟ୍ ଗ୍ରାଉଣ୍ଡରେ ଘଟିଛି।
ପାକିସ୍ତାନୀ ଗଣମାଧ୍ୟମ ରିପୋର୍ଟ ଅନୁଯାୟୀ, ପୁଲିସ କହିଛି ଯେ ଏହି ବିସ୍ଫୋରଣ ଏକ ଆଇଇଡି ସାହାଯ୍ୟରେ କରାଯାଇଥିଲା ଏବଂ ଏହାକୁ ଏକ ଟାର୍ଗେଟେଡ୍ ଆକ୍ରମଣ ବୋଲି କୁହାଯାଉଛି।ବିସ୍ଫୋରଣର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି, ଯେଉଁଥିରେ ଲୋକମାନେ ଜୀବନ ବଞ୍ଚାଇବା ପାଇଁ ଏଠାକୁ ସେଠାକୁ ଦୌଡ଼ୁଥିବାର ଦେଖାଯାଉଛି। ବିସ୍ଫୋରଣ ପରେ, ପଡ଼ିଆରେ ଅରାଜକତା ଦେଖାଦେଇଥିଲା ଏବଂ ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା। ବର୍ତ୍ତମାନ ସୁରକ୍ଷାବାହିନୀ ସେହି ଅଞ୍ଚଳକୁ ଘେରାବନ୍ଦୀ କରିଛନ୍ତି। ଅଧିକାରୀମାନେ କହିଛନ୍ତି ଯେ ଏହି ଘଟଣା ଏକ ଆତଙ୍କବାଦୀ ଆକ୍ରମଣକୁ ଇଙ୍ଗିତ କରୁଛି।
ସେହିପରି ଗତ ସପ୍ତାହରେ ଏକ ପୁଲିସ ଷ୍ଟେସନରେ କ୍ୱାଡକପ୍ଟର ସାହାଯ୍ୟରେ ଆକ୍ରମଣ କରାଯାଇଥିଲା। ଡନ୍ର ରିପୋର୍ଟ ଅନୁଯାୟୀ, ଜଣେ ସ୍ଥାନୀୟ ପୁଲିସ ଅଧିକାରୀ କହିଛନ୍ତି ଯେ ଆହତମାନଙ୍କୁ ତୁରନ୍ତ ଜିଲ୍ଲା ହସ୍ପିଟାଲକୁ ପଠାଯାଇଥିଲା। ଏପର୍ଯ୍ୟନ୍ତ ଏହି ଆକ୍ରମଣ ପାଇଁ କେହି ଦାୟୀ ହୋଇନାହାଁନ୍ତି। ସୁରକ୍ଷା ଅଧିକାରୀମାନେ ସନ୍ଦେହ କରୁଛନ୍ତି ଯେ, କିଛି ସପ୍ତାହ ପୂର୍ବରୁ ସୁରକ୍ଷାବାହିନୀ ଦ୍ୱାରା ଆରମ୍ଭ ହୋଇଥିବା ଆତଙ୍କବାଦ ବିରୋଧୀ ଅଭିଯାନ 'ଅପରେସନ୍ ସର୍ବକାଫ୍'ର ଜବାବରେ ଆତଙ୍କବାଦୀମାନେ ଏହି ଆକ୍ରମଣ କରିଥିଲେ। ଡନ୍ ରିପୋର୍ଟ ଅନୁଯାୟୀ, ଜିଲ୍ଲା ପୁଲିସ ଅଧିକାରୀ ୱାକାସ୍ ରଫିକ୍ କହିଛନ୍ତି ଯେ, ବିସ୍ଫୋରଣଟି ଖାର ତହସିଲର କୌସର କ୍ରିକେଟ ଗ୍ରାଉଣ୍ଡରେ ହୋଇଥିଲା ଏବଂ ଏହାକୁ ଏକ ଆଇଇଡି ସାହାଯ୍ୟରେ କରାଯାଇଥିଲା।
