ନୂଆଦିଲ୍ଲୀ,୧।୭: ଭାରତ ସହ ବିବାଦ ଭିତରେ ପାକିସ୍ତାନ ମଙ୍ଗଳବାର ଜାତିସଂଘର ସୁରକ୍ଷା ପରିଷଦ(ୟୁଏନ୍ଏସ୍ସି)ର ଅଧ୍ୟକ୍ଷତା ପଦ ସମ୍ଭାଳିବା ଆରମ୍ଭ କରିଦେଇଛନ୍ତି। ତା’ ର କାର୍ଯ୍ୟକାଳ ଆଜି ଅର୍ଥାତ୍ ୧ ଜୁଲାଇରୁ ୩୧ ଜୁଲାଇ ପର୍ଯ୍ୟନ୍ତ ରହିଛି । ପାକିସ୍ତାନ ଚଳିତ ବର୍ଷ ଜାନୁଆରୀରେ ସୁରକ୍ଷା ପରିଷଦର ଅସ୍ଥାୟୀ ସଦସ୍ୟ ଭାବରେ ଦୁଇ ବର୍ଷର କାର୍ଯ୍ୟକାଳ ଆରମ୍ଭ କରିଥିଲା। ପାକିସ୍ତାନକୁ ଜାତିସଂଘରେ ଭାରି ସମର୍ଥନ ସହ ସୁରକ୍ଷା ପରିଷଦର ଅସ୍ଥାୟୀ ସଦସ୍ୟ ଚୟନ କରାଯାଇଛି। ତାକୁ ୧୯୩ ରୁ ୧୮୨ ଖଣ୍ଡ ଭୋଟ୍ ମିଳିଥିଲା। ସୁରକ୍ଷା ପରିଷଦର ଅଧ୍ୟକ୍ଷତା ପଦରେ ମାସିକ ଆଧାରରେ ୧୫ ସଦସ୍ୟଙ୍କ ଭିତରେ ପରିବର୍ତ୍ତନ ହୋଇଥାଏ।
୨୦୧୩ ପରେ ଏହା ପ୍ରଥମ ଥର ପାଇଁ ଯେ ପାକିସ୍ତାନକୁ UNSC ର ସଭାପତି ପଦ ମିଳିଛି। ତଥାପି, ପାକିସ୍ତାନ ପୂର୍ବରୁ ସୁରକ୍ଷା ପରିଷଦରେ ସାତ ଥର ଏହି ପଦବୀରେ କାର୍ଯ୍ୟ କରିଛି। ଏହା ତା’ର ଅଷ୍ଟମ କାର୍ଯ୍ୟକାଳ। ଜାତିସଂଘ ସୁରକ୍ଷା ପରିଷଦ ବିଶ୍ୱର ସବୁଠାରୁ ଶକ୍ତିଶାଳୀ ସଂସ୍ଥା, ଯାହାର ପାଞ୍ଚଟି ସ୍ଥାୟୀ ଏବଂ ୧୦ଟି ଅସ୍ଥାୟୀ ସଦସ୍ୟ ଅଛନ୍ତି। ପାକିସ୍ତାନ ମଧ୍ୟ ଏକ ଅସ୍ଥାୟୀ ସଦସ୍ୟ, ଯାହାର କାର୍ଯ୍ୟକାଳ ଡିସେମ୍ବର ୨୦୨୬ ରେ ଶେଷ ହେବ।
ପାକିସ୍ତାନ ୟୁଏନ୍ଏସ୍ସିରେ ଅଧ୍ୟକ୍ଷ ହେବାପରେ ଭାରତ ପାଇଁ ବିପଦ ହୋଇପାରେ। କାରଣ ପହଲଗାମ୍ ହମଲା ପରେ ଭାରତ ଅପରେସନ୍ ସିନ୍ଦୂର ଜରିଆରେ ପାକିସ୍ତାନକୁ ଦେଇଥିଲା କଡା ଜବାବ୍। ଏହାର ପ୍ରତିଶୋଧ ଏବେ ସେ ଜାତିସଂଘର ସୁରକ୍ଷା ପରିଷଦରେ ଅଧ୍ୟକ୍ଷ ହେବାପରେ ନେଇପାରେ। ଆଶଙ୍କା ରହିଛି ଯେ, ଚଳିତ ମାସ ଭାରତ ବିରୋଧରେ ପାକିସ୍ତାନ ନ୍ୟାରେଟିଭ ତିଆରି କରିବାର ଚେଷ୍ଟା କରୁଛି।
