ନୂଆଦିଲ୍ଲୀ: ପାକିସ୍ତାନରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଧମକ । ପାକିସ୍ତାନ ସ୍ଥିତ ଆତଙ୍କବାଦୀ ସଂଗଠନ ଲସ୍କର-ଏ-ତୈବା (LeT)ର ଉପମୁଖ୍ୟ ତଥା ପହଲଗାମ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ସୈଫୁଲ୍ଲା କସୁରୀ ଏହି ଧମକ ଦେଇଛି। ଏଥିପାଇଁ ସୋସିଆଲ ମିଡିଆରେ ଏକ ଭିଡିଓ ଜାରି କରିଛି ସେ। ଭାଇରାଲ କ୍ଲିପରେ ସୈଫୁଲ୍ଲା ପାକିସ୍ତାନୀ ସେନା ମୁଖ୍ୟ ଜେନେରାଲ ଅସୀମ ମୁନିରଙ୍କ ପ୍ରଶଂସା କରୁଛି। ଆତଙ୍କବାଦୀ ସୈଫୁଲ୍ଲା କସୁରୀଙ୍କୁ ସେପ୍ଟେମ୍ବର ୪ ତାରିଖରେ ପାକିସ୍ତାନର ଏହି ବରିଷ୍ଠ ସେନା ଅଧିକାରୀଙ୍କ ସହିତ ମଧ୍ୟ ଦେଖାଯାଇଥିଲା।
ଆତଙ୍କବାଦୀ ସୈଫୁଲ୍ଲା କହିଛି କି, "ମୁଁ ଫିଲ୍ଡ ମାର୍ଶାଲ ଅସୀମ ମୁନିରଙ୍କୁ ଅନୁରୋଧ କରୁଛି ଯେ, ପ୍ରଧାନମନ୍ତ୍ରୀ ମୋଦିଙ୍କୁ ଆମେ ୧୦ ମେ, ୨୦୨୫ ରେ ଯେଉଁ ଶିକ୍ଷା ଦେଇଥିଲୁ, ସେହି ଶିକ୍ଷା ଦିଅନ୍ତୁ।" ତଥାପି, ସମଗ୍ର ବିଶ୍ୱ ଜାଣେ ଯେ ୧୦ ମେ ରାତିରେ ଭାରତୀୟ ସେନା ପାକିସ୍ତାନରେ ଏପରି ତାଣ୍ଡବ ରଚିଥିଲା, ଯାହାକୁ ପାକିସ୍ତାନ କେବେ ଭୁଲିପାରିବ ନାହିଁ। ଏସବୁ ସତ୍ତ୍ବେ ପାକିସ୍ତାନ ପ୍ରଧାନମନ୍ତ୍ରୀ ତାଙ୍କ ଲୋକଙ୍କୁ ଏବେ ଖୁସି କରିବା ପାଇଁ ଭାରତ ସହିତ ବିଜୟର ମିଥ୍ୟା ଖବରର ପ୍ରସାରଣ କରୁଛନ୍ତି।
ସମ୍ବାଦ ସଂସ୍ଥା ANIର ଏକ ରିପୋର୍ଟ ଅନୁଯାୟୀ, ପାକିସ୍ତାନରେ ଭାରତ ବିରୋଧୀ ବୟାନବାଜିର ଭିଡିଓ ମଧ୍ୟ ବ୍ୟାପକ ଭାବରେ ପ୍ରସାରିତ ହେଉଛି। ପାକିସ୍ତାନୀ ନ୍ୟୁଜ୍ ଚ୍ୟାନେଲ ଗୁଡ଼ିକରେ ଆତଙ୍କବାଦୀ ସୈଫୁଲ୍ଲାକୁ ବନ୍ୟା ରିଲିଫ୍ କାର୍ଯ୍ୟରେ କାମ କରୁଥିବାର ଦାବି କରି ଦେଖାଯାଇଥିଲା। ଆତଙ୍କବାଦୀ ସଂଗଠନ ଲସ୍କର-ଏ-ତୈବାର ପ୍ରତିଷ୍ଠାତା ହାଫିଜ୍ ସଇଦର ଘନିଷ୍ଠ ସହଯୋଗୀ ସୈଫୁଲ୍ଲା ଭାରତ ଉପରେ ଜଳ ଆତଙ୍କବାଦର ଅଭିଯୋଗ ଆଣିଛି। ସେ ଦାବି କରିଛି ଯେ ଭାରତ ଜାଣିଶୁଣି ପାକିସ୍ତାନରେ ବନ୍ୟା ଆଣିବା ପାଇଁ ଷଡ଼ଯନ୍ତ୍ର କରୁଛି।
